ព័ត៌មានអន្ដរជាតិ

ចិន ប្រកាសដាក់ទណ្ឌកម្មប្រឆាំងតៃវ៉ាន់ ចំថ្ងៃស្បថឡើងកាន់តំណែងប្រធានាធិបតីថ្មីនៅតៃប៉ិ

បានផុស

៨ ខែ មុន

នៅ

ថ្ងៃចន្ទ ២០ ឧសភា ២០២៤

ដោយ

Chheang

ថ្ងៃទី២០ ខែឧសភា ឆ្នាំ២០២៤ នេះ គឺជាថ្ងៃដែលលោក Lai Ching-te ចូលស្បថឡើងកាន់តំណែងជាប្រធានាធិបតីថ្មីជាផ្លូវការនៅតៃវ៉ាន់។ ផ្ទុយពីការសាទរ មហាយក្សចិនបែរជាប្រកាសដាក់ចេញនូវទណ្ឌកម្មថ្មី ដែលមានគោលបំណងប្រឆាំងទៅនឹងរដ្ឋាភិបាលក្រុងតៃប៉ិ នៅចំថ្ងៃបើកទំព័រប្រវត្តិសាស្ត្រស្វាគមន៍មេដឹកនាំថ្មី។

លោក Lai Ching-te (រូបភាព៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងពាណិជ្ជកម្មចិន បានប្រកាសថា ទណ្ឌកម្មថ្មីនឹងដាក់លើក្រុមហ៊ុនចំនួន៣ ដែលបានផលិតសព្វាវុធយោធាលក់ឲ្យទៅតៃវ៉ាន់។ ក្រុមហ៊ុនដែលរងទណ្ឌកម្ម មានដូចជា ក្រុមហ៊ុន Boeing ក្រុមហ៊ុន General Atomics Aeronautical Systems និងក្រុមហ៊ុន General Dynamics Land Systems។ ចិន បានចាត់ក្រុមហ៊ុនទាំងនោះចូលក្នុងបញ្ជីឈ្មោះ “អង្គភាពដែលមិនគួរឲ្យទុកចិត្ត” ដោយហាមឃាត់ការវិនិយោគទាំងអស់នៅក្នុងដែនដីរបស់ចិន នាពេលអនាគត។ មួយវិញទៀត ថ្នាក់ដឹកនាំជាន់ខ្ពស់របស់ក្រុមហ៊ុនទាំង៣ ក៏រងការហាមប្រាមមិនឲ្យធ្វើដំណើរចូលទឹកដីប្រទេសចិនទៀតដែរ។

គួររំឭកថា លោក Lai Ching-te ប្រធានាធិបតីថ្មីនៅតៃវ៉ាន់ ធ្លាប់បានប្រកាសសន្យាពង្រឹងសន្តិសុខជាតិ តាមរយៈការនាំចូលយន្តហោះចម្បាំងទំនើបៗ និងបច្ចេកវិទ្យាបន្ថែមទៀត។ បែបនេះហើយទើបកាលពីខែមេសាកន្លងទៅ រដ្ឋាភិបាលក្រុងប៉េកាំង ដែលចង់បានតៃវ៉ាន់ទៅគ្រប់គ្រងនោះ បានសម្រេចបង្កកទ្រព្យសម្បត្តិរបស់ក្រុមហ៊ុន General Atomics Aeronautical Systems និងក្រុមហ៊ុន General Dynamics Land Systems ដែលមាននៅក្នុងប្រទេសចិន។ ក្រុមហ៊ុនទាំង២ សុទ្ធតែមានទំនាក់ទំនងជួញដូរពាណិជ្ជកម្មអាវុធជាមួយតៃវ៉ាន់។

បន្ថែមពីនេះ កាលពីឆ្នាំ២០២២ ចិនធ្លាប់ដាក់ទណ្ឌកម្មម្ដងរួចហើយលើក្រុមហ៊ុន Boeing ប្រឆាំងនឹងលោក Ted Colbert ដែលជានាយកប្រតិបត្តិផ្នែកការពារ ដែនអាកាស និងសន្តិសុខរបស់ Boeing ក្រោយពីក្រុមហ៊ុនអាមេរិកមួយនេះបានឈ្នះលើកិច្ចសន្យាតម្លៃ ៣៥៥លានដុល្លារ សម្រាប់ការផ្គត់ផ្គង់មីស៊ីល Harpoon ឲ្យទៅតៃវ៉ាន់។

រោងចក្រក្រុមហ៊ុន Boeing (រូបភាព៖ *First Class Photography*)

សូមបញ្ជាក់ថា កំឡុងពេល៤ឆ្នាំចុងក្រោយ យោធាចិនតែងបង្កើនសកម្មភាពរបស់ខ្លួននៅក្បែរកោះតៃវ៉ាន់ជានិច្ច ដូចជា ការបញ្ជូនយន្តហោះចម្បាំងហោះរំលងខ្សែបន្ទាត់ព្រំដែនច្រកសមុទ្រតៃវ៉ាន់ ជាដើម។ បន្ទាត់ព្រំដែនច្រកសមុទ្រនេះ មិនត្រូវបានចិនទទួលស្គាល់នោះឡើយ។ ចិន ដែលតែងចាត់ទុកតៃវ៉ាន់ជាអធិបតេយ្យភាពរបស់ខ្លួន មានការមិនពេញជាខ្លាំងចំពោះលោក Lai Ching-te ដែលជាប្រធានាធិបតីជាប់ឆ្នោតថ្មី ហើយជឿជាក់ថា លោកគឺជាជនផ្ដាច់ខ្លួននិយម និងតែងតែជំទាស់នឹងសកម្មភាពរបស់ចិន។

មិនខុសពីលោកស្រី Tsai Ing-wen ដែលជាប្រធានាធិបតីទើបអស់អាណត្តិ លោក Lai ក៏នៅរក្សាជំហរបដិសេធផងដែរនូវការអះអាងរបស់ចិន ដែលចង់បានតៃវ៉ាន់មកកាន់កាប់។ លោក Lai ថា មានតែប្រជាពលរដ្ឋតៃវ៉ាន់ប៉ុណ្ណោះដែលអាចសម្រេចជោគវាសនាខ្លួនឯងបាន៕

ដោយ៖ ឈាង