ព័ត៌មានអន្ដរជាតិ

បិទសាលា ជម្លៀសប្រជាជនបន្ទាន់ ក្រោយផ្ទុះភ្នំភ្លើងនៅហ្វីលីពីន ព្រួសផេះកម្ពស់៥គីឡូម៉ែត្រពីដី

បានផុស

៨ ខែ មុន

នៅ

ថ្ងៃអង្គារ ៤ មិថុនា ២០២៤

ដោយ

Chheang

អាជ្ញាធរហ្វីលីពីន បានបញ្ជាឲ្យមានការជម្លៀសខ្លួនប្រជាជន ក្រោយពីកើតមានហេតុការណ៍ផ្ទុះភ្នំភ្លើង Kanlaon ដែលបានបង្កើតជាដុំពពកផេះខ្មៅខ្មួលខ្មាញ់ផ្ទៃពេញមេឃកម្ពស់ ៥គីឡូម៉ែត្រពីដី។ គ្រោះធម្មជាតិនេះ បានកើតឡើងកាលពីយប់ថ្ងៃចន្ទទី៣ ខែមិថុនាកន្លងទៅ ស្ថិតនៅក្រុង La Castellana ខេត្ត Negros ប្រទេសហ្វីលីពីន។

មន្ត្រីរដ្ឋាភិបាល បានព្រមានពីការធ្លាក់ផេះដ៏គ្រោះថ្នាក់ចុះពីលើមេឃ និងក្លិនស្ពាន់ធ័រដែលកើតចេញពីបន្ទុះភ្នំភ្លើង Kanlaon។ ទន្ទឹមនោះ ក៏មានការព្រមានបន្ថែមពីហានិភ័យនៃគ្រោះទឹកជំនន់ភ្លាមៗ លំហូរភក់កម្អែភ្នំភ្លើង និងគ្រោះថ្នាក់ជាយថាហេតុណាមួយ។ រដ្ឋាភិបាលហ្វីលីពីន ក៏ប្រកាសដែរអំពីលទ្ធភាពនៃការផ្ទុះឡើងម្ដងទៀតនៃភ្នំភ្លើង Kanlaon។

លោក Jose Chubasco Cardenas អភិបាលក្រុង Canlaon ក្នុងតំបន់ Negros Oriental បានបង្ហោះសារនៅលើបណ្ដាញសង្គមហ្វេសប៊ុកនៅពេលកំពុងជម្លៀសប្រជាជនក្នុងសហគមន៍ចំនួន៤ ដែលនៅក្បែរកន្លែងបន្ទុះភ្នំភ្លើង ថា “សូមចូលទៅកាន់មជ្ឈមណ្ឌលជម្លៀសខ្លួនរបស់អ្នក ដោយមានការប្រុងប្រយ័ត្ន និងរៀបចំរបស់សំខាន់ៗដូចជាទឹក និងអាហារ”។ លោកអភិបាលបន្ថែមថា បច្ចុប្បន្នមានពលរដ្ឋជាង៧០០នាក់ហើយត្រូវបានជម្លៀសទៅទីកន្លែងសុវត្ថិភាព។

យ៉ាងណាមិញ ចំពោះតួលេខអ្នកស្លាប់ បាត់ខ្លួន ឬរងរបួស ពុំទាន់មានសេចក្ដីរាយការណ៍នៅឡើយទេ។

បន្ទុះភ្នំភ្លើងរយៈពេល ៦នាទី នេះ បានធ្វើឲ្យមានការបិទសាលារៀន និងកន្លែងធ្វើការនានានៅក្នុងទីក្រុង Canlaon ព្រមទាំងក្រុមហ៊ុនអាកាសចរណ៍ចំនួន៣ បានលុបចោលជើងហោះហើរចំនួន ៣២ នៅថ្ងៃអង្គារទី៤ ខែមិថុនា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា ហ្វីលីពីន គឺជាប្រទេសមួយស្ថិតនៅក្នុងតំបន់ “រង្វង់ភ្លើង” ឬហៅថា “Ring of Fire” ដែលគ្រោះរញ្ជួយដី និងបន្ទុះភ្នំភ្លើងគឺជារឿងដែលការកើតឡើងជាញឹកញាប់។ តួយ៉ាងដូចជា ភ្នំភ្លើង Kanlaon ដែលជាភ្នំភ្លើងសកម្មមួយនៅហ្វីលីពីន ធ្លាប់បានផ្ទុះម្ដងរួចមកហើយកាលពីខែធ្នូ ឆ្នាំ២០១៧កន្លងទៅ៕

ដោយ៖ ឈាង