ព័ត៌មានអន្ដរជាតិ

ថៃ គ្រោងបើកភ្លើងបៃតងឲ្យល្បែងកាស៊ីណូចូលរកស៊ីស្របច្បាប់

បានផុស

៤ ខែ មុន

នៅ

ថ្ងៃពុធ ៥ មិថុនា ២០២៤

ដោយ

រដ្ឋាភិបាលថៃ នឹងជំរុញបន្តគម្រោងធ្វើឲ្យកាស៊ីណូក្លាយជាមុខរបរស្របច្បាប់ ដើម្បីបង្កើតជាប្រាក់ចំណូលរដ្ឋឲ្យបានកាន់តែច្រើន ព្រមទាំងជួយលើកមុខមាត់ប្រទេសឲ្យក្លាយជាគោលដៅទេសចរណ៍ដ៏សំខាន់មួយ។ នេះបើយោងតាមការលើកឡើងរបស់លោក Chai Wacharonke អ្នកនាំពាក្យរដ្ឋាភិបាលថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទខ្លីមួយក្រោយកិច្ចប្រជុំគណៈរដ្ឋមន្ត្រីប្រចាំសប្ដាហ៍ លោកនាយករដ្ឋមន្ត្រីថៃ សេដ្ឋា ថាវីស៊ីន បានបញ្ជាឲ្យក្រសួងហិរញ្ញវត្ថុ រៀបចំសេចក្ដីព្រាងច្បាប់ ស្របតាមមូលដ្ឋានគ្រឹះនៃច្បាប់ប្រទេស សម្រាប់បង្កើតទីតាំងសេវាកម្មកម្សាន្ត។ លោក សេដ្ឋា បន្តថា លោក Julapun Amornvivat អនុរដ្ឋមន្ត្រីក្រសួងហិរញ្ញវត្ថុ នឹងក្លាយជាអ្នកដឹកនាំរៀបចំលើសេចក្ដីព្រាងច្បាប់មួយនេះ។

ភាគច្រើននៃតំណាងសមាជិកសភាចំនួន៥០០រូបក្នុងប្រទេសថៃ កាលពីខែមីនាកន្លងទៅ បានបង្ហាញការគាំទ្រ ដែលសភាមានបំណងធ្វើឲ្យកាស៊ីណូក្លាយជាសេវាកម្មកម្សាន្តស្របច្បាប់ ដើម្បីទាក់ទាញភ្ញៀវទេសចរដែលមានការចំណាយខ្ពស់។ លោក Chai បាននិយាយថា បើតាមការប៉ាន់ស្មាន សេវាកម្មកាស៊ីណូ និងសេវាកម្មកម្សាន្តដទៃទៀតនៅក្នុងសេចក្ដីព្រាងច្បាប់ថ្មី នឹងជួយបង្កើនចំណូលពន្ធឲ្យរដ្ឋាភិបាលថៃបានដល់ ៣២៨លានដុល្លារ សម្រាប់ឆ្នាំដំបូងក្រោយបើកដំណើរការ។

ថៃ គឺជាប្រទេសចុងក្រោយគេ ដែលបានលើកយកការពិចារណាប្រកួតប្រជែងលើឧស្សាហកម្មកាស៊ីណូពិភពលោក ដែលកើបចំណូលបានរាប់រយពាន់លានដុល្លារឯណោះក្នុង១ឆ្នាំៗ។ បើតាមការវាយតម្លៃរបស់ក្រុមហ៊ុនអាមេរិក IBIS World ឧស្សាហកម្មកាស៊ីណូពិភពលោក ទទួលបានចំណូល ២៦៣,៣ពាន់លានដុល្លារ កាលពីឆ្នាំ២០២៣កន្លងទៅ។

សូមបញ្ជាក់ថា ល្បែងភ្នាល់ភាគច្រើនគឺមិនស្របច្បាប់នោះទេនៅក្នុងប្រទេសថៃ ដោយសារតែប្រជាជាតិអាស៊ីមួយនេះ សម្បូរទៅពុទ្ធសាសនិកភាគច្រើន និងការអភិរក្សនិយម។ យ៉ាងណាមិញ គម្រោងបើកឲ្យមានកាស៊ីណូស្របច្បាប់ នឹងនៅតែបន្តធ្វើឡើងនៅក្នុងប្រទេសថៃ ដើម្បីស្ដារវិស័យទេសចរឡើងវិញ ក្រោយពីទទួលរងផលប៉ះពាល់ពីជំងឺរាតត្បាតកាលពីប៉ុន្មានឆ្នាំកន្លងទៅ៕

ដោយ៖ ឈាង

Related Topics:ប្រទេសថៃ