ព័ត៌មានអន្ដរជាតិ

សមាជិកសភាបក្សប្រឆាំងថៃ ជាប់គុក២ឆ្នាំពីបទប្រមាថស្ដេច

បានផុស

១០ ខែ មុន

នៅ

ថ្ងៃចន្ទ ២៧ ឧសភា ២០២៤

ដោយ

Chheang

តុលាការខេត្ត Thanyaburi បានសម្រេចកាត់ទោសឲ្យសមាជិកសភាគណបក្សឆ្ពោះទៅមុខមួយរូបគឺអ្នកស្រី Chonthicha Jangrew ជាប់ពន្ធនាគាររយៈពេល២ឆ្នាំ ពីបទបរិហារកេរ្តិ៍ខ្សែរាជវង្ស តាមមាត្រ១១២នៃក្រមព្រហ្មទណ្ឌ។ នេះបើយោងតាមការចុះផ្សាយសារព័ត៌មាន Bangkok Post នៅថ្ងៃទី២៧ ខែឧសភា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃចន្ទនេះ តុលាការដំបូងឡើយកាត់ទោសអ្នកស្រី Chonthicha ជាប់ទោស៣ឆ្នាំ តែត្រូវបន្ថយមកត្រឹម២ឆ្នាំ ព្រោះតែការសហការល្អរបស់អ្នកស្រីនៅក្នុងតុលាការ។ យ៉ាងណាមិញ ទោសនេះមិនអាចព្យួរបាននោះទេ។ ចំពោះបណ្ដឹងចោទប្រកាន់មួយទៀត ដែលពាក់ព័ន្ធនឹងការប្រមូលផ្ដុំសាធារណៈដោយខុសច្បាប់របស់សមាជិកគណបក្សប្រឆាំងរូបនេះ ត្រូវបានលើកលែងទោស។

ដើមចមនៃទោសទណ្ឌរបស់អ្នកស្រី Chonthicha កើតចេញពីសន្ទរកថាមួយកាលពីឆ្នាំ២០២១កន្លងទៅ ដែលទាមទារឲ្យមានការដោះលែងអ្នកទោសនយោបាយទាំងអស់។ ផ្នែកមួយក្នុងសន្ទរកថារបស់អ្នកស្រី បានលើកឡើងពីក្ដីព្រួយបារម្ភអំពីរបបយោធារបស់លោក ប្រាយុទ្ធ ចាន់អូចា ដែលអាចនឹងកែប្រែច្បាប់ផ្ដល់អំណាចកាន់តែខ្លាំងឲ្យព្រះមហាក្សត្រថៃ Vajiralongkorn គ្រប់គ្រងទ្រព្យសម្បត្តិទាំងអស់នៃរាជវាំង។

តុលាការថៃ បានបញ្ជាក់ថា សម្ដីរបស់អ្នកស្រី Chonthicha អាចធ្វើឲ្យមហាជនភាន់ច្រឡំ ដោយយល់ថា ស្ដេច Vajiralongkorn អាចចំណាយលុយរដ្ឋដែលប្រជារាស្ត្រខំបង់ពន្ធ យកទៅប្រើលើរឿងបុគ្គល ក៏ដូចជាប្រើប្រាស់នូវអំណាចទ្រង់ជ្រៀតជ្រែកនៅក្នុងឆាកនយោបាយ។ ប្រការនេះអាចបំផ្លាញនូវព្រះកត្តិយសរបស់ព្រះមហាក្សត្រ។

ការធានាខ្លួនអ្នកស្រី Chonthicha មិនត្រូវបានអនុញ្ញាតឡើយ ហើយអ្នកស្រីត្រូវបានបញ្ជូនទៅកាន់ពន្ធនាគារតែម្ដងបន្ទាប់ពីក្ដីទោសរួច។ ចំណែកឯតំណែងក្នុងនាមជាសមាជិកសភារបស់អ្នកស្រីក៏ត្រូវបានដកចេញភ្លាមៗនោះដែរ។

សូមបញ្ជាក់ថា អ្នកស្រី Chonthicha គឺជាបុគ្គលម្នាក់ក្នុងចំណោមសមាជិកសភាបក្សប្រឆាំងចំនួន៣រូប ដែលត្រូវបានតុលាការចោទប្រកាន់ពីបទប្រមាថព្រះមហាក្សត្រ។ បណ្ដឹង២មុន មានដូចជា អ្នកស្រី Rukchanok Srinork និងលោក Piyarat “Toto” Jongthep។

អ្នកស្រី Rukchanok ត្រូវបានកាត់ទោសកាលពីខែធ្នូ ឆ្នាំ២០២៣ ឲ្យជាប់ពន្ធនាគារ៦ឆ្នាំ ពីបទប្រមាថព្រះមហាក្សត្រ និងឧក្រិដ្ឋកម្មកុំព្យូទ័រនៅលើបណ្ដាញសង្គមចំពោះការបញ្ចេញមតិរបស់អ្នកស្រីនៅចន្លោះថ្ងៃទី១៨ ខែកក្កដា ដល់ថ្ងៃទី៩ ខែសីហា ឆ្នាំ២០២១។ យ៉ាងណាមិញ បច្ចុប្បន្ន អ្នកស្រីត្រូវធានាឲ្យនៅក្រៅឃុំ ខណៈអ្នកស្រីបានធ្វើបណ្ដឹងឧទ្ធរណ៍។

ដោយឡែកចំពោះលោក Piyarat គឺបានជាប់បណ្ដឹងចំនួន៣ ក្រោមមាត្រា១១២ ដែលជាប់ពាក់ព័ន្ធនឹងសកម្មភាពរបស់លោកធ្វើជាមេដឹកនាំចលនាក្រុម WeVo ប្រឆាំងរដ្ឋាភិបាលក្នុងឆ្នាំ២០២០ និងឆ្នាំ២០២១៕

ដោយ៖ ឈាង

Related Topics:ប្រទេសថៃ