ព័ត៌មានអន្ដរជាតិ

លោក គីម ជុងអ៊ុន ប្រដូច សមយុទ្ធកូរ៉េខាងត្បូងទៅនឹងការប្រលែងលេងជាមួយភ្លើង

បានផុស

៩ ខែ មុន

នៅ

ថ្ងៃពុធ ២៩ ឧសភា ២០២៤

ដោយ

Chheang

មេដឹកនាំក្រុងព្យុងយ៉ាង បានព្រមានចំៗថា កូរ៉េខាងត្បូងកំពុងប្រលែងលេងជាភ្លើង តាមរយៈការធ្វើសមយុទ្ធដែនអាកាសកាលពីពេលថ្មីៗកន្លងទៅ។ លោក គីម ជុងអ៊ុន ក៏បានធ្វើការថ្កោលទោសផងដែរចំពោះរដ្ឋាភិបាលក្រុងសេអ៊ូល ដែលបានរិះគន់ចំពោះការបាញ់បង្ហោះផ្កាយរណបចារកម្មយោធារបស់កូរ៉េខាងជើង កាលពីយប់ថ្ងៃចន្ទ ដើមសប្ដាហ៍នេះ។

លោក គីម ជុងអ៊ុន មេដឹកនាំកូរ៉េខាងជើង (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមកាសែតរដ្ឋកូរ៉េខាងជើង Rodong Sinmun បានឲ្យដឹងនៅថ្ងៃនេះថា ការព្រមាន និងថ្កោលទោសរបស់លោក គីម ជុងអ៊ុន ធ្វើឡើងក្នុងដំណើរទស្សនកិច្ចនៅមន្ទីរបណ្ឌិតសភាវិទ្យាសាស្ត្រការពារជាតិកូរ៉េខាងជើង នាឱកាសខួបលើកទី៦០ មួយថ្ងៃបន្ទាប់ពីយោធាកូរ៉េខាងត្បូង បានរៀបចំសមយុទ្ធដែនអាកាស ដោយមានយន្តហោះចម្បាំងចំនួន២០គ្រឿងចូលរួម កាលពីថ្ងៃចន្ទ ទី២៧ ខែឧសភា ឆ្នាំ២០២៤។

យន្តហោះចម្បាំងកូរ៉េខាងត្បូង F-4E (រូបភាព៖ Republic of Korea Air Force)

បុរសខ្លាំងនៅកូរ៉េខាងជើង បានថ្កោលទោសយោធាក្រុងសេអ៊ូល ចំពោះការបង្ហាញពីកម្លាំងរបស់ខ្លួនប្រឆាំងនឹងការបាញ់បង្ហោះផ្កាយរណបរបស់ក្រុងព្យុងយ៉ាង ហើយបានហៅទង្វើនេះជាការបង្កហេតុដ៏មានគ្រោះថ្នាក់ និងជាសកម្មភាពប្រលែងលេងជាមួយភ្លើង ដែលមិនអាចអត់ឱនឲ្យបាន។

មេដឹកនាំកូរ៉េខាងជើង ក៏បានលើកឡើងជាសាធារណៈដែរពាក់ព័ន្ធនឹងបរាជ័យនៃការបាញ់បង្ហោះផ្កាយរណបចារកម្មរបស់ខ្លួន។ លោក គីម ជុងអ៊ុន សង្កត់ធ្ងន់ថា ទោះជាមិនជោគជ័យក៏ដោយ តម្រូវការបង្ហោះផ្កាយរណបចារកម្មនៅតែជាភាពចាំបាច់ខ្វះមិនបាន ដើម្បីពង្រឹងការការពារជាតិ អធិបតេយ្យភាព ព្រមទាំងសន្តិសុខជាតិ ពីការគំរាមកំហែងដែលអាចបង្កឡើងដោយសកម្មភាព និងការបង្កហេតុដោយយោធាអាមេរិក៕

ដោយ៖ ឈាង

អានបន្ថែម៖ ផ្កាយរណបចារកម្មកូរ៉េខាងជើង បរាជ័យផ្ទុះឆេះភ្លាមៗក្រោយបាញ់បង្ហោះមិនបានប៉ុន្មាននាទី