ត្រឹម៣ថ្ងៃ រលកកម្តៅកាចសាហាវ ផ្តាច់ជីវិតមនុស្ស ជាង ៥០នាក់ នៅឥណ្ឌា

តាមសេចក្តីរាយការណ៍របស់ BBC នៅថ្ងៃចន្ទទី៣ខែមិថុនា, ត្រឹមរយៈពេល៣ថ្ងៃប៉ុណ្ណោះ រលកកម្តៅដ៏កាចសាហាវ បានផ្តាច់ជីវិតមនុស្សជាង៥០នាក់ នៅក្នុងប្រទេសឥណ្ឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធបញ្ហានេះ មន្ត្រីម្នាក់បានប្រាប់ទីភ្នាក់ងារសារព័ត៌មាន ANI ថា មានមនុស្សដល់ទៅ៣៣នាក់ឯណោះ ដែលត្រូវបាត់បង់ជីវិតនៅរដ្ឋ Uttar Pradesh កាលពីចុងសប្តាហ៍ ចំណែកប្រហែល២០នាក់ទៀត ត្រូវកម្តៅផ្តាច់សង្ខារនៅរដ្ឋ Odisha។

ទោះបីជាយ៉ាងណាក៏ដោយ បើរាប់ចាប់ពីថ្ងៃទី១ខែមីនាដល់ពេលនេះ តួលេខមនុស្សស្លាប់ ​បានឡើងដល់ជាង១០០នាក់ទៅហើយ ខណៈក្រសួងសុខាភិបាលបញ្ជាក់ថា ក្នុងអំឡុងពេលនោះដែរ ករណីជំងឺ Heat Stroke មានដល់ទៅជាង ២៤ ៨៤៩ករណីឯណោះ។

យ៉ាងណាក្តី បើយោងតាមការលើកឡើងពីមន្ត្រីមូលដ្ឋាន តួលេខក្រៅផ្លូវការប្រហែលជាខ្ពស់ជាងនេះឆ្ងាយណាស់ ព្រោះមានអ្នកខ្លះអាចមិនរាយការណ៍អំពីមនុស្សស្លាប់។

សូមបញ្ជាក់ថា កម្តៅនៅភាគខាងជើងនិងកណ្តាលប្រទេសឥណ្ឌា ព្រមទាំងផ្នែកខ្លះនៃភាគខាងលិច បានឈានដល់ចំណុចកំពូល ក្នុងរយៈពេលពីរសប្តាហ៍កន្លងមកនេះ ពោលគឺសីតុណ្ហភាពឡើងដល់ ៤៥ ទៅ ៤៦អង្សាសេ ខណៈតំបន់ខ្លះហក់ដល់ជាង ៥៣ អង្សាសេឯណោះ។

ក្រៅពីកម្តៅ តំបន់មួយចំនួនក៏កំពុងជួបប្រទះបញ្ហាដាក់ភ្លើងដាច់ទឹក ដោយសារតែប្រជាជនសម្រុកប្រើប្រាស់ថាមពលកាន់តែច្រើន ប៉ុន្តែនាយកដ្ឋានអាកាសធាតុឥណ្ឌា ប្រកាសថា សីតុណ្ហភាពទំនងជានឹងធ្លាក់ចុះនៅប៉ុន្មានថ្ងៃខាងមុខ ព្រោះរដូវមូសុងចូលមកដល់ នាំឲ្យប្រជាជនធូរស្បើយខ្លះ៕

អត្ថបទ៖ សុខ សុវណ្ណ

ចុចអាន៖ រលកកម្ដៅនៅ ឥណ្ឌា សម្លាប់មនុស្ស ៤៦ នាក់ ក្នុងនោះក៏មានមន្ត្រីរៀបចំការបោះឆ្នោត