ព័ត៌មានអន្ដរជាតិ

អាមេរិក ថា កិច្ចព្រមព្រៀងសន្តិសុខថ្មី នឹងក្លាយជាស្ពានចម្លងអ៊ុយក្រែនឲ្យចូល NATO

បានផុស

៨ ខែ មុន

នៅ

ថ្ងៃព្រហស្បតិ៍ ១៣ មិថុនា ២០២៤

ដោយ

Chheang

លោក ចូ បៃឌិន និងលោក ហ្សេលេនស្គី នឹងចុះហត្ថលេខាលើកិច្ចព្រមព្រៀងសន្តិសុខទ្វេភាគីរវាងសហរដ្ឋអាមេរិក និងប្រទេសអ៊ុយក្រែន នៅក្នុងអំឡុងកិច្ចប្រជុំកំពូល G7 ក្នុងប្រទេសអ៊ីតាលី ដែលប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៥ ខែមិថុនា ឆ្នាំ២០២៤។ នេះបើយោងតាមការចុះផ្សាយរបស់សារព័ត៌មាន AP កាលពីថ្ងៃទី១២ ខែមិថុនា។

លោក ចូ បៃឌិន និងលោក ហ្សេលេនស្គី (រូបភាព៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jake Sullivan និយាយថា កិច្ចព្រមព្រៀងសន្តិសុខនេះ ប្រៀបបានដូចជាការឲ្យសញ្ញាទៅរុស្ស៊ី អំពីដំណោះស្រាយរបស់សហរដ្ឋអាមេរិក ចំពោះសង្គ្រាមរវាងក្រុងមូស្គូ និងក្រុងកៀវ។ ទីប្រឹក្សាសន្ដិសុខជាតិសេតវិមានរូបនេះ បានបន្តថា “ប្រសិនបើលោក វ៉ា្លឌឺមៀ ពូទីន គិតថា គាត់អាចយកឈ្នះលើកម្លាំងចម្រុះ ដែលគាំទ្រអ៊ុយក្រែន នោះគឺគាត់គិតខុសហើយ”។

ទន្ទឹមនោះ លោក Sullivan ក៏បានបញ្ជាក់ផងដែរថា កិច្ចព្រមព្រៀងនេះទៀតសោតប្រៀបបានដូចជាស្ពាន ដែលអាចចម្លងអ៊ុយក្រែនឲ្យក្លាយជាសមាជិកអង្គការ NATO។ នៅត្រង់ចំណុចនេះ បានន័យថា អាមេរិកនឹងជួយឲ្យអ៊ុយក្រែនឆាប់បញ្ចប់សង្គ្រាម ដែលជាគោលការណ៍ទាមទារដោយ NATO មុនអាចក្លាយជាសមាជិកផ្លូវការរបស់អង្គការមួយនេះបាន។

យ៉ាងណាមិញ លោក Sullivan បានលើកឡើងទៀតថា នៅក្នុងកិច្ចព្រមព្រៀងដដែលនេះ អាមេរិកនឹងមិនបញ្ជូនទ័ពឲ្យទៅច្បាំងនៅអ៊ុយក្រែនដោយផ្ទាល់នោះឡើយ ដោយហេតុព្រួយបារម្ភថាអាចផ្ទុះសង្គ្រាមនុយក្លេអ៊ែរជាមួយរុស្ស៊ី។

កិច្ចប្រជុំ G7 ឆ្នាំ២០២៣ (រូបភាព៖ Reuters)

សូមបញ្ជាក់ថា កិច្ចប្រជុំកំពូល G7 ឆ្នាំ២០២៤ នេះ នឹងធ្វើឡើងនៅក្នុងប្រទេសអ៊ីតាលី ដោយផ្ដោតសំខាន់លើបញ្ហាសេដ្ឋកិច្ច និងភូមិសាស្ត្រនយោបាយ។ មាតិការសើបៗដែលត្រៀមនឹងពិភាក្សា មានដូចជា សង្គ្រាមរុស្ស៊ី-អ៊ុយក្រែន ជម្លោះនៅមជ្ឈិមបូព៌ា និងបញ្ហាអន្តោប្រវេសន៍៕

ដោយ៖ ឈាង