ព័ត៌មានអន្ដរជាតិ

ពូទីន ត្រៀមធ្វើទស្សនកិច្ចនៅកូរ៉េខាងជើង និងវៀតណាម ក្នុងខែមិថុនានេះ

បានផុស

៤ ខែ មុន

នៅ

ថ្ងៃចន្ទ ១០ មិថុនា ២០២៤

ដោយ

Chheang

លោក វ៉ា្លឌឺមៀ ពូទីន នឹងធ្វើដំណើរទស្សនកិច្ចនៅប្រទេសកូរ៉េខាងជើង និងប្រទេសវៀតណាម នាប៉ុន្មានសប្ដាហ៍ខាងមុខ។ នេះបើយោងតាមការចុះផ្សាយដោយកាសែតរុស្ស៊ី Vedomosti នៅថ្ងៃទី១០ ខែមិថុនា ឆ្នាំ២០២៤។

លោក វ៉ា្លឌឺមៀ ពូទីន ប្រធានាធិបតីរុស្ស៊ី (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Alexander Matseogora អគ្គរដ្ឋទូតរុស្ស៊ីប្រចាំកូរ៉េខាងជើង បានបញ្ជាក់ថា ដំណើរទស្សនកិច្ចរបស់លោក ពូទីន នៅក្រុងព្យុងយ៉ាង គឺជាព័ត៌មានពិតដែលនឹងកើតឡើង ខណៈពេលមន្ត្រីនៃសម្ព័ន្ធមិត្តទាំង២កំពុងរៀបចំគម្រោងជំនួបនេះយ៉ាងសកម្ម។ កាសែត Vedomosti ថា លោក ពូទីន និងលោក គីម ជុងអ៊ុន ទំនងជាពិភាក្សាអំពីការទទួលយកពលករចំណាកស្រុកពីកូរ៉េខាងជើង ឲ្យចូលបម្រើការងារនៅរុស្ស៊ី ខណៈដែលរុស្ស៊ីកំពុងខ្វះខាតកម្លាំងពលកម្មជាខ្លាំង ដោយសារតែសង្គ្រាមនៅអ៊ុយក្រែន។

កាសែត Vedomosti បានផ្សាយទៀតថា បន្ទាប់ពីជួបលោក គីម ជុងអ៊ុន រួចនោះ មេដឹកនាំរុស្ស៊ី នឹងបន្តដំណើរភ្លាមៗទៅកាន់ប្រទេសវៀតណាមតែម្ដង។

យ៉ាងណាមិញ ពាក់ព័ន្ធនឹងកាលបរិច្ឆេទផ្លូវការនៃជំនួប ដែលនឹងត្រៀមធ្វើឡើងទាំងនេះ មិនត្រូវបង្ហើបឲ្យសាធារណៈដឹងឮនោះឡើយ។

កាលពីខែកញ្ញា ឆ្នាំ២០២៣ លោក គីម ជុងអ៊ុន បានទៅរុស្ស៊ី ជួបជាមួយលោក ពូទីន។ នៅទីនោះ លោកបានទៅទស្សនកិច្ចនៅមជ្ឈមណ្ឌលបាញ់បង្ហោះយានអាវកាស Vostochny របស់រុស្ស៊ី ហើយកាលណោះ លោក ពូទីន ធ្លាប់សន្យាជួយក្រុងព្យុងយ៉ាង ក្នុងការកសាងប្រព័ន្ធផ្កាយរណប។

លោក គីម ជុងអ៊ុន មេដឹកនាំកូរ៉េខាងជើង និងលោក វ៉្លាឌឺមៀ ពូទីន មេដឹកនាំរុស្ស៊ី (រូបភាព៖ AP)

សូមជម្រាបថា ដំណើរទស្សនកិច្ចដំបូង និងតែម្ដងគត់របស់លោក ពូទីន នៅក្នុងប្រទេសកូរ៉េខាងជើង គឺនៅអំឡុងឆ្នាំ២០០០ ក្រោយការឡើងកាន់តំណែងលើកដំបូងជាប្រធានាធិបតីរុស្ស៊ី។

ក្រោយការវាយលុកឈ្លានពានអ៊ុយក្រែន រុស្ស៊ីបានបោះជំហានបន្ថែមទៀតក្នុងការរឹតចំណងមិត្តភាពជាមួយកូរ៉េខាងជើង ព្រមទាំងបណ្ដាសម្ព័ន្ធមិត្តដទៃទៀត ដែលមានអរិភាពនឹងសហរដ្ឋអាមេរិក ដូចជា ប្រទេសអ៊ីរ៉ង់ ជាដើម។ ចំណងមិត្តភាពដែលរុស្ស៊ីកំពុងព្យាយាមបង្កើតនេះ កំពុងក្លាយជាក្ដីកង្វល់ជាខ្លាំងចំពោះបណ្ដាប្រទេសលោកខាងលិច៕

ដោយ៖ ឈាង

អានបន្ថែម៖

វៀតណាម ពន្យារពេលជួប EU ព្រោះខ្លាច ពូទីន មកធ្វើទស្សនកិច្ច

ប្រទះឃើញយន្តហោះ VIP ចុះចតយ៉ាងសម្ងាត់នៅកូរ៉េខាងជើង សង្ស័យត្រៀមជំនួបឲ្យពូទីន