សេតវិមានបញ្ជាក់មូលហេតុ លោក បៃដិន មិនទៅចូលរួមកិច្ចប្រជុំសន្តិភាពអ៊ុយក្រែន នៅ ស្វីស

សេតវិមានបញ្ជាក់ថា លោកប្រធានាធិបតី ចូ បៃដិន នឹងមិនចូលរួមកិច្ចប្រជុំសន្តិភាពអ៊ុយក្រែន នៅប្រទេសស្វីសទេ ប៉ុន្តែនឹងបញ្ជូនអនុប្រធានាធិបតី Kamala Harris និងទីប្រឹក្សាសន្តិសុខជាតិ Jake Sullivan ទៅជំនួសវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Kirsten Allen អ្នកនាំពាក្យអនុប្រធានាធិបតីអាមេរិក បានប្រកាសកាលពីថ្ងៃចន្ទទី៣ខែមិថុនាថា លោកស្រី Harris និងលោក Sullivan នឹងធ្វើដំណើរទៅកាន់ទីក្រុង Lucerne នៃប្រទេសស្វីសនៅថ្ងៃទី ១៥ខែមិថុនា ដើម្បីចូលរួមក្នុងកិច្ចប្រជុំកំពូល សន្តិភាពអ៊ុយក្រែន។ វត្តមានរបស់លោកស្រី Harris គឺបញ្ជាក់ពីការប្តេជ្ញាចិត្តរបស់រដ្ឋបាលទីក្រុងវ៉ាស៊ីនតោន ដើម្បីគាំទ្រដល់កិច្ចខិតខំប្រឹងប្រែងរបស់អ៊ុយក្រែន ក្នុងការធានាបាននូវសន្តិភាពដ៏ត្រឹមត្រូវ និងយូរអង្វែង។

ស្របពេលជាមួយគ្នានោះដែរ បើតាមការបញ្ជាក់ពីសេតវិមាន, ចំពោះមូលហេតុដែលលោក បៃដិន អវត្តមានគឺ ដោយសារលោករវល់ទៅចូលរួមកម្មវិធីរៃអង្គាសថវិកានៅទីក្រុង Los Angeles ដែលរៀបចំដោយតារាសម្តែង George Clooney និង Julia Roberts។

សូមបញ្ជាក់ថា លោក ហ្សេលេនស្គី បានជំរុញមេដឹកនាំពិភពលោកឲ្យចូលរួមក្នុងកិច្ចប្រជុំសន្តិភាព ប៉ុន្តែចោទរុស្សីថា ព្យាយាមបំផ្លាញជំនួបកំពូលនេះ។

ប្រទេសស្វីសនឹងធ្វើជាម្ចាស់ផ្ទះនៃកិច្ចប្រជុំកំពូលថ្ងៃទី១៥-១៦ខែមិថុនា ជាមួយគោលបំណង ទាញការគាំទ្រជាអន្តរជាតិសម្រាប់សំណើសន្តិភាពរបស់លោក ហ្សេលេនស្គី រួមទាំងការដកកងទ័ពរុស្ស៊ីចេញពីអ៊ុយក្រែនទាំងស្រុងផងដែរ ប៉ុន្តែទីក្រុងមូស្គូមិនត្រូវបានអញ្ជើញឲ្យចូលរួមទេ។

ការិយាល័យរបស់លោក ហ្សេលេនស្គី អះអាងថា ប្រទេសនិងអង្គការអន្តរជាតិសរុប១០៧ បានបញ្ជាក់ពីការចូលរួម ក្នុងនោះរួមទាំងសម្ព័ន្ធមិត្តលោកខាងលិចរបស់អ៊ុយក្រែន និងបណ្តាប្រទេសមកពីអាមេរិកខាងត្បូង អាហ្វ្រិក និងមជ្ឈិមបូព៌ាផងដែរ។

យ៉ាងណាមិញ អ្នកនាំពាក្យវិមានក្រឹមឡាំង លោក Dmitry Peskov និយាយថា កិច្ចប្រជុំកំពូលនេះ នឹងគ្មានប្រយោជន៍អ្វីសោះឡើយ បើគ្មានការចូលរួមពីភាគីរុស្ស៊ី៕

អត្ថបទ៖ សុខ សុវណ្ណ

ចុចអាន៖ លោក ហ្សេលេនស្គី ថា ចិន គឺជាឧបករណ៍របស់ ពូទីន