ព័ត៌មានអន្ដរជាតិ

ម៉ាល់ឌីវ ត្រៀមហាមឃាត់អ្នកកាន់លិខិតឆ្លងដែនអ៊ីស្រាអ៊ែល មិនឲ្យចូលដែនកោះរបស់ខ្លួន

បានផុស

៧ ខែ មុន

នៅ

ថ្ងៃចន្ទ ៣ មិថុនា ២០២៤

ដោយ

Chheang

រដ្ឋាភិបាលម៉ាល់ឌីវ នឹងធ្វើការហាមឃាត់ជនជាតិអ៊ីស្រាអ៊ែលមិនឲ្យចូលប្រជុំកោះមហាសមុទ្រឥណ្ឌារបស់ខ្លួន ដែលល្បីល្បាញខាងមានឆ្នេរខ្សាច់ស និងរមណីយដ្ឋានប្រណិតៗ ខណៈដែលកំហឹងសាធារណៈនៅក្នុងប្រទេស ជាពិសេសជនជាតិឥស្លាម បានកើនឡើងលើសលុប ចំពោះសង្គ្រាមនៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន Aljazeera កាលពីថ្ងៃទី២ ខែមិថុនាកន្លងទៅ បានឲ្យដឹងថា លោក Mohamed Muizzu ប្រធានាធិបតីម៉ាល់ឌីវ បានសម្រេចចិត្តដាក់បម្រាមលើលិខិតឆ្លងដែនអ៊ីស្រាអ៊ែលហើយ តែសេចក្ដីលម្អិតដែលថានៅពេលណាច្បាប់នេះនឹងចូលជាធរមាននៅពុំទាន់ដឹងច្បាស់នៅឡើយទេ។ ច្បាប់ថ្មីនេះ ធ្វើឡើងក្រោយមានការដាក់សម្ពាធពីសមាជិករដ្ឋាភិបាលរបស់លោក Muizzu ព្រមទាំងគណបក្សប្រឆាំង ឲ្យហាមឃាត់អ៊ីស្រាអ៊ែល សម្រាប់បង្ហាញជាសញ្ញាតវ៉ានឹងសង្គ្រាមកំពុងកើតឡើងនៅតំបន់ហ្គាហ្សា ដែលបានឆក់យកជីវិតជនជាតិប៉ាឡេស្ទីនយ៉ាងហោចណាស់ ៣៦ ៤៣៩នាក់ និង ៨២ ៦២៧នាក់រងរបួស គិតចាប់តាំងពីជម្លោះថ្ងៃទី៧ ខែតុលា ឆ្នាំ២០២៣។

បន្ថែមពីលើការត្រៀមអនុម័តច្បាប់ថ្មី លោក Muizzu ក៏បានប្រកាសពីយុទ្ធនាការរៃអង្គាសប្រាក់ជាតិមួយហៅថា “Maldivians in Solidarity with Palestine” ផងដែរ។

លោក Mohamed Muizzu ប្រធានាធិបតីម៉ាល់ឌីវ (រូបភាព៖ AP)

ជាការឆ្លើយតបនឹងការហាមប្រាមនេះ អ្នកនាំពាក្យក្រសួងការបរទេសអ៊ីស្រាអ៊ែល បានជំរុញឲ្យពលរដ្ឋរបស់ខ្លួនដែលបច្ចុប្បន្នកំពុងនៅក្នុងប្រទេសម៉ាល់ឌីវ ឲ្យចាកចេញ។ ក្នុងសេចក្ដីប្រកាស បានរៀបរាប់ថា “សម្រាប់ពលរដ្ឋអ៊ីស្រាអ៊ែលនៅក្នុងប្រទេស (ម៉ាល់ឌីវ) សូមពិចារណាធ្វើការចាកចេញ ពីព្រោះបើសិនពួកគេធ្លាក់ចូលក្នុងគ្រោះថ្នាក់ដោយហេតុផលណាមួយ នោះវានឹងពិបាកសម្រាប់យើងនៅក្នុងការជួយ”។

សូមរំឭកថា ម៉ាល់ឌីវធ្លាប់បានដកបម្រាមពីមុនលើអ្នកទេសចរអ៊ីស្រាអ៊ែលម្ដងរួចហើយកាលពីអំឡុងទសវត្សឆ្នាំ១៩៩០ ហើយបានចាប់ផ្ដើមស្ដារទំនាក់ទំនងឡើងវិញនៅក្នុងឆ្នាំ២០១០។ យ៉ាងណាមិញ បំណងចង់ផ្សះផ្សាចំណងការទូតរវាងប្រទេសទាំង២ ត្រូវបានបង្អាក់ ក្រោយការផ្ដួលរំលំប្រធានាធិបតីម៉ាល់ឌីវ លោក Mohamed Nasheed កាលពីខែកុម្ភៈ ឆ្នាំ២០១២។

សូមបញ្ជាក់ថា ក្រៅតែពីម៉ាល់ឌីវ អ្នកកាន់លិខិតឆ្លងដែនអ៊ីស្រាអ៊ែល ក៏ត្រូវបានប្រទេសមួយចំនួនទៀតដាក់បម្រាមផងដែរ មានដូចជា អាល់ហ្សេរី បង់ក្លាដែស ព្រុយណេ អ៊ីរ៉ង់ អ៊ីរ៉ាក់ គុយវ៉ែត លីបង់ លីប៊ី ប៉ាគីស្ថាន អារ៉ាប៊ីសាអូឌីត ស៊ីរី និងយេម៉ែន៕

ដោយ៖ ឈាង