ត្រីទីឡាព្យ៉ារាប់រយគីឡូក្រាមងាប់ទើរលើឆ្នេរភាគកណ្ដាល វៀតណាម

ត្រីទឹកសាបរាប់រយគីឡូក្រាមត្រូវបានគេប្រទះឃើញងាប់ទើរលើឆ្នេរមួយកន្លែងក្នុងទីក្រុង Da Nang ខណៈបច្ចុប្បន្នអាជ្ញាធរក៏បានយកត្រីងាប់ទាំងនោះចេញពីតំបន់ឆ្នេរនៅភាគកណ្ដាលប្រទេសវៀតណាមមួយនេះរួចហើយផងដែរ ។ នេះបើយោងតាមការចេញផ្សាយដោយកាសែត Tuoi Tre កាលពីថ្ងៃទី១៩ ខែឧសភាកន្លងទៅ ។

តំណាងក្រុមហ៊ុនបង្ហូរទឹកសំណល់ទីក្រុង Da Nang (DWT) បានឲ្យដឹងកាលពីថ្ងៃអាទិត្យថា កម្មកររបស់ក្រុមហ៊ុនបានបញ្ចប់ដំណើរការយកត្រីងាប់ទាំងនោះចេញពីឆ្នេរ Nguyen Tat Thanh ក្នុងស្រុក Thanh Khe រួចរាល់អស់ហើយ ខណៈត្រីដែលងាប់ភាគច្រើនជាត្រីទីឡាព្យ៉ា បន្ទាប់ពីការបង្ហូរទឹកសំណល់ចូលទៅក្នុងមហាសមុទ្រកាលពីថ្ងៃសៅរ៍ ។

លោក Ha Van Thanh នាយកក្រុមហ៊ុន DWT បានបញ្ជាក់បន្ថែមថា នៅពេលទទួលបានដំណឹងត្រីងាប់នៅលើឆ្នេរសមុទ្រកាលពីចុងសប្ដាហ៍មក ក្រុមហ៊ុនបានបញ្ជូនកម្មករទៅឆ្នេរភ្លាមៗដើម្បីប្រមូលត្រីងាប់ និងចាប់ផ្តើមពិនិត្យមើលគុណភាពទឹកផងដែរ ហើយលោក Thanh បានចាត់ទុកមូលហេតុនៃការងាប់ត្រីទាំងនេះ ដោយសារតែផលប៉ះពាល់ពីលំហូរទឹកប្រៃ ។

នាយកក្រុមហ៊ុន DWT រូបនេះលើកឡើងទៀតថា “យើង​នឹង​បន្ត​តាម​ដាន​យ៉ាង​ដិតដល់​លើ​ស្ថានភាពទឹក ក៏ដូចជាផលប៉ះពាល់ផ្សេងៗទៀត ​ដើម្បី​ចាត់​វិធានការ​សមស្រប​ក្នុងការការពារ​ត្រី​កុំ​ឲ្យ​ងាប់ច្រើនឡើងៗ ជាពិសេសកុំឲ្យប៉ះពាល់ទៅដល់បញ្ហាបរិស្ថាន​” ។

ចំណែកមូលហេតុមួយទៀតដែលអាជ្ញាធរដាក់ការសង្ស័យនាំឲ្យត្រីទាំងនោះងាប់រាប់រយគីឡូក្រាមបែបនេះ គឺដោយសារតែជំនន់ទឹកភ្លៀងហូរចេញពីបឹងបួមួយចំនួនចូលទៅ​ក្នុង​អាកាសយានដ្ឋាន​អន្តរជាតិ Da Nang និងបឹង Park Lake ក្នុង​ស្រុក Thanh Khe តាម​ច្រក​ទ្វារ​ទឹក​ Nguyen Tat Thanh ហើយក៏បន្តហូរចូល​ទៅ​ក្នុង​សមុទ្រ ។

គួរបញ្ជាក់ថា ក្នុងរយៈពេលប៉ុន្មានថ្ងៃនេះ ទីក្រុង Da Nang រងការវាយប្រហារដោយភ្លៀងធ្លាក់យ៉ាងខ្លាំងក្លា ដូច្នេះបរិមាណទឹកដ៏ច្រើនចេញពីបឹងទាំងនេះបានហូរតាមបំពង់លូនៅផ្លូវ Le Do និងផ្លូវ Nguyen Tat Thanh ច្រោះចូលទៅក្នុងសមុទ្រ ខណៈទឹកហូរទាំងនោះក៏អាចនាំត្រីទឹកសាបចូលទៅក្នុងមហាសមុទ្រផងដែរ ៕

ដោយ ៖ សុខ ជីវ័ន្ត

ចុចអាន ៖ ទីបំផុត វៀតណាម រកបានប្រធានាធីបតីថ្មីហើយ