សីតុណ្ហភាពនៅ ប៉ាគីស្ថាន ឡើងដល់ ៥២ អង្សាសេ

យោងតាមការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២៧ ខែឧសភានេះ សីតុណ្ហភាពនៅក្នុងខេត្ត Sindh ភាគខាងត្បូងប្រទេសប៉ាគីស្ថានបានកើនឡើងលើសពី ៥២ អង្សាសេ ហើយនេះជាការកើនឡើងកម្ដៅខ្ពស់បំផុតមិនធ្លាប់មានសម្រាប់រដូវក្ដៅនៅក្នុងប្រទេសមួយនេះ ។

យោងតាមក្រសួងឧតុនិយមប៉ាគីស្ថានបានឲ្យដឹងថា សីតុណ្ហភាពបានកើនឡើងនៅក្រុង Mohenjo Daro ក្នុងខេត្ត Sindh ហើយបានកើនឡើងខ្ពស់រហូតដល់ ៥២.២ អង្សាសេក្នុងរយៈពេល ២៤ ម៉ោងចុងក្រោយនេះ ។ ចំណែកសីតុណ្ហភាពខ្ពស់បំផុតដែលត្រូវបានកត់ត្រានៅក្នុងប្រទេសប៉ាគីស្ថានគឺក្នុងឆ្នាំ ២០១៧ ស្ថិតក្នុងខេត្ត Balochistan ដែលសីតុណ្ហភាពបានកើនឡើងដល់ ៥៤ អង្សារសេឯណោះ ។

យោងតាមការព្យាករណ៍ រលកកម្ដៅក៏នឹងថយចុះនៅផងដែរនៅក្នុងទីក្រុង Mohenjo Daro និងតំបន់ជុំវិញ ប៉ុន្តែរលកកម្ដៅនឹងវាយប្រហារតំបន់ផ្សេងទៀតនៅក្នុងខេត្ត Sindh រួមទាំងទីក្រុង Karachi ដែលជាទីក្រុងធំបំផុតរបស់ប្រទេសប៉ាគីស្ថាន ។

ប៉ាគីស្ថានគឺជាប្រទេសដែលងាយរងគ្រោះបំផុតទី ៥ ចំពោះផលប៉ះពាល់នៃការប្រែប្រួលអាកាសធាតុ ។ ខណៈក្រុមអ្នកវិទ្យាសាស្ត្រអន្តរជាតិបាននិយាយថា សីតុណ្ហភាពក្ដៅខ្លាំងនៅទូទាំងទ្វីបអាស៊ីក្នុងរយៈពេលមួយខែកន្លងមកនេះ ទំនងជាកាន់តែអាក្រក់ទៅៗ ដោយសារតែការប្រែប្រួលអាកាសធាតុដែលបង្កឡើងដោយមនុស្ស ។

គួរបញ្ជាក់ផងដែរថា រលកកម្ដៅនេះក៏បានធ្វើឲ្យប្រជាជនប៉ាគីស្ថានរាប់រយនាក់ប្រឈមនឹងបញ្ហាសុខភាព ដូចជាការប្រឈមនឹងជំងឺដាច់សរសៃរឈាមខួរក្បាលផងដែរ ដោយកាលពីថ្ងៃទី២៦ ខែឧសភា​កន្លងទៅ មានប្រជាជនប៉ាគីស្ថានជាច្រើននាក់បានសម្រាកព្យាបាលនៅមន្ទីពេទ្យ ដោយសារឥទ្ធិពលរលកកម្ដៅខ្លាំង ខណៈ​រដ្ឋាភិបាលក៏បានចាត់វិធានការជួយចែកចាយទឹក និងទឹកកកដល់ប្រជាជន និងសេវាសង្គ្រោះបន្ទាន់ផងដែរ ៕

អត្ថបទ៖ ប៊ុន សុភាព