ព័ត៌មានអន្ដរជាតិ

កូរ៉េខាងជើង បាញ់មីស៊ីលខ្នាតយក្ស១៨គ្រាប់ ទុកជាការព្រមានដល់ក្រុងសេអ៊ូល

បានផុស

៩ ខែ មុន

នៅ

ថ្ងៃសុក្រ ៣១ ឧសភា ២០២៤

ដោយ

Chheang

កូរ៉េខាងជើង បាននិយាយថា កាលពីថ្ងៃទី៣០ ខែឧសភាកន្លងទៅ ខ្លួនបានបាញ់មីស៊ីលរយៈចម្ងាយខ្លីចំនួន១៨គ្រាប់ កំឡុងសមយុទ្ធបង្ការទុកមុនសម្រាប់វាយប្រហារប្រឆាំងនឹង “របបក្មេងទំនើង” របស់រដ្ឋាភិបាលក្រុងសេអ៊ូល។ បើតាមការរាយការណ៍របស់សារព័ត៌មានរដ្ឋកូរ៉េខាងជើង KCNA បានឲ្យដឹងថា មីស៊ីលដែលបាញ់ទាំងនោះ ជាប្រភេទគ្រាប់ខ្នាតយក្សទំហំដល់ ៦០០មិល្លិម៉ែត្រឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះផ្សាយរបស់សារព័ត៌មាន KCNA នៅថ្ងៃទី៣១ឧសភានេះ ធ្វើឡើងបន្ទាប់ពីកូរ៉េខាងត្បូងបានកត់សម្គាល់ឃើញថាមានមីស៊ីលចម្ងាយខ្លីចំនួន១០គ្រាប់ ត្រូវបានបាញ់ចេញពីកូរ៉េខាងជើងចូលក្នុងដែនសមុទ្រភាគខាងកើតក្រុងសេអ៊ូល។ កូរ៉េខាងត្បូង បានហៅការបាញ់នេះថា ជាការតាំងបង្ហាញឲ្យរុស្ស៊ីមើល មុននឹងធ្វើការជួញដូរ។

KCNA បានឲ្យដឹងទៀតថា មីស៊ីលដែលបាញ់ ជាប្រភេទមីស៊ីល KN-25s ហើយបានដាក់គោលដៅបាញ់ឲ្យចំកោះមួយកន្លែងស្ថិតនៅចម្ងាយប្រមាណ ៣៦៥គីឡូម៉ែត្រ ពីទីតាំងដែលលោក គីម ជុងអ៊ុន មេដឹកនាំកូរ៉េខាងជើង ឈរទស្សនា។

ពាក់ព័ន្ធនឹងការប្រើប្រាស់បច្ចេកវិទ្យាមីស៊ីលប៉ាលិស្ទិករបស់កូរ៉េខាងជើងលើកនេះ ក្រសួងការបរទេសសហរដ្ឋអាមេរិកបានធ្វើការថ្កោលទោស ដោយថាវាជាទង្វើពុំមានប្រយោជន៍ និងបំពានសេចក្ដីសម្រេចរបស់ក្រុមប្រឹក្សាសន្ដិសុខអង្គការសហប្រជាជាតិ។

សូមបញ្ជាក់ថា ក្រុងព្យុងយ៉ាង បានតេស្តបាញ់សាកល្បងគ្រាប់មីស៊ីលខ្នាតយក្សជាលើកដំបូង នៅក្នុងឆ្នាំ២០១៩ ហើយលោក គីម ជុងអ៊ុន ធ្លាប់អះអាងថា មីស៊ីលប្រភេទនេះអាចបំពាក់នូវអាវុធនុយក្លេអ៊ែរបានផងដែរ៕

ដោយ៖ ឈាង