កុំខកខាន! កម្ពុជា អាចមើលឃើញព្រឹត្តិការណ៍តារាសាស្រ្តដ៏កម្រ ដោយភ្នែកទទេ ដើមខែនេះ

តាមការចុះផ្សាយរបស់ Daily Mail, នៅថ្ងៃទី៣និងទី៤ ដើមសប្តាហ៍នេះ ពិភពលោកនឹងកើតមានព្រឹត្តិការណ៍តារាសាស្រ្តដ៏ពិសេសនិងកម្រមួយ នោះគឺភពចំនួន៦ តម្រៀបជួរគ្នា ហើយទិដ្ឋភាពនេះ អាចមើលឃើញទូទាំងពិភពលោកតែម្តង ទាំងកម្ពុជាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភពទាំងនោះមានដូចជា ភពពុធ, ភពអង្គារ, ភពព្រហស្បតិ៍, ភពសៅរ៍, ភពអ៊ុយរ៉ានុស និងណិបទូន។ ទោះបីជាយ៉ាងណាក៏ដោយ មិនមែភពទាំងអស់សុទ្ធតែត្រូវបានឃើញដោយភ្នែកទទេនោះទេ ពោលគឺមានតែភពពុធ, ភពអង្គារ, ភពព្រហស្បតិ៍ និងភពសៅរ៍ប៉ុណ្ណោះ ដែលអាចមើលឃើញដោយភ្នែកទទេបាន ខណៈភពផ្សេងទៀតត្រូវប្រើតេឡេស្កុប ទើបមើលឃើញ។

បើរាប់តាមលំដាប់លំដោយ ភពដែលរះខ្ពស់ជាងគេគឺភពសៅរ៍ បន្ទាប់មកគឺភពណិបទូន ភពអង្គារ ភពអ៊ុយរ៉ានុស និងភពពុធ ចំណែកភពនៅទាបជាងគេជាប់ជើងមេឃគឺភពព្រហស្បតិ៍។ 

យោងតាមអង្គការ ណាសា, ព្រឹត្តិការណ៍នេះកើតឡើង នៅពេលភពទាំងឡាយធ្វើដំណើរឆ្លងកាត់ផែនដី តាមគន្លងដូចសូរ្យគ្រាស ដូច្នេះវាមើលទៅភពទាំងនោះហាក់ដូចជាត្រូវបានគេតម្រៀបជាជួរ។ យ៉ាងណា បាតុភូតនេះមានរយៈពេលខ្លីប៉ុណ្ណោះ ដោយសារភពនីមួយៗផ្លាស់ទីក្នុងល្បឿនខុសៗគ្នា អាស្រ័យលើចម្ងាយរបស់វាពីព្រះអាទិត្យ។

ជាធម្មតា ព្រឹត្តិការណ៍ភពតម្រៀបជួរគ្នា៣ទៅ៤ភព កើតឡើងច្រើនដងគួរសមដែរក្នុងមួយឆ្នាំៗប៉ុន្តែបាតុភូតភពដល់ទៅ៦តម្រៀបជួរគ្នាបែបនេះ គឺកម្រមានណាស់។

សូមជម្រាបថា ព្រឹត្តិការណ៍ថ្ងៃ ៣-៤ខែមិថុនានេះ ប្រជាជនកម្ពុជា ក៏អាចមើលឃើញដោយភ្នែកទទេដែរ ហើយពេលវេលាល្អបំផុតសម្រាប់ទស្សនាបាតុភូតនេះ គឺនៅម៉ោងប្រហែល ៤:៣០នាទីព្រឹក ពោលគឺមុនពេលព្រះអាទិត្យរះ៕

អត្ថបទ៖ សុខ សុវណ្ណ