កូរ៉េខាងត្បូង ហាមប្រាមពលរដ្ឋកុំឲ្យមើលវីដេអូឃោសនាលើកសរសើរលោក គីម ជុនអ៊ុន

កូរ៉េខាងត្បូងបានហាមឃាត់ការចូលមើលវីដេអូចម្រៀងឃោសនារបស់កូរ៉េខាងជើងដែលបង្ហាញពីការគោរព និងលើកតម្កើងមេដឹកនាំលោក គីម ជុងអ៊ុន ថាជាមេដឹកនាំដ៏អស្ចារ្យ ។​ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២១ ខែឧសភាកន្លងទៅ ។

យោងតាមនិយតករប្រព័ន្ធផ្សព្វផ្សាយកូរ៉េខាងត្បូងបានឲ្យដឹងថា​ កូរ៉េខាងត្បូងបានដាក់ច្បាប់សន្តិសុខជាតិហាមប្រាមការចូលទៅកាន់គេហទំព័រ និងប្រព័ន្ធផ្សព្វផ្សាយរបស់រដ្ឋាភិបាលកូរ៉េខាងជើង ដើម្បីកុំឲ្យពលរដ្ឋមើលឃើញពីកិច្ចខិតខំប្រឹងប្រែងក្រោមការដឹកនាំរបស់លោក គីម ជាពិសេសគឺការផ្សព្វផ្សាយសកម្មភាពលើកសរសើរ និង​ញុះញង់របស់កូរ៉េខាងជើង ។

វីដេអូនេះក៏មានខ្លឹមសារភ្ជាប់ទៅនឹងសង្គ្រាមចិត្តសាស្ត្រប្រឆាំងនឹងកូរ៉េខាងត្បូង ដែល​កំពុង​រីក​រាលដាល​លើ​កម្មវិធី​ TikTok និង​វេទិកា​ផ្សេង​ទៀតផងដែរ ។ ឃ្លីបនេះមានចំណងជើងថា “លោកឪពុកជាទីគោរព” ត្រូវបានបង្ហាញកាលពីខែមុនដោយទូរទស្សន៍រដ្ឋកូរ៉េខាងជើង។ ក្នុងវីដេអូនេះបង្ហាញពីជនជាតិកូរ៉េខាងជើង ចាប់ពីទាហានរហូតដល់ក្មេងៗសិស្សសាលានាំគ្នាច្រៀងថា “លោក គីម ជុងអ៊ុន ជាមេដឹកនាំដ៏អស្ចារ្យ និងលោក គីម ជុងអ៊ុន ជាឪពុកដ៏រួសរាយ” ។

ទន្ទឹមនោះ ការចេញច្បាប់ហាមប្រាមនេះ ក៏ដោយសារតែកន្លងមកប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាងជារឿយៗតែងបង្ហាញពីការបំផ្លើសនៃភាពស្មោះត្រង់របស់ប្រជាពលរដ្ឋចំពោះមេដឹកនាំរបស់ខ្លួន ដើម្បីជួយពង្រឹងអំណាច និងបង្កើតការគោរពឲ្យពិភពលោកបានឃើញ ។

គួរបញ្ជាក់ថា ការសម្រេចចិត្តហាមឃាត់វីដេអូនេះត្រូវបានធ្វើឡើង បន្ទាប់ពីអាជ្ញាធរស៊ើបការណ៍កូរ៉េខាងត្បូងបានស្នើសុំឲ្យមានការពិនិត្យឡើងវិញថាតើវីដេអូនេះបានបំពានច្បាប់គណៈកម្មការស្តង់ដារទំនាក់ទំនងកូរ៉េរបស់ទីក្រុងសេអ៊ូលឬក៏អត់ ខណៈការហាមប្រាមនេះក៏មិនមែនជាលើកដំបូងនោះដែរ ពោលកូរ៉េខាងត្បូងក៏ធ្លាប់បានហាមការចូលទៅកាន់បណ្តាញ YouTube ឃោសនារបស់កូរ៉េខាងជើងមួយចំនួនកាលពីឆ្នាំមុនតាមសំណើរបស់ទីភ្នាក់ងារចារកម្ម ៕

អត្ថបទ៖ ប៊ុន សុភាព