ព័ត៌មានអន្ដរជាតិ

អាមេរិក យល់ព្រមលក់គ្រឿងបន្លាស់ F-16 ឲ្យតៃវ៉ាន់ ទោះចិនជំទាស់

បានផុស

៨ ខែ មុន

នៅ

ថ្ងៃសុក្រ ៧ មិថុនា ២០២៤

ដោយ

Chheang

ទោះមានការជំទាស់ពីចិន សហរដ្ឋអាមេរិកនៅតែបន្តលក់គ្រឿងសព្វាវុធឲ្យទៅកោះតៃវ៉ានដដែល។ តួយ៉ាងដូចជា កាលពីថ្ងៃទី៥ ខែមិថុនាកន្លងទៅ ក្រសួងការបរទេសអាមេរិក បានប្រកាសយល់ព្រមលក់គ្រឿងបន្លាស់យន្តហោះចម្បាំងប្រភេទ F-16 ឲ្យទៅតៃវ៉ាន់ នៅក្នុងតម្លៃប្រមាណជា ៨០លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសហប្រតិបត្តិការសន្តិសុខការពារជាតិនៃមន្ទីរបញ្ចកោណ បានរៀបរាប់នៅក្នុងសេចក្ដីថ្លែងការណ៍ថា ការលក់នេះ នឹងជួយតៃវ៉ានបង្កើនសន្តិសុខជាតិ ព្រមទាំងរក្សាស្ថិរភាពនយោបាយ តុល្យភាពយោធា និងវិវឌ្ឍនភាពសេដ្ឋកិច្ចក្នុងតំបន់។ ជាការឆ្លើយតប ក្រសួងការពារជាតិតៃវ៉ាន់ បានថ្លែងអំណរគុណចំពោះសហរដ្ឋអាមេរិក ហើយនិយាយថា តាមរយៈការបញ្ជាទិញពីអាមេរិកលើកនេះ ខ្លួននឹងអាចបង្កើនសមត្ថភាពប្រយុទ្ធ និងការពារជាតិសម្រាប់កងកម្លាំងដែនអាកាសតៃវ៉ាន់។ ការជួញដូរយោធាលើកនេះ នឹងត្រូវធ្វើឲ្យចប់រួចរាល់នៅតឹ្រមខែកក្កដាខាងមុខ។

ទន្ទឹមនោះ តៃវ៉ាន់ បានលើកឡើងថា ចិនតែងមានបំណងរំខានដល់អធិបតេយ្យភាពរបស់ខ្លួន តាមរយៈការយាយីទៅលើកងកម្លាំងជើងទឹក និងដែនអាកាស រួមទាំងសិទ្ធិការពារខ្លួនរបស់តៃវ៉ាន់។

ពាក់ព័ន្ធនឹងការជួញដូរយោធារវាងអាមេរិក-តៃវ៉ាន់លើកនេះ គេមិនទាន់សង្កេតឃើញមានប្រតិកម្មណាមួយពីរដ្ឋាភិបាលក្រុងប៉េកាំងនៅឡើយទេ។ យ៉ាងណាមិញ នាពេលកន្លង ចិនតែងជំទាស់ និងទាមទារឲ្យអាមេរិក ក៏ដូចជាបណ្ដាប្រទេសដទៃ បញ្ឈប់ការលក់សព្វាវុធឲ្យតៃវ៉ាន់ ហើយអះអាងថា ដែនកោះមួយនេះ គឺជាខេត្តដែលនៅដាច់ឆ្ងាយរបស់ខ្លួន ហើយការបង្រួបបង្រួមចិនតែមួយគឺជានិន្នាការប្រវត្តិសាស្ត្រ ដែលមិនអាចកែប្រែបាននោះឡើយ។

កាលពីខែឧសភាកន្លងទៅ ក្រសួងពាណិជ្ជកម្មចិន បានដាក់ទណ្ឌកម្មលើក្រុមហ៊ុនចំនួន៣ ដែលផលិតសព្វាវុធយោធាលក់ឲ្យទៅតៃវ៉ាន់។ ក្រុមហ៊ុនដែលរងទណ្ឌកម្ម មានដូចជា ក្រុមហ៊ុន Boeing ក្រុមហ៊ុន General Atomics Aeronautical Systems និងក្រុមហ៊ុន General Dynamics Land Systems។ ចិន បានចាត់ក្រុមហ៊ុនទាំងនោះចូលក្នុងបញ្ជីឈ្មោះ “អង្គភាពដែលមិនគួរឲ្យទុកចិត្ត” ដោយហាមឃាត់ការវិនិយោគទាំងអស់នៅក្នុងដែនដីរបស់ចិន នាពេលអនាគត។ មួយវិញទៀត ថ្នាក់ដឹកនាំជាន់ខ្ពស់របស់ក្រុមហ៊ុនទាំង៣ ក៏រងការហាមប្រាមមិនឲ្យធ្វើដំណើរចូលទឹកដីប្រទេសចិនទៀតដែរ៕

ដោយ៖ ឈាង