ប្រមុខដឹកនាំអាមេរិក សុំទោសលោក ហ្សេលេនស្គី ដែលផ្តល់ជំនួយ យឺតយ៉ាវ 

ពេលជួបគ្នាក្នុងប្រទេសបារាំង ប្រធានាធិបតីមហាអំណាចអាមេរិកលោក ចូ បៃដិន បានសុំទោសប្រធានាធិបតិអ៊ុយក្រែនលោក វ្ល៉ាឌីមៀរ ហ្សេលេនស្គី ចំពោះការដែល ទីក្រុងវ៉ាស៊ីនតោន មិនអាចទាញយកប្រាក់រាប់ពាន់លានដុល្លារពីអ្នកបង់ពន្ធអាមេរិកបាន នាំឲ្យជំនួយបញ្ជូនទៅទីក្រុងកៀវ មានភាពយឺតយ៉ាវ។ នេះបើតាមការចុះផ្សាយរបស់សារព័ត៌មាន BBC កាលពីថ្ងៃសុក្រទី៧ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន ប្រាប់ទៅលោក ហ្សេលេនស្គី ថា លោកសុំទោសដែលប៉ុន្មានសប្តាហ៍នោះ ជំនួយមិនបានបញ្ជូនទៅ ធ្វើឲ្យមានរឿងជាច្រើនកើតឡើង។ អាមេរិក មិនទុកអ៊ុយក្រែន ចោលឡើយ, អាមេរិក នៅជាមួយអ៊ុយក្រែន ដល់ទីបញ្ចប់។

ពាក់ព័ន្ធភាពយឺតយ៉ាវនេះដែរ លោក បៃដិន បានស្តីបន្ទោសខ្លាំងៗទៅលើសមាជិកសភាគណបក្សសាធារណរដ្ឋ ដែលព្យាយាមរារាំងដំណើរការផ្តល់ជំនួយ។

ស្របពេលជាមួយគ្នានោះ លោក ហ្សេលេនស្គី ក៏លើកឡើងដែរថា “វាពិតជាមានសារៈសំខាន់ខ្លាំងណាស់ ដែលនៅក្នុងលក្ខខណ្ឌនេះ សហរដ្ឋអាមេរិកនិងប្រជាជនអាមេរិកទាំងអស់ ឈរប្រកៀកស្មាជាមួយអ៊ុយក្រែន ដូចកាលពីសម័យសង្រ្គាមលោកលើកទី២។ សហរដ្ឋអាមេរិកបានជួយសង្រ្គោះជីវិតមនុស្ស និងជួយសង្រ្គោះទ្វីបអឺរ៉ុប”។

សូមបញ្ជាក់ថា កាលពីខែតុលា សេតវិមានបានស្នើសុំទឹកប្រាក់៦១ពាន់លានដុល្លារ ដើម្បីផ្តល់ជំនួយដល់អ៊ុយក្រែន ប៉ុន្តែពេលនោះ សភាមិនព្រមអនុម័តទេរហូតដល់ចុងខែមេសាឆ្នាំនេះ។ ក្រោយមក អ៊ុយក្រែន ​បានដាក់ការស្តី​បន្ទោស​កង្វះខាត​ថវិកា​របស់​សហរដ្ឋ​អាមេរិកនេះ ថាជាហេតុនាំឲ្យខ្លួនរងបរាជ័យលើសមរភូមិជាបន្តបន្ទាប់។

លុះមកដល់សប្តាហ៍នេះ ទីក្រុងវ៉ាស៊ីនតោនបានប្រកាសកញ្ចប់ជំនួយយោធាថ្មីតម្លៃ ២២៥លានដុល្លារបន្ថែមទៀតដល់ទីក្រុងកៀវ ដោយក្នុងនោះក៏រួមទាំងគ្រាប់កាំភ្លើងធំ និងជើងទម្របាញ់រ៉ុកកែត HIMARS ផងដែរ៕

អត្ថបទ៖ សុខ សុវណ្ណ

ចុចអាន៖ អាមេរិក គ្រោងបន្ថែមជំនួយយោធាចំនួន ២២៥ លានដុល្លារទៀតដល់ អ៊ុយក្រែន