ក្រុមហ៊ូទី ដោះលែងអ្នកទោសសង្គ្រាមជាង ១០០ នាក់

ក្រុមឧទ្ទាមហ៊ូទីដែលមានមូលដ្ឋាននៅប្រទេសយេម៉ែន និងគាំទ្រដោយអ៊ីរ៉ង់កាលពីថ្ងៃអាទិត្យបានដោះលែងអ្នកទោសសង្គ្រាមជាង ១០០ នាក់ដែលជាប់ឃំុ ក្នុងអំឡុងពេលជម្លោះដ៏រ៉ាំរ៉ៃរបស់ប្រទេសនេះ ។ នេះបើយោងតាមការចេញផ្សាយរបស់សារព័ត៌មាន Reuters កាលពីថ្ងៃទី២៧ ខែឧសភាកន្លងទៅ ។

យោងតាមកាកបាទក្រហមនៅក្នុងប្រទេសនេះបានឲ្យដឹងថា ការដោះលែងអ្នកទោស ១១៣ នាក់បានធ្វើឡើងកាលពីថ្ងៃអាទិត្យនៅក្នុងរដ្ឋធានី Sanaa ដែលកាន់កាប់ដោយក្រុមហ៊ូទី ។

អ្នកទោសដែលត្រូវបានដោះលែងគឺស្ថិតក្នុងចំណោមអ្នកដែលគណៈកម្មាធិការអន្តរជាតិនៃកាកបាទក្រហម (ICRC) បានចុះទៅសួរសុខទុក្ខ និងជួយទំនុកបម្រុងជាទៀងទាត់នៅក្នុងរដ្ឋធានីយេម៉ែន ខណៈការដោះលែងនេះបានកើតឡើងជាង ១ ឆ្នាំ បន្ទាប់ពីភាគីធ្វើសង្រ្គាមជាមួយយេម៉ែនបានដោះលែងអ្នកទោសជាង ៨០០ កាលពីខែមេសាឆ្នាំមុន ។

ចាប់តាំងពីជម្លោះបានផ្ទុះឡើងនៅក្នុងឆ្នាំ ២០១៤ មនុស្សរាប់ពាន់នាក់ត្រូវបានចាប់ឃុំខ្លួនធ្វើជាអ្នកទោស ខណៈអ្នកផ្សេងទៀតបានបាត់ខ្លួន ។ ប្រទេសយេម៉ែនបានធ្លាក់ចូលទៅក្នុងជម្លោះដ៏មហន្តរាយ នៅពេលដែលក្រុមហ៊ូទីបានចេញពីមូលដ្ឋានរឹងមាំនៅភាគខាងជើង ហើយបានដណ្តើមកាន់កាប់ទីក្រុង Sanaa និងតំបន់ភាគច្រើននៃប៉ែកខាងជើងយេម៉ែន ដោយបង្ខំឲ្យរដ្ឋាភិបាលនិរទេសខ្លួន ។

គួរបញ្ជាក់ថា ​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ជម្លោះ​បាន​ប្រែក្លាយ​ទៅជា​សង្គ្រាម​​រវាង​អារ៉ាប៊ីសាអូឌីត និង​អ៊ីរ៉ង់ដោយមានមនុស្សស្លាប់ជាង ១៥ មុឺននាក់ រួមទាំងអ្នកប្រយុទ្ធ និងជនស៊ីវិល ហើយនេះក៏ជាគ្រោះមហន្តរាយមនុស្សធម៌ដ៏អាក្រក់បំផុតមួយរបស់ពិភពលោកផងដែរ ៕

អត្ថបទ៖ ប៊ុន សុភាព