យន្តហោះយោធា មីយ៉ាន់ម៉ា ទម្លាក់គ្រាប់បែកទម្ងន់ជាង ២២០ គីឡូក្រាម​លើរោងការ សម្លាប់មនុស្ស ២៧ នាក់

យន្តហោះរដ្ឋាភិបាលយោធាមីយ៉ាន់ម៉ាបានទម្លាក់គ្រាប់បែកទម្ងន់ជាង ២២០ គីឡូក្រាមចំនួន ៣ គ្រាប់ទៅលើរោងការមួយកន្លែងនៅតំបន់ Sagaing បណ្ដាលឲ្យជនស៊ីវិល ២៧ នាក់ រួមទាំងកុមារ ៣ នាក់ផងនោះស្លាប់បាត់បង់ជីវិត ខណៈ ៣០ នាក់ផ្សេងទៀតបានរងរបួស ។ នេះបើយោងតាមការចេញផ្សាយដោយសារព័ត៌មាន The Irrawaddy កាលពីថ្ងៃទី៤ ខែមិថុនាកន្លងទៅ ។

បន្ទាប់ពីទម្លាក់គ្រាប់បែកទម្ងន់រាប់រយគីឡូហើយ កងកម្លាំងរបស់រដ្ឋាភិបាលយោធាថែមទាំងបាញ់កាំភ្លើងធំជាច្រើនគ្រាប់ទៅលើភូមិប្រជាពលរដ្ឋនៅក្រុង Mingin ផងដែរ បណ្តាលឲ្យអ្នកភូមិជាង ២,០០០ នាក់មកពីភូមិចំនួន ៦ នៅក្បែរនោះ បង្ខំចិត្តរត់ភៀសខ្លួនចេញពីលំនៅដ្ឋានរបស់ពួកគេ ។

យោងតាម​អ្នក​ភូមិនៅក្នុង​តំបន់បាននិយាយថា ហេតុការណ៍ទម្លាក់គ្រាប់បែកក្នុង​ពិធី​មង្គលការនេះ​បានកើតឡើងនៅ​វេលា​ម៉ោង ៨ និង ​១៥ ​នាទី​ព្រឹកថ្ងៃទី៤ ខែមិថុនា ប៉ុន្តែ​​សំណាងល្អនៅ​ពេល​នោះ​កូនកំលោះ និងកូនក្រមុំ​កំពុង​ធ្វើ​ដំណើរ​ទៅ​វត្តក្នុង​ភូមិ ពុំបណ្តាលឲ្យរងរបួសឡើយ ។

ពាក់ព័ន្ធនឹងបញ្ហានេះដែរ លោក Aung Myo Min រដ្ឋមន្ត្រីសិទ្ធិមនុស្សរបស់រដ្ឋាភិបាលស្រមោលមីយ៉ាន់ម៉ាបាននិយាយថា ការទម្លាក់គ្រាប់បែកនេះ គឺជាឧក្រិដ្ឋកម្មសង្គ្រាម ។ លោកបន្តថា នេះ​ជា​ការទម្លាក់គ្រាប់បែក​ដោយ​ចេតនាក្នុងពិធី​មង្គលការ​របស់ជនស៊ីវិល មិនមែនជាប្រតិបត្តិការយោធាអ្វីនោះទេ ។

គួរបញ្ជាក់ថា ក្នុងរយៈពេល ៤ ខែដំបូងនៃឆ្នាំ ២០២៤ នេះ រដ្ឋាភិបាលយោធាមីយ៉ាន់ម៉ាបានបើកការវាយប្រហារតាមអាកាសជាច្រើនលើកច្រើនសារ ហើយក៏បានសម្លាប់ជនស៊ីវិលជាង ៣៥៩ នាក់ផងដែរ ក្នុងនោះមានកុមារ ៦១ នាក់ និង ៧៥៦ នាក់ផ្សេងទៀតបានរងរបួស ៕

ដោយ ៖ គង់ សំអាន