ព័ត៌មានអន្ដរជាតិ

ផ្ទុះភ្នំភ្លើង Ibu នៅឥណ្ឌូណេស៊ី ១ថ្ងៃ២ដង បាញ់កម្អែយ៉ាងក្រហមឆ្អិនឆ្អៅពេញផ្ទៃមេឃ

បានផុស

៦ ខែ មុន

នៅ

ថ្ងៃព្រហស្បតិ៍ ៦ មិថុនា ២០២៤

ដោយ

Chheang

ភ្នំភ្លើង Mount Ibu បានផ្ទុះចំនួន ២ដង នៅក្នុងថ្ងៃតែមួយ ហើយបានបាញ់កម្អែភ្លើងយ៉ាងសន្ធោសន្ធៅ ឡើងក្រហមឆ្អិនឆ្អៅពាសពេញផ្ទៃមេឃទាំងកណ្ដាលយប់ ឈានចូលថ្ងៃទី៦ ខែមិថុនា ឆ្នាំ២០២៤។ នេះបើយោងតាមអ្វីដែលភ្នាក់ងារតាមដានសកម្មភាពភ្នំភ្លើងឥណ្ឌូណេស៊ី ហៅកាត់ថា PVMBG ថ្លែងទៅកាន់ទីភ្នាក់ងារព័ត៌មាន Reuters។

បន្ទុះភ្នំភ្លើង Ibu ថ្ងៃទី៦ ខែមិថុនា ឆ្នាំ២០២៤ (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

PVMBG បានរៀបរាប់ថា ភ្នំភ្លើង Ibu ដែលមានកម្ពស់ ១ ៣២៥ម៉ែត្រ ស្ថិតនៅកោះ Halmahera បានផ្ទុះចំនួន២លើក នៅក្នុងថ្ងៃទី៦ ខែមិថុនា ដោយបន្ទុះលើកទី១ នៅម៉ោង១និង៣០នាទីយប់ ដែលបានបាញ់ចេញនូវដុំថ្ម និងកម្អែភ្លើងជាច្រើន ហើយបន្ទុះលើកទី២ គឺនៅម៉ោង ៧និង៤៦នាទីព្រឹក ផ្ទុះរយៈពេល២នាទី ព្រួសផេះពាសពេញមេឃនៅកម្ពស់ ១ ២០០ម៉ែត្រពីដី។

អ្នកស្រី Ms Heruningtyas Desi Purnamasari មន្ត្រីរបស់ PVMBG បានលើកឡើងថា ការព្រមាននៃបន្ទុះភ្នំភ្លើងលើកនេះ ស្ថិតនៅស្ថានភាពប្រកាសអាសន្នកម្រិត៤ ដែលទាមទារឲ្យមានការហាមឃាត់នូវគ្រប់សកម្មភាពទាំងអស់ក្នុងរយៈចម្ងាយ៧គីឡូម៉ែត្រនៅជុំវិញភ្នំភ្លើង Ibu។

នេះគឺជាលើកទី២ក្នុងខែមិថុនា ដែលភ្នំភ្លើង Ibu បានផ្ទុះ បន្ទាប់ពីបន្ទុះលើកមុន កើតឡើងកាលពីថ្ងៃទី៤ ហើយបានបាញ់ផេះទៅលើមេឃកម្ពស់៥គីឡូម៉ែត្រ។

សូមបញ្ជាក់ថា ហ្វីលីពីន គឺជាប្រទេសមួយស្ថិតនៅក្នុងតំបន់ “រង្វង់ភ្លើង” ឬហៅថា “Ring of Fire” ដែលគ្រោះរញ្ជួយដី និងបន្ទុះភ្នំភ្លើងគឺជារឿងដែលការកើតឡើងជាញឹកញាប់។ ភ្នំភ្លើងសកម្មនៅឥណ្ឌូណេស៊ី មានចំនួនសរុប ១២៧កន្លែង។

កាលពីខែឧសភាកន្លងទៅ ឥណ្ឌូណេស៊ីបានជួបប្រទះនឹងហេតុការណ៍ផ្ទុះភ្នំភ្លើងធំៗចំនួន២ គឺបន្ទុះនៅភ្នំភ្លើង Ruang ស្ថិតនៅខេត្ត North Sulawesi ដែលជម្លៀសប្រជាជនជាង ១២ ០០០នាក់ និងបន្ទុះនៅភ្នំភ្លើង Mount Marapi ស្ថិតនៅខេត្ត West Sumatra ដែលបានឆក់យកជីវិតមនុស្សយ៉ាងហោចណាស់ ៦០នាក់៕