ព័ត៌មានអន្ដរជាតិ

WHO សម្រេចមិនអញ្ជើញ តៃវ៉ាន់ ឲ្យចូលរួមសន្និបាតប្រចាំឆ្នាំ

បានផុស

៨ ខែ មុន

នៅ

ថ្ងៃអង្គារ ២៨ ឧសភា ២០២៤

ដោយ

Chheang

សន្និបាតប្រចាំឆ្នាំរបស់អង្គការសុខភាពពិភពលោក WHO នៅទីក្រុងហ្សឺណែវ ប្រទេសស្វីស នឹងមិនមានវត្តមានចូលរួមពីតៃវ៉ាន់នោះឡើយ ក្រោយបណ្ដាប្រទេសជាសមាជិកបាននាំគ្នាសម្រេចមិនធ្វើការអញ្ជើញរដ្ឋាភិបាលដែនកោះមួយនេះ តបតាមបំណងរបស់មហាយក្សចិន។ នេះបើយោងតាមការចុះផ្សាយដោយទីភ្នាក់ងារព័ត៌មាន Reuters កាលពីថ្ងៃទី២៧ ខែឧសភា ឆ្នាំ២០២៤។

សន្និបាតសុខភាពពិភពលោក ឆ្នាំ២០២៤ (រូបភាព៖ REUTERS)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អវត្តមានតៃវ៉ាន់នៅក្នុងសន្និបាតសុខភាពពិភពលោក (WHA) ក៏ព្រោះតែមានការជំទាស់ដាច់ណាត់ពីចិន ដែលតែងតែចាត់ទុកតៃវ៉ាន់ជាដែនអធិបតេយ្យភាពរបស់ខ្លួន។ តៃវ៉ាន់ធ្លាប់ចូលរួមសន្និបាតរបស់ WHO ក្នុងនាមជាអ្នកអង្កេតការណ៍ កាលពីឆ្នាំ២០០៩ ដល់ឆ្នាំ២០១៦ ក្រោមរដ្ឋបាលគ្រប់គ្រងដោយលោក Ma Ying-jeou។ អតីតប្រធានាធិបតីរូបនេះ ធ្លាប់បានចុះកិច្ចព្រមព្រៀងទេសចរណ៍ និងពាណិជ្ជកម្មម៉ាកសញ្ញា ជាមួយចិន។

យ៉ាងណាមិញ ចិនបានបិទការចូលរួមរបស់តៃវ៉ាន់ក្នុងសន្និបាត WHA ចាប់តាំងពីឆ្នាំ២០១៧ បន្ទាប់អាណត្តិប្រធានាធិបតីថ្មីរបស់តៃវ៉ាន់ ដែលមានលោកស្រី Tsai In-wen ជាមេដឹកនាំ។ លោកស្រីបានបដិសេធកិច្ចព្រមព្រៀងទាំងឡាយជាមួយចិន ហើយមិនទទួលស្គាល់ថា តៃវ៉ាន់គឺជាផ្នែកមួយរបស់ចិននោះទេ។

លោក Chen Xu តំណាងអចិន្ត្រៃយ៍របស់ចិននៅក្នុងអង្គការសហប្រជាជាតិក្រុងហ្សឺណែវ បាននិយាយថា គ្មានមូលដ្ឋាននយោបាយណាមួយឲ្យតៃវ៉ាន់ចូលរួមក្នុងសន្និបាតរបស់ WHO ទេ ហើយលោកបានចោទប្រកាន់តៃវ៉ាន់ថាមានបំណងធ្វើនយោបាយបាំងមុខដោយបញ្ហាសុខភាពពិភពលោក។

ជាការឆ្លើយតប លោក Chiu Tai-yuan រដ្ឋមន្ត្រីក្រសួងសុខាភិបាលតៃវ៉ាន់ បានលើកឡើងថា “ការចូលរួមពីតៃវ៉ាន់នៅក្នុង WHA និង WHO គឺពាក់ព័ន្ធនឹងបញ្ហាសុខភាព មិនមែនជានយោបាយឡើយ”។ លោកបន្ថែមថា ការរារាំងវត្តមានតៃវ៉ាន់នៅក្នុងសន្និបាតអន្តរជាតិមួយនេះ ប្រៀបបាននឹងការរារាំងកិច្ចខំប្រឹងប្រែងទប់ស្កាត់ជំងឺឆ្លងអ៊ីចឹងដែរ៕

ដោយ៖ ឈាង