ព័ត៌មានអន្ដរជាតិ

វៀតណាម ជះលុយជិត ១៤លានដុល្លារ បញ្ចៀសបញ្ហាកកស្ទះចរាចរណ៍នៅហូជីមិញ

បានផុស

១០ ខែ មុន

នៅ

ថ្ងៃចន្ទ ២០ ឧសភា ២០២៤

ដោយ

Chheang

ទីក្រុងហូជីមិញ នឹងបើកនូវគម្រោងថ្មីមួយតម្លៃ ១៣,៧លានដុល្លារ ដើម្បីជួសជុល និងកែលម្អហេដ្ឋារចនាសម្ព័ន្ធចរាចរណ៍ឡើងវិញ នៅតាមតំបន់មួយចំនួន ដែលកំពុងពើបប្រទះនឹងបញ្ហាកកស្ទះ ជន់លិច និងងាយកើតមានគ្រោះថ្នាក់។ នេះបើយោងតាមការចុះផ្សាយរបស់សារព័ត៌មាន VN Express កាលពីថ្ងៃទី១៩ ខែឧសភា ឆ្នាំ២០២៤។

ចរាចរណ៍នៅទីក្រុងហូជីមិញ (រូបភាព៖ VnExpress)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយនៅក្នុងចំណោមគម្រោងថវិកានេះ នឹងត្រូវចំណាយទៅលើការពង្រីកផ្លូវហាយវ៉េមួយខ្សែនៅក្នុងសង្កាត់ Binh Chanh ដែលមានប្រវែង៨៧០ម៉ែត្រ និងទទឹងផ្លូវ ១១ម៉ែត្រ។ វាគឺជាច្រកផ្លូវចេញចូលពីតំបន់ដីសណ្ដទន្លេមេគង្គ និងជាកន្លែងឧស្សាហ៍កកស្ទះចរាចរណ៍យ៉ាងណែនតាន់តាប់។ ក្នុងគម្រោង ផ្លូវមួយខ្សែនោះនឹងត្រូវពង្រីកទទឹងផ្លូវឲ្យបានដល់ ៣៤ម៉ែត្រ ដោយចែកចេញជា៦គន្លងទៅមក។

គម្រោងមួយផ្សេងទៀតគឺការជួសជុលឡើងវិញនូវផ្លូវក្រោមដីនៅតំបន់ Phu Huu ក្បែររង្វង់មូល Lien Phuong ស្ថិតនៅសង្កាត់ Thu Du។ ក្រៅពីនេះក៏មានការកសាងផ្លូវថ្មីប្រវែង ១,៥គីឡូម៉ែត្រ ទទឹងផ្លូវ ៩ម៉ែត្រឆ្លងកាត់ប្រឡាយ Te ក្នុងសង្កាត់លេខ 7 និងការធ្វើស្ពានអាកាសថ្មើរជើងចំនួន២កន្លែង ផងដែរ។

ថវិកាដែលនៅសេសសល់ នឹងត្រូវយកទៅដំំឡើងភ្លើងចរាចរណ៍ថ្មីនៅផ្លូវប្រសព្វចំនួន ៧៦កន្លែងក្នុងទីក្រុងហូជីមិញ។

រាល់កិច្ចការនៅក្នុងគម្រោងមួយនេះ នឹងត្រូវបញ្ចប់នៅត្រឹមឆ្នាំ ២០២៦ខាងមុខ ដោយមជ្ឈមណ្ឌលគ្រប់គ្រងហេដ្ឋារចនាសម្ព័ន្ថផ្លូវថ្នល់វៀតណាម។

សូមបញ្ជាក់ថា បច្ចុប្បន្ន ហូជីមិញមានការចរាចរម៉ូតូចំនួន ៧,៨លានគ្រឿង និងរថយន្តចំនួន ៨៦៥ ០០០គ្រឿង៕

ដោយ៖ ឈាង

Related Topics:ប្រទេសវៀតណាម