អាល្លឺម៉ង់ កំពុងរៀបជើងព្រួល ត្រៀមធ្វើសង្គ្រាម

ដោយសារស្ថានការណ៍ពិភពលោកមើលទៅកាន់តែមិនស្រួល រដ្ឋាភិបាលទីក្រុងបែរឡាំង កំពុងរៀបជើងព្រួលឲ្យប្រទេសអាល្លឺម៉ង់ ត្រៀមខ្លួនធ្វើសង្គ្រាម។ នេះបើតាមការចុះផ្សាយរបស់ RT កាលពីថ្ងៃព្រហស្បតិ៍ទី៦ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងការពារជាតិ លោក Boris Pistorius បានប្រាប់សម័យប្រជុំសភាថា “ប្រទេសអាល្លឺម៉ង់ ត្រូវតែត្រៀមខ្លួនធ្វើសង្រ្គាម មុនដំណាច់ទសវត្សរ៍នេះ។ យើងត្រូវតែត្រៀមខ្លួនសម្រាប់សង្រ្គាមនៅឆ្នាំ២០២៩ ហើយ​យើង​ត្រូវ​តែរារាំង​កុំ​ឲ្យ​មាន​រឿង​អាក្រក់​បំផុតណាមួយ​មក​ដល់”។

ត្បិតតែលោកប្រកាសបែបនេះមែន ប៉ុន្តែបើយោងតាមគេហទំព័រតាមដានវិស័យការពារជាតិពិភពលោក បានលាតត្រដាងថា បច្ចុប្បន្ន យោធាអាល្លឺម៉ង់ ខ្វះគ្រឿងសឹកសំខាន់ៗ ហើយរបាយការណ៍របស់សភាក៏បង្ហាញដែរថា អាល្លឺម៉ង់ មិនអាចត្រៀមរួចរាល់ទេ បើសង្គ្រាមផ្ទុះឡើងនៅពាក់កណ្តាលសតវត្សរ៍នេះមែន។

យ៉ាងណាមិញ តាមការបញ្ជាក់ពីលោក Pistorius, បច្ចុប្បន្ន អាល្លឺម៉ង់ មានកងទ័ពជាប់កាតព្វកិច្ចសកម្មប្រហែល ១៨១ ០០០នាក់ ហើយចំនួននេះ ត្រូវបង្កើនបន្ថែមទើបបាន ប៉ុន្តែអាល្លឺម៉ង់ បានលុបចោលកាតព្វកិច្ចយោធានៅក្នុងឆ្នាំ២០១១បាត់ទៅហើយ ដូច្នេះ ការយកសេចក្តីព្រាងច្បាប់នេះមកប្រើវិញ ច្បាស់ណាស់ វាពិតជាលំបាកខ្លាំង។

ក្រៅតែ​ពី​ការបង្កើនចំនួនទ័ព បញ្ហាផ្សេងទៀតដែលអាល្លឺម៉ង់ កំពុងប្រឈមគឺ កង្វះ​សព្វាវុធ និងគ្រឿងសឹក។ ត្បិតកាលពីឆ្នាំ២០២២ អធិការបតី Olaf Scholz សន្យាចំណាយទឹកប្រាក់១០៧.៣៥ពាន់លានដុល្លារ ដើម្បីបំពាក់បំប៉ននិងធ្វើទំនើបកម្មកងកម្លាំងប្រដាប់អាវុធក៏ដោយ ប៉ុន្តែមកដល់ពេលនេះ គេមិនទាន់ឃើញមានការអភិវឌ្ឍអ្វីគួរឲ្យកត់សម្គាល់ទេ។

យោងតាមឯកសាររបស់ក្រសួងការពារជាតិ ដែលផ្សាយដោយសារព័ត៌មានអាល្លឺម៉ង់ Bild ការបញ្ជាទិញឯកសណ្ឋាន មួកការពារ សាក់កាដូ និងអាវក្រោះ គឺមិនបានសម្រេចទាំងស្រុងទេកាលពីឆ្នាំមុន ហើយកងទ័ពក៏ខ្វះវ៉ែនតា សម្រាប់មើលស្ថានភាពពេលយប់ដែរ៕

អត្ថបទ៖ សុខ សុវណ្ណ

ចុចអាន៖ ធ្លាយផែនការសម្ងាត់ថា អាល្លឺម៉ង់ គ្រោងកែនទាហានអាយុ១៨ឆ្នាំ ដើម្បីប្រយុទ្ធក្នុងសង្គ្រាម ណាតូ-រុស្ស៊ី