ថៃនិងវៀតណាម សុទ្ធតែជួបគ្រោះរញ្ជួយដី

ត្រឹមប៉ុន្មានថ្ងៃប៉ុណ្ណោះ ប្រទេសក្បែរខាងកម្ពុជា គឺថៃនិងវៀតណាម សុទ្ធតែជួបគ្រោះរញ្ជួយដី ទោះយ៉ាងណា ការរញ្ជួយទាំងនោះ មិនមែនជាកម្រិតធ្ងន់ធ្ងរអ្វីទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងយើងទៅមើលប្រទេសថៃ, តាមការចុះផ្សាយរបស់ Bangkok Post, គ្រោះរញ្ជួយដីកម្រិត ២.៤រ៉ិចទ័រ ជាមួយនឹងជម្រៅ ៤គីឡូម៉ែត្រ បានវាយប្រហារកោះ Samui នាវេលាម៉ោង ៨.២៤នាទីព្រឹកថ្ងៃព្រហស្បតិ៍ទី៣០ខែឧសភា។

លោក Jirawat Kamchadphai អ្នក​ឧតុនិយម​ នៅមន្ទីរ​អង្កេត​គ្រោះរញ្ជួយ​ដីថៃ ​បាន​និយាយ​ថា ការ​រញ្ជួយ​​ ​បាន​កើត​ឡើង​នៅតំបន់ Ang Thong ភាគ​ខាងលិច​កោះនេះ ហើយវាគឺជាការរញ្ជួយលើកដំបូង ដែលមន្ទីរជួបប្រទះក្នុងឈូងសមុទ្រថៃ។

ទោះបីជាយ៉ាងណាក៏ដោយ ដោយសារតែកម្រិតរញ្ជួយស្រាល វាមិនបង្កផលប៉ះពាល់អ្វីទេ ហើយក៏មិនបណ្តាលឲ្យនរណាម្នាក់ រងរបួសដែរ។

ចំណែកនៅប្រទេសវៀតណាមឯណោះវិញ កាលពីថ្ងៃចន្ទទី២៧ខែឧសភា កាសែត Tuoi Tre ​បានចុះផ្សាយថា គ្រោះរញ្ជួយដីកម្រិត ៣.៤រ៉ិចទ័រ ជាមួយជម្រៅ ១៧គីឡូម៉ែត្រ បានធ្វើឲ្យរង្គើស្រុក Nho Quan នៃខេត្ត Ninh Binh ភាគខាងជើងប្រទេសវៀតណាម នាម៉ោង ៩:២៧នាទី។

យោងតាមវិទ្យាស្ថានភូគព្ភសាស្ត្រ, ការរញ្ជួយដីនេះ មិនមានហានិភ័យ​ បង្កជាគ្រោះមហន្តរាយអ្វីឡើយ ប៉ុន្តែមន្ត្រីជំនាញ​នៅ​តែបន្ត​តាម​ដាន​យ៉ាង​ដិត​ដល់​ចំពោះ​បាតុភូត​នេះ។

សូមបញ្ជាក់ថា នេះមិនមែនទើបលើកដំបូងទេដែលខេត្ត Ninh Binh រងគ្រោះដោយការរញ្ជួយដី។ ជាក់ស្តែងកាលពីឆ្នាំ២០០៥ ខេត្តនេះក៏ជួបគ្រោះរញ្ជួយដីដែរ ដែលកាលនោះមានកម្រិត ៣.១រ៉ិចទ័រ៕

អត្ថបទ៖ សុខ សុវណ្ណ

ចុចអាន៖ ទីក្រុង New York ជួបគ្រោះរញ្ជួយដីដ៏កម្រ បង្កការភិតភ័យ