ទាហានកូរ៉េខាងត្បូងបានបាញ់ព្រមាន បន្ទាប់ពីទាហានកូរ៉េខាងជើងឆ្លងចូលព្រំដែន

ទាហានកូរ៉េខាងត្បូងបានបាញ់ព្រមាន បន្ទាប់ពីទាហានកូរ៉េខាងជើងបានឆ្លងចូលព្រំដែនដែលកំពុងមានភាពតានតឹង ខណៈដែលប្រទេសទាំងពីរកំពុងចូលរួមក្នុងយុទ្ធនាការបែបសង្គ្រាមត្រជាក់ ដូចជាការបង្ហោះប៉េងប៉ោងនិងការផ្សាយឃោសនារិះគន់និងគំរាមគ្នាទៅវិញទៅមក។ នេះបើយោងតាមការចេញផ្សាយរបស់ទីភ្នាក់ព័ត៌មាន ​AP នៅថ្ងៃទី ១១ ខែ មិថុនា​នេះ។

យោងតាមយោធាកូរ៉េខាងត្បូង បានឲ្យដឹងថា ទាហានកូរ៉េខាងជើងមួយចំនួនទំនងជាបានចូលរួមធ្វើការងារមួយដែលគេមិនបានដឹងច្បាស់នោះទេ នៅផ្នែកខាងជើងនៃព្រំដែន ដែល​បានឆ្លងកាត់ខ្សែបន្ទាត់​កំណត់​ព្រំដែនយោធា​រវាង​ប្រទេសទាំងពីរ។ ទាហានកូរ៉េខាងជើងទាំងនោះកាន់ឧបករណ៍សំណង់ ដែលខ្លះប្រដាប់ដោយអាវុធ បានត្រឡប់ទៅទឹកដីរបស់ពួកគេវិញភ្លាមៗ បន្ទាប់ពីយោធាកូរ៉េខាងត្បូងបានបាញ់ព្រមាន និងបានចេញការផ្សាយព្រមាន។

ម្តងម្កាលក៏មានការប្រឈមមុខដាក់គ្នាដោយបង្ហូរឈាម និងហិង្សាបានកើតឡើងនៅ​តំបន់​គ្មាន​យោធា ដែល​ជា​ព្រំដែន​ដ៏​រឹងមាំ​ខណ្ឌ​ចែក​កូរ៉េ​ទាំង​ពីរ។ ខណៈពេលដែលឧប្បត្តិហេតុកាលពីថ្ងៃអាទិត្យបានកើតឡើងចំពេលមានភាពតានតឹងរវាងកូរ៉េទាំងពីរ អ្នក​សង្កេតការណ៍​កូរ៉េខាងត្បូងជឿថា ទាហានកូរ៉េខាងជើងមិនមានចេតនាបំពានចូលព្រំដែននោះទេ ដោយសារទីតាំងនេះគឺជាតំបន់ឈើ ហើយស្លាកសញ្ញាបន្ទាត់ព្រំដែនក៏មើលឃើញមិនច្បាស់ ហើយកូរ៉េខាងជើងក៏មិនបានបាញ់តបតវិញដែរ។ របាយការណ៍ប្រព័ន្ធផ្សព្វផ្សាយកូរ៉េខាងត្បូង បាននិយាយថា ទាហានកូរ៉េខាងជើងប្រហែល ២០-៣០ នាក់បានចូលទៅក្នុងទឹកដីកូរ៉េខាងត្បូងប្រហែល ៥០ ម៉ែត្របន្ទាប់ពីពួកគេទំនងជាវង្វេងផ្លូវ។

គួរបញ្ជាក់ថា កូរ៉េខាងត្បូងបានបន្តការផ្សាយឃោសនាប្រឆាំងទីក្រុងព្យុងយ៉ាងតាមរយៈឧបករណ៍បំពងសម្លេងតាមព្រំដែនជាការឆ្លើយតបទៅនឹងការបង្ហោះប៉េងប៉ោងនាពេលថ្មីៗនេះរបស់កូរ៉េខាងជើងដែលផ្ទុកលាមកសត្វ និងសំរាមឆ្លងកាត់ព្រំដែន។ ទន្ទឹមនោះកូរ៉េ​ខាង​ជើង​ក៏បាន​ដំឡើង​ឧបករណ៍​បំពង​សំឡេង​តាម​ព្រំដែន​របស់​ខ្លួន​ផងដែរ ដើម្បីជា​ការ​ឆ្លើយ​តប ប៉ុន្តែ​មិន​ទាន់​បើកដំណើរ​នៅ​ឡើយ​ទេ។

ពាក់ព័ន្ធនឹងយុទ្ធនាការបង្ហោះប៉េងប៉ោងរបស់កូរ៉េខាងជើង គឺដើម្បីឆ្លើយតបទៅនឹងការ​បង្ហោះ​ប៉េងប៉ោងរបស់សកម្មជនកូរ៉េខាងត្បូង ទម្លាក់ខិត្តប័ណ្ណឃោសនារិះគន់របបផ្តាច់ការរបស់មេដឹកនាំ គីម ជុងអ៊ុន និងUSB ដែលមានបទចម្រៀង K-pop និង រឿងភាគកូរ៉េខាងត្បូង និងវត្ថុផ្សេងៗទៀតនៅក្នុងកូរ៉េខាងជើង។ ខណៈប្រទេសកូរ៉េខាងជើងមានភាពរសើបខ្លាំងចំពោះការរិះគន់ពីខាងក្រៅលើប្រព័ន្ធនយោបាយរបស់ខ្លួន ដោយសារតែភាគច្រើននៃប្រជាជនចំនួន ២៦ លាននាក់របស់ខ្លួនមិនមានលទ្ធភាពទទួលបានព័ត៌មានផ្លូវការពីបរទេសនោះទេ៕

អត្ថបទ៖ ប៊ុន សុភាព