លោក Netanyahu ទទួលកំហុស ក្រោយទម្លាក់គ្រាប់លើជំរំជនភៀសខ្លួននៅ Rafah ស្លាប់មនុស្សរដូករណែល

នាយករដ្ឋមន្ត្រីអ៊ីស្រាអែលលោក Benjamin Netanyahu បានចេញមុខនិយាយថា ការវាយប្រហារសម្លាប់ជនភៀសខ្លួនប៉ាឡេស្ទីនរដូករណែល នៅក្នុងទីក្រុង Rafah កាលពីថ្ងៃអាទិត្យ គឺជា “កំហុសសោកនាដកម្ម” ហើយបានចេញបញ្ជាឲ្យបើកការស៊ើបអង្កេតជាបន្ទាន់ចំពោះករណីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC កាលពីថ្ងៃចន្ទទី២៧ខែឧសភា មនុស្សយ៉ាងតិច៤៥នាក់ ត្រូវបានសម្លាប់ ខណៈរាប់រយនាក់ទៀត បញ្ជូនទៅមន្ទីរពេទ្យព្យាបាលរបួសរលាកធ្ងន់ធ្ងរ ក្នុងការវាយប្រហារយ៉ាងសាហាវឃោរឃៅរបស់អ៊ីស្រាអែល លើជំរំជនភៀសខ្លួន។

ទន្ទឹមនោះ បើតាមសេចក្តីរាយការណ៍របស់ Reuters វិញ, ជាងពាក់កណ្តាលនៃអ្នកស្លាប់គឺជាស្ត្រី កុមារ និងមនុស្សចាស់ ហើយមន្ត្រីសុខាភិបាលក្នុងតំបន់ហ្គាហ្សា និយាយថា តួលេខអ្នកស្លាប់ ទំនងជាកើនឡើងបន្ថែម ព្រោះថានៅមានមនុស្សមួយចំនួនទៀត កំពុងរបួសធ្ងន់។

ថ្លែងក្នុងសភា លោក Netanyahu និយាយថា វាពិតជាមានសារៈសំខាន់បំផុតដែលអ៊ីស្រាអែល ត្រូវប្រុងប្រយ័ត្នគ្រប់បែបយ៉ាងតាមធ្វើទៅបាន ដើម្បីការពារជនស៊ីវិលដែលជាប់ក្នុងការប្រយុទ្ធប្រឆាំងក្រុមហាម៉ាសនៅតំបន់ហ្គាហ្សា។ ប៉ុន្តែលោកទទូចថា កងកម្លាំងការពារអ៊ីស្រាអែល (IDF) បានធ្វើអស់ពីសមត្ថភាពហើយ ដោយមិនចង់ឲ្យប៉ះពាល់ដល់មនុស្សស្លូតត្រង់ណាម្នាក់ទេ។

លោក Netanyahu បន្តថា “នៅទីក្រុង Rafah យើងបានជម្លៀសពលរដ្ឋប្រហែលមួយលាននាក់រួចមកហើយ ហើយថ្វីបើយើងខិតខំប្រឹងប្រែងអស់ពីសមត្ថភាព មិនចង់បង្កផលប៉ះពាល់ដល់អ្នកមិនមែនជាយុទ្ធជនក៏ពិតមែន ប៉ុន្តែរឿងអកុសលកើតឡើងទាល់តែបាន។ យើង​កំពុង​ស៊ើបអង្កេត​ឧបទ្ទវហេតុ​នេះ ហើយ​នឹង​ឈាន​ដល់​ការ​សន្និដ្ឋាន ព្រោះ​នេះ​ជា​គោលការណ៍​របស់​យើង”។

សូមបញ្ជាក់ថា អ៊ីស្រាអែល​បាន​បើក​ការ​វាយ​ប្រហារទី​ក្រុង Rafah កាល​ពី​ថ្ងៃ​អាទិត្យ​ពោលគឺត្រឹមតែ​ប៉ុន្មាន​ម៉ោងប៉ុណ្ណោះ ​បន្ទាប់​ពី​ក្រុមហាម៉ាស បាញ់មីស៊ីលលើ​ក្រុង Tel Aviv ដែលនោះគឺជាការបាញ់លើកដំបូងក្នុង​រយៈ​ពេល​ជា​ច្រើន​ខែមកនេះ។

មន្ត្រី IDF អះអាងថា ប្រតិបត្តិការនោះ បានសម្លាប់មេបញ្ជាការជាន់ខ្ពស់ក្រុមហាម៉ាស២នាក់ ប៉ុន្តែបើតាមការបញ្ជាក់ពីអឌ្ឍចន្ទក្រហមប៉ាឡេស្ទីន, ការវាយប្រហារតាមអាកាសនោះគឺសំដៅលើតង់របស់ជនភៀសខ្លួននៅជិតទីតាំងរបស់អង្គការសហប្រជាជាតិក្នុងតំបន់ Tal al-Sultan ចម្ងាយប្រហែល២គីឡូម៉ែត្រ ភាគពាយព្យទីក្រុង Rafah។

ការវាយប្រហារនោះទៀតសោត ត្រូវបានថ្កោលទោសដោយអង្គការនិងស្ថាប័នអន្តរជាតិជាច្រើន ជាពិសេសសហភាពអឺរ៉ុបតែម្តង ដែលទទូចសុំឲ្យអ៊ីស្រាអែល គោរពសេចក្តីសម្រេចរបស់តុលាការយុត្តិធម៌អន្តរជាតិ (ICJ) កាលពីសប្តាហ៍មុន ដែលបញ្ជាឲ្យបញ្ឈប់ការវាយប្រហារលើទីក្រុង Rafah ជាបន្ទាន់។

ទោះបីជាយ៉ាងណាក៏ដោយ គេមើលឃើញថា អ៊ីស្រាអែល​ មិនខ្វាយខ្វល់ឡើយ ហើយ ICJ ក៏គ្មានឥទ្ធិពលអ្វីឲ្យអ៊ីស្រាអែល គោរពតាមសេចក្តីសម្រេចរបស់ខ្លួនដែរ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ទម្លាក់គ្រាប់បែកចាស់ដៃ លើទីក្រុង Rafah មិនខ្វល់សម្តីអាមេរិក