ប្រមុខណាតូស្វែងរកប្រាក់ជាង ៤០ ពាន់លានដុល្លារក្នុងមួយឆ្នាំៗជួយដល់ អ៊ុយក្រែន

ប្រធានអង្គការណាតូលោក Jens Stoltenberg នឹងស្នើឲ្យសម្ព័ន្ធមិត្តសន្យាផ្តល់ប្រាក់ប្រមាណ ៤៣.៣៧ ពាន់លានដុល្លារជារៀងរាល់ឆ្នាំ ដើម្បីផ្តល់ជំនួយផ្នែកយោធាដល់អ៊ុយក្រែន ខណៈដែលរដ្ឋមន្ត្រីការបរទេសណាតូបានប្រមូលផ្តុំគ្នាធ្វើកិច្ចពិភាក្សានៅទីក្រុងប្រាកនៃ​សាធារណរដ្ឋឆេក ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី៣១​ ខែឧសភានេះ ។

ដោយសារតែភាពមិនច្បាស់លាស់អំពីអនាគតនៃការគាំទ្ររបស់សហរដ្ឋអាមេរិកចំពោះអ៊ុយក្រែន ប្រសិនបើកលោក Donald Trump ជាប់ឆ្នោតសាជាថ្មីនោះ រដ្ឋមន្ត្រីការបរទេសប្រទេសសមាជិកណាតូនៅថ្ងៃសុក្រនេះ នឹងពិភាក្សាអំពីវិធីផ្ដល់ជំនួយយោធារយៈពេលវែង និងកាន់តែរឹងមាំបន្ថែមទៀតដល់អ៊ុយក្រែន ។ កិច្ចពិភាក្សានេះធ្វើយ៉ាងណាឲ្យក្រុមប្រទេសសម្ព័ន្ធមិត្តបរិច្ចាគថវិការយ៉ាងហោចណាស់ ៤៣.៣៧ ពាន់លានដុល្លារជារៀរាល់ឆ្នាំដល់អ៊ុយក្រែន ។

យ៉ាងណា ណាតូក៏នឹងត្រូវជម្នះការបដិសេធពីសំណាក់នាយករដ្ឋមន្ត្រីហុងគ្រីលោក Viktor Orban ផងដែរ បន្ទាប់ពីលោកបានបញ្ជាក់យ៉ាងច្បាស់ថា ប្រទេសរបស់លោកនឹងមិនចូលរួមក្នុងកិច្ចខិតខំប្រឹងប្រែងថ្មីនេះទេ ដោយលើកហេតុផលថា នឹងនាំសម្ព័ន្ធភាពខិតទៅជិតសង្គ្រាមមហន្តរាយជាមួយរុស្ស៊ី ។

ទន្ទឹមនោះ វិមានក្រឹមឡាំងបានលើកឡើងថា សហរដ្ឋអាមេរិក អង្គការណាតូ និងបណ្តាប្រទេសអឺរ៉ុបមួយចំនួនកំពុងលើកទឹកចិត្តអ៊ុយក្រែនឲ្យបន្តនូវសង្គ្រាមដែលគ្មានថ្ងៃឈ្នះរបស់ទីក្រុងកៀវជាមួយរុស្ស៊ី ហើយចោទប្រកាន់ពួកគេថាបានបង្កើនភាពតានតឹងក្នុងប៉ុន្មានសប្តាហ៍ថ្មីៗនេះថែមទៀត ។

បើទោះបីជាមានកិច្ចខិតខំប្រឹងប្រែងជួយដលទីក្រុងកៀវក៏ដោយ ក៏ប្រធានាធិបតីអ៊ុយក្រែនលោក Volodymyr Zelensky បាននិយាយម្តងហើយម្តងទៀតថា សម្ព័ន្ធមិត្តលោកខាងលិចចំណាយពេលយូរពេកក្នុងការសម្រេចចិត្តផ្ដល់ការគាំទ្រផ្នែកយោធាដល់អ៊ុយក្រែន ៕

អត្ថបទ៖ ប៊ុន សុភាព