បាងកក ត្រៀមយកពន្ធ ពីអ្នកលក់ដូរតាមចិញ្ចើមផ្លូវ

ជា​វិធានការ​ទប់​ស្កាត់​អាជីវករ​លក់​ដូរ​តាមចិញ្ចើម​ផ្លូវ អភិបាលក្រុងបាងកកលោក Chadchart Sittipunt បានប្រកាសបន្ទាប់ពីកិច្ចប្រជុំស្តីពីសណ្តាប់ធ្នាប់ទីក្រុងកាលពីថ្ងៃព្រហស្បតិ៍ទី៣០ខែឧសភាថា សាលាក្រុងនឹង​ពិនិត្យ​ប្រាក់​ចំណូល និងយក​ពន្ធពីអ្នកលក់ដូរតាមចិញ្ចើមផ្លូវ ហើយប្រហែលជានឹងបញ្ចប់ការលក់ដូរតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីប្រកាសនិងរាយការណ៍ដោយកាសែត Bangkok Post, បទ​ប្បញ្ញត្តិ​គ្រប់គ្រង​ការ​លក់ដូរ​នៅ​តាម​ដងផ្លូវ និង​កន្លែង​សាធារណៈ​ផ្សេង​ទៀត នឹង​ត្រូវ​អនុវត្ត​ក្នុង​ពេល​ឆាប់​ៗ​នេះ។

សាលា​ក្រុង នឹង​តម្រូវឲ្យ​អាជីវករ​ដែល​កំពុងលក់នៅតាមទី​សាធារណៈ ត្រូវ​ទៅបង់​ពន្ធ​តាម​ការ​អនុវត្ត ហើយបើទោះបីជាប្រាក់ចំណូលរបស់ពួកគេ មិនទាន់ឈានដល់កម្រិតដែលតម្រូវឲ្យបង់ពន្ធក៏ពិតមែន ប៉ុន្តែអ្នកលក់ក៏គួរតែចុះឈ្មោះក្នុងប្រព័ន្ធទិន្នន័យចំណូលជាតិ និងពន្ធដារដែរ។

លោក Chadchart ពន្យល់ថា អាជីវករណាលក់ដូរនៅទីសាធារណៈ បានរយៈពេលមួយឆ្នាំដូចដែលអនុញ្ញាត ហើយរកប្រាក់ចំណូលពីការលក់បានលើសពី ៧០០ដុល្លារក្នុងមួយខែ, ឥឡូវនេះត្រូវតែជួលកន្លែងនោះ ដើម្បីបន្តការលក់ដូរ។

លើសពីនេះ កន្លែងជួលត្រូវធានាថា អាជីវករជួយរក្សាសណ្តាប់ធ្នាប់និងរក្សាបរិស្ថានឲ្យស្អាត បើមិនដូច្នោះទេ អាជ្ញាធរក្រុង នឹងបិទឈប់ឲ្យលក់តែម្តង។

ទោះបីជាយ៉ាងណាក៏ដោយ លោក​ថា វិធានការ​នេះ ​នឹង​ត្រូវ​ដាក់​ឲ្យ​មានការជជែកគ្នា​ជា​សាធារណៈសិន ហើយអាច​កែប្រែចំណុចខ្លះ ​បើសិន​ចាំបាច់​ មុន​នឹងអនុវត្តជាផ្លូវការ។ លើសពីនេះ សាលា​ក្រុង ធានា​នឹង​ស្វែងរក​កិច្ចសហការ​ពីអាជីវកម្មនានា ​ដើម្បី​ផ្តល់​កន្លែងកន្លែងជួលថោកៗ ជូនអាជីវករ ហើយសាធារណជនក៏មិនភ័យថា ចំណីអាហារឡើងថ្លៃដែរ។

សូមបញ្ជាក់ថា ចាប់តាំងពីដើមឆ្នាំនេះមក ទីក្រុងបាងកក ដាក់ចេញវិធានការសម្អាតចិញ្ចើមផ្លូវ និងគ្រប់គ្រងអ្នកលក់តាមដងផ្លូវ ​ដើម្បីផ្តល់ភាពងាយស្រួលដល់អ្នកដើរ និង​ធានា​អនាម័យ​នៃ​អាហារ​តាម​ផ្លូវ៕

អត្ថបទ៖ សុខ សុវណ្ណ

ចុចអាន៖ សង្ក្រាន្តនៅបាងកក បន្សល់សំរាម ជាង ៥ម៉ឺនតោន