ព័ត៌មានអន្ដរជាតិ

មង្គលការកូនប្រធានក្រុមហ៊ុនសំលៀកបំពាក់កីឡាល្បីនៅ ចិន រងការរិះគន់ថាខ្ជះខ្ជាយលុយកាក់

បានផុស

១០ ខែ មុន

នៅ

ថ្ងៃព្រហស្បតិ៍ ៦ មិថុនា ២០២៤

ដោយ

អាពាហ៍ពិពាហ៍របស់ Ding Jiamin កូនស្រីរបស់ប្រធានក្រុមហ៊ុន Xtep Group និង Zhou Liyuan ដែលជាកូនប្រុសរបស់ស្ថាបនិកក្រុមហ៊ុនសំលៀកបំពាក់ Septwolves បានទាក់ទាញសហគមន៍អនឡាញដោយសារតែភាពខ្ជះខ្ជាយលុយកាក់។

ប្រព័ន្ធផ្សព្វផ្សាយក្នុងស្រុករាយការណ៍ថា Ding Jiamin បានចែករំលែកវីដេអូមួយនៅលើគណនីប្រព័ន្ធផ្សព្វផ្សាយសង្គមរបស់នាង ដែលបង្ហាញពីពិធីមង្គលការប្រារព្ធយ៉ាងអធិកអធ័ម ហើយនាងបានរៀបរាប់រឿងស្នេហារផ្ទាល់ខ្លួនថា ពីឯកសណ្ឋានសាលារហូតដល់រ៉ូបអាពាហ៍ពិពាហ៍។ ស្របពេលដែលខាងកូនកំលោះត្រូវបានគេដឹងថា គឺជាមិត្តរួមថ្នាក់វិទ្យាល័យដែលនៅទីបំផុតបានក្លាយជាគូស្នេហ៍ និងរៀបការបន្ទាប់ពីបង្កើតអាជីពរៀងៗខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើយ៉ាងណាក៏ដោយ វីដេអូនេះបានទាក់ទាញអ្នកទស្សនារាប់សែននាក់ និងបានបញ្ឆេះការពិភាក្សាពេញប្រព័ន្ធផ្សព្វផ្សាយសង្គម ដោយមានអ្នកប្រើប្រាស់ជាច្រើនបានបញ្ចេញមតិលើភាពឆបគ្នារបស់គូស្នេហ៍មួយគូនេះ និងភាពសម្បូរបែបនៃអាពាហ៍ពិពាហ៍របស់ពួកគេ។

នៅខាងក្រោមវីដេអូ អ្នកប្រើប្រាស់ម្នាក់បានបញ្ចេញមតិថា “នេះគឺជាពិធីមង្គលការធម្មតារបស់ពួកអភិជន ដែលមានទ្រព្យសម្បត្តិច្រើន និយមខ្ជះខ្ជាយលុយកាក់ចោលឥតអំពើ។ ដូច្នេះ មិនមែនជារឿងចម្លែកនោះទេ សម្រាប់ក្រុមអ្នកមានៗអស់នោះ។ ជាពិសេសក្រុមគ្រួសារអ្នកល្បីល្បាញប្រចាំប្រទេសចិន មានទម្លាប់បង្ហាញភាពស៊ីវវល័យនិងទ្រព្យធនដែលពួកគេរកបានផងដែរ។

ពិធីមង្គលការនេះបានធ្វើឡើងនៅសណ្ឋាគារ Xiamen International Conference Center ក្នុងខេត្ត Fujian ប្រទេសចិន ដែលអាចទទួលតុអាហារបានចំនួន ១៣៥ តុ។ របាយការណ៍បង្ហាញថាតុនីមួយៗមានតម្លៃចន្លោះពី ៥,៩៩៩-,៩៩៩យន់ (៨២៨-១,៣៨០ ដុល្លារ)។ កន្លែងប្រារព្ធពិធីត្រូវបានតុបតែងដោយពណ៌ផ្កាឈូក និងពណ៌ស្វាយ ហើយភ្ញៀវបានចូលរួមចំណែកក្នុងការរៀបចំផ្កាដ៏ធំ ដែលជានិមិត្តរូបនៃក្តីប្រាថ្នាដ៏ល្អរបស់ពួកគេសម្រាប់គូស្វាមីភរិយាថ្មីថ្មោង។ ភ្ញៀវដែលលេចធ្លោក្នុងពិធីមង្គលការនោះរួមមាន Mario Ho កូនប្រុសរបស់មហាសេដ្ឋីកាស៊ីណូ Stanley Ho និងភរិយាជាតារាបង្ហាញម៉ូដ Ming Xi ។

ដោយឡែក ពិធីភ្ជាប់ពាក្យរបស់គូស្នេហ៍មួយគូនេះ កាលពីខែកញ្ញា ឆ្នាំ ២០២២ ក៏បានធ្វើឲ្យមានការភ្ញាក់ផ្អើលនៅលើប្រព័ន្ធផ្សព្វផ្សាយសង្គមនៅក្នុងប្រទេសចិនផងដែរ ដោយក្លាយជាប្រធានបទមួយដែលត្រូវបានគេអានច្រើនជាងគេនៅលើវេទិកាសង្គម Weibo របស់ចិនអស់រយៈពេលជាច្រើនថ្ងៃ ដោយទទួលបានការសរសើរជាច្រើនចំពោះប្រវត្តិគ្រួសារ និងទំនាក់ទំនងស្នេហារបស់ពួកគេ។ នៅពេលនោះ Ding Jiamin បានកត់សម្គាល់ថាទំនាក់ទំនងរបស់ពួកគេមិនមែនគ្រាន់តែជាការរួបរួមនៃគ្រួសារពីរប៉ុណ្ណោះទេ ប៉ុន្តែក៏ជាការបញ្ចូលគ្នានៃព្រលឹងរបស់ពួកគេផងដែរ។

សូមបញ្ចាក់ដែរថា នៅឆ្នាំ ២០២៣ ទស្សនាវដ្តី Forbes បានវាយតម្លៃទ្រព្យសម្បត្តិរបស់ឪពុកកូនក្រមុំចំនួន ១២ ពាន់លានដុល្លារ។ ម៉ាកយីហោ Xtep របស់គាត់គឺជាម៉ាកកីឡាអាជីពដ៏លេចធ្លោមួយ ជាមួយនឹងបណ្តាញដ៏ធំទូលាយនៃហាងជាង ៦,៣០០ នៅទូទាំង ៣១ ខេត្ត តំបន់ស្វយ័ត និងក្រុងក្នុងប្រទេសចិន និងក្រៅប្រទេស។ កាសែត Financial Times ក៏ធ្លាប់បានទទួលស្គាល់ថា Septwolves ជាឈ្មោះដែលគេស្គាល់នៅក្នុងប្រទេសចិន ហើយនៅឆ្នាំ ២០០១ វាបានក្លាយជាអ្នកលក់ដ៏សំខាន់នៅក្នុងទីផ្សារសំលៀកបំពាក់ដែលនាំមុខគេក្នុងការលក់អាវធំ៕