ព័ត៌មានអន្ដរជាតិ

យូនីសេហ្វ៖ ៩០%នៃកុមារនៅតំបន់ហ្គាហ្សា ខ្វះអាហារបរិភោគសម្រាប់ការលូតលាស់

បានផុស

៦ ខែ មុន

នៅ

ថ្ងៃអាទិត្យ ៩ មិថុនា ២០២៤

ដោយ

Chheang

៩នាក់ក្នុងចំណោមក្មេង១០នាក់ នៅតំបន់ហ្គាហ្សា មិនអាចទទួលបានអាហារបំប៉នសុខភាពគ្រប់គ្រាន់នោះទេ ដើម្បីធានាបាននូវការលូតលាស់និងការអភិវឌ្ឍផ្នែកសុខភាពរាងកាយ។ នេះបើយោងតាមរបាយការណ៍បង្ហាញដោយអង្គការយូនីសេហ្វ (UNICEF) កាលពីថ្ងៃទី៦ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យដែលបង្ហាញដោយអង្គការយូនីសេហ្វ ត្រូវបានធ្វើឡើងចំនួន៥លើក ចន្លោះពីខែធ្នូ ឆ្នាំ២០២៣ ដល់ខែមេសា ឆ្នាំ២០២៤។ អង្គការយូនីសេហ្វ បានបញ្ជាក់់ថា នៅក្នុងតំបន់ហ្គាហ្សា ច្រើនខែបន្ទាប់ពីភ្លើងសង្គ្រាម និងការរឹតបន្តឹងលើជំនួយមនុស្សធម៌ បានធ្វើឲ្យមានការប៉ះពាល់ទៅដល់ប្រព័ន្ធសុខភាព ដែលបង្កជាផលវិបាកនិងមហន្តរាយជាខ្លាំងចំពោះកុមារ និងក្រុមគ្រួសាររបស់ពួកគេ។

អង្គការយូនីសេហ្វ បានបន្តថា “នេះគឺជាព័ស្តុតាងនៃការប៉ះពាល់គួរឲ្យរន្ធត់ នៃជម្លោះ និងការរឹតបន្តឹង ដែលកំពុងកើតមាន ចំពោះសមត្ថភាពក្រុមគ្រួសារជាច្រើនក្នុងការបំពេញតម្រូវការអាហារកុមារ ហើយរយៈពេលដែលកើតឡើងនេះបានឲ្យកុមារធ្លាក់ចូលបញ្ហាកង្វះអាហារូបត្ថម្ភដែលគំរាមកំហែងដល់អាយុជីវិត”។

ពាក់ព័ន្ធនឹងបញ្ហានេះ ក្រុមយោធាអ៊ីស្រាអែល បានបញ្ជាក់ថា ខ្លួនមិនបានដាក់ការរឹតបន្តឹងចំពោះការផ្គត់ផ្គង់ជំនួយមនុស្សធម៌ឲ្យជនស៊ីវិលចូលក្នុងតំបន់ហ្គាហ្សានោះទេ។ ប៉ុន្តែ អ៊ីស្រាអែល បានបន្ទោសសហរដ្ឋអាមេរិកទៅវិញ ដែលផ្ដល់ជំនួយយឺតយ៉ាវ និងគ្មានប្រសិទ្ធភាព។

បើតាមអង្គការយូនីសេហ្វ កុមារ៩០%នៅហ្គាហ្សាទទួលទានបានតែក្រុមអាហារចំនួន ២ឬតិចជាងនេះ ខណៈដែលតម្រូវការរបបអាហារអប្បបរមាសម្រាប់ការអភិវឌ្ឍរាងកាយ ត្រូវមានយ៉ាងហោចណាស់ក៏៥ ក្នុងចំណោមក្រុមអាហារទាំង៨ ដែលសមស្របទៅតាមការកំណត់របស់អង្គការយូនីសេហ្វ និងអង្គការសុខភាពពិភពលោក (WHO)។ កត្តានេះហើយទើបបណ្ដាលឲ្យមានកុមារមួយចំនួននៅហ្គាហ្សាបានស្លាប់ ដោយសារកង្វះខាតអាហារូបត្ថម្ភ និងកង្វះជាតិទឹកក្នុងខ្លួន។

សូមបញ្ជាក់ថា អង្គការយូនីសេហ្វ បានបង្ហាញទិន្នន័យថា នៅទូទាំងពិភពលោក មានកុមារអាយុក្រោម៥ឆ្នាំចំនួន ២៧% ស្មើនឹង ១៨១លាននាក់ កំពុងរស់នៅក្នុងភាពក្រីក្រខ្វះខាតស្បៀងអាហារជាខ្លាំងសម្រាប់ការលូតលាស់រាងកាយ៕

ដោយ៖ ឈាង