ក្រុមហាម៉ាស បដិសេធ​សំណើ​គំនិត​ថ្មី​លើ​សំណើ​បទ​ឈប់​បាញ់​នៅ​ហ្គាហ្សា

ក្រុមហាម៉ាស បានបដិសេធការអះអាងដែលថា ក្រុម​ខ្លួន​បានស្នើគំនិតថ្មីសម្រាប់សំណើបទឈប់បាញ់ដែលគាំទ្រដោយអង្គការសហប្រជាជាតិនៅក្នុងតំបន់ហ្គាហ្សា។ ​នេះបើយោងតាមការចេញផ្សាយរបស់សារព័ត៌មាន CGTN នៅថ្ងៃទី​១៣ ខែ​ មិថុនា​នេះ។

យោងតាមមន្ត្រី​ជាន់ខ្ពស់ក្រុមហាម៉ាស លោក Osama Hamdan បានប្រាប់ទូរទស្សន៍ Pan-Arab Al-Araby TV ថា ជំហររបស់ក្រុមហាម៉ាស​មិនបានពិភាក្សាអំពីគំនិត ឬសំណើថ្មីណាមួយឡើយ ខណៈដែលអ៊ីស្រាអែលតែងតែបដិសេធសំណើ និងបានចោទប្រកាន់រដ្ឋបាលសហរដ្ឋអាមេរិកពីការចូលដៃជាមួយក្រុមហាម៉ាស។ ខណៈសំណើនេះរួមមានឃ្លាដែលអនុញ្ញាតឱ្យអ៊ីស្រាអែលចាប់ផ្តើមសង្រ្គាមឡើងវិញបន្ទាប់ពីដំណាក់កាលទីពីរ ប្រសិនបើការចរចាមិនទទួលបានលទ្ធផលវិជ្ជមាន។

ក្រុមនេះក៏ អំពាវនាវឱ្យក្រុងវ៉ាស៊ីនតោន ដាក់សម្ពាធដោយផ្ទាល់លើអ៊ីស្រាអែលឱ្យទទួលយកកិច្ចព្រមព្រៀងរបស់អ៊ីស្រាអែលនៃសំណើបទឈប់បាញ់ចុងក្រោយបង្អស់ នឹងកំពុងស្វែងរកបទឈប់បាញ់ជាអចិន្ត្រៃយ៍ ការដកកងទ័ពអ៊ីស្រាអែលចេញពីតំបន់ហ្គាហ្សា ការវិលត្រឡប់របស់ជនភៀសខ្លួនទៅកាន់លំនៅដ្ឋានរបស់ពួកគេ ការកសាងតំបន់ហ្គាហ្សាឡើងវិញ និងការបញ្ចប់ការបិទផ្លូវដោយអ៉ីស្រាអែល។

គួរបញ្ជាក់ថា ការបដិសេធនេះបានធ្វើឡើងជាការឆ្លើយតបទៅនឹងសេចក្តីថ្លែងការណ៍របស់រដ្ឋមន្ត្រីការបរទេសអាមេរិកលោក Antony Blinken ដែលបាននិយាយថាក្រុមហាម៉ាសបានស្នើឱ្យមាន ការផ្លាស់ប្តូរជាច្រើនចំពោះកិច្ចព្រមព្រៀងបទឈប់បាញ់ និងចំណាប់ខ្មាំង ដែលថាសំណើខ្លះអាចដំណើរការបាន ហើយខ្លះទៀតគឺមិនអាចដំណើរការ ។

ទោះជាយ៉ាងណាលោក Blinken មិនបានបញ្ជាក់ពីការឆ្លើយតបរបស់ហាម៉ាសនោះទេ ដោយបន្ថែមថាអ្នកសម្របសម្រួលនៅតែប្តេជ្ញាចិត្តក្នុងការបិទចន្លោះប្រហោងនេះ ទោះបីជាជំហររបស់ហាម៉ាសមានបញ្ហាស្មុគស្មាញក៏ដោយ ក៏អាមេរិកនឹងបន្តជំរុញ ជាមួយដៃគូនានាដូចជាជាមួយកាតា និងអេហ្ស៊ីប ដើម្បីព្យាយាមឲ្យបានសម្រេចនូវកិច្ចព្រមព្រៀងនេះ៕

អត្ថបទ៖ ប៊ុន សុភាព