អេហ្ស៊ីប ទាមទារឲ្យ អ៊ីស្រាអែល ដកខ្លួនចេញពីច្រកឆ្លងកាត់ទីក្រុង Rafah

បន្ទាប់ពីមន្ត្រីមកពីសហរដ្ឋអាមេរិក អ៊ីស្រាអែល និងអេហ្ស៊ីបបានបញ្ចប់កិច្ចប្រជុំនៅទីក្រុងគែរកាលពីថ្ងៃអាទិត្យរួចហើយ អេហ្ស៊ីបបានប្រកាន់ជំហរឲ្យអ៊ីស្រាអែលត្រូវតែដកទ័ពចេញពីច្រកឆ្លងកាត់ទីក្រុង Rafah ដើម្បីបើកផ្លូវឆ្លងកាត់ឡើងវិញ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី៣ ខែ​មិថុនា ។

យោងតាមប្រភពពីអេហ្ស៊ីបបានឲ្យដឹងថា កិច្ចប្រជុំកាលពីថ្ងៃអាទិត្យបង្ហាញសញ្ញាវិជ្ជមាន បើទោះបីជាមិនមានកិច្ចព្រមព្រៀងស្តីពីការបើកច្រកឆ្លងកាត់ឡើងវិញក៏ដោយ ។ គណៈប្រតិភូអេហ្ស៊ីបនៅក្នុងកិច្ចប្រជុំបាននិយាយថា អេហ្ស៊ីបនឹងបើកចំហសម្រាប់អ្នកឃ្លាំមើលអឺរ៉ុបនៅព្រំដែន ដើម្បីត្រួតពិនិត្យប្រតិបត្តិការរបស់ខ្លួន ប្រសិនបើអាជ្ញាធរប៉ាឡេស្ទីនយល់ព្រមបន្តការងារនេះ ខណៈមន្ត្រីអ៊ីស្រាអែល និងសហរដ្ឋអាមេរិកថានឹងធ្វើការយ៉ាងឆាប់រហ័សដើម្បីជម្នះឧបសគ្គចំពោះប្រតិបត្តិការនៃផ្លូវឆ្លងកាត់នេះ ។

គួរបញ្ជាក់ថា អ៊ីស្រាអែលបានកាន់កាប់ច្រកឆ្លងកាត់ចូលតំបន់ហ្គាហ្សាដែលជាប់ព្រំដែនជាមួយអេហ្ស៊ីប ក្នុងអំឡុងពេលវាយលុកទីក្រុង Rafah កាលពីខែឧសភាតាមបណ្តោយជ្រោយខាងត្បូងនៃតំបន់នេះ ដោយធ្វើឲ្យអេហ្ស៊ីបខឹងសម្បារ និងបញ្ឈប់កិច្ចសហប្រតិបត្តិការជាមួយអ៊ីស្រាអែល ហើយភាព​តានតឹង​បាន​កើនឡើង​រវាង​អេហ្ស៊ីប និង​អ៊ីស្រាអែល​ជុំវិញ​ការ​ដណ្តើម​យក​ព្រំដែន​ភាគ​ខាង​ត្បូងនេះ ។

យ៉ាងណាអេហ្ស៊ីបក៏បានជួយសម្រួលដល់ច្រកចូលនៃជំនួយតាមរយៈច្រក Kerem Shalom កាលពីសប្តាហ៍មុន ផងដែរ ក្នុងការបើកផ្លូវឡើងវិញចូលទីក្រុង Rafah ខណៈដែលភ្នាក់ងារមនុស្សធម៌បានព្រមានពីគ្រោះទុរ្ភិក្សនៅក្នុងតំបន់ហ្គាហ្សា ៕

អត្ថបទ៖ ប៊ុន សុភាព