ព័ត៌មានអន្ដរជាតិ

ក្រុមឧទ្ទាមហ៊ូធី បើកការវាយប្រហារដោយគ្រាប់បែកលើកប៉ាល់របស់ក្រិកនៅសមុទ្រក្រហម

បានផុស

១០ ខែ មុន

នៅ

ថ្ងៃព្រហស្បតិ៍ ១៣ មិថុនា ២០២៤

ដោយ

ក្រុមឧទ្ទាមហ៊ូធី នៅប្រទេសយេម៉ែន បានបើកការវាយប្រហារដោយគ្រាប់បែកតាមទូក លើកប៉ាល់ពាណិជ្ជកម្មនៅសមុទ្រក្រហម ដែលជាការកើនឡើងនៃការវាយប្រហារចុងក្រោយ បើទោះបីជាយុទ្ធនាការដឹកនាំដោយសហរដ្ឋអាមេរិកព្យាយាមការពារផ្លូវទឹកដ៏សំខាន់នេះក៏ដោយ។ នេះបើយោងតាមការចេញផ្សាយរបស់តីភ្នាក់ងារព័ត៌មាន AP នៅថ្ងៃទី១៣ ខែ មិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រុមហ៊ូធី បានអះអាងទទួលខុសត្រូវចំពោះការវាយប្រហារនេះ ដោយថាកប៉ាល់ដែលត្រូវបានវាយប្រហារជាកប៉ាល់ក្រុមហ៊ុនដឹកជញ្ជូន ភាគច្រើនមានទង់ជាតិលីបេរីយ៉ា និងគ្រប់គ្រងដោយជនជាតិក្រិក។ ក្នុងការវាយប្រហារនេះមានការប្រើទូកដ្រូន ព្រមទាំងយន្តហោះគ្មានមនុស្សបើក និងមីស៊ីលផ្លោង។

បើយោងតាមយោធាអង់គ្លេស បានឲ្យដឹងថា កប៉ាល់នេះត្រូវបានបុកដោយកប៉ាល់ពណ៌សតូចមួយនៅភាគនិរតីនៃទីក្រុងកំពង់ផែ Hodeida ដែលគ្រប់គ្រងដោយក្រុមហ៊ូធី ហើយបានបណ្តាលឲ្យមានការជន់លិចយ៉ាងធ្ងន់ធ្ងរ និងខូចខាតដល់បន្ទប់ម៉ាស៊ីន។ ស្របពេលជាមួយគ្នានេះយោធាអាមេរិកក៏បានបំផ្លាញនូវមីស៊ីល ៣ គ្រាប់ដែលបាញ់ដោយក្រុមហ៊ូធីព្រមទាំងយន្តហោះគ្មានមនុស្សបើកមួយគ្រឿងនៅលើសមុទ្រក្រហម ប៉ុន្តែមិនបានបង្កការខូចខាតអ្វីឡើយ។

គួរបញ្ជាក់ថា ក្រុមហ៊ូធី បានដណ្ដើមយករដ្ឋធានីរបស់ប្រទេសយេម៉ែនជិតមួយទសវត្សមុន ហើយបាននិងកំពុងប្រយុទ្ធជាមួយក្រុមចម្រុះដឹកនាំដោយអារ៉ាប៊ីសាអូឌីត ហើយបាននិងកំពុងកំណត់គោលដៅដឹកជញ្ជូននៅទូទាំងច្រករបៀងសមុទ្រក្រហមជុំវិញសង្រ្គាមអ៊ីស្រាអែល និងក្រុមហាម៉ាស់នៅតំបន់ហ្គាហ្សា។

ខណៈការវាយប្រហារនេះមានគោលបំណងបញ្ឈប់សង្គ្រាម និងគាំទ្រដល់ប៉ាឡេស្ទីន ទោះបីជាការវាយប្រហារជារឿយៗសំដៅទៅលើនាវាដែលមិនមានជាប់ពាក់ព័ន្ធជាមួយជម្លោះក៏ដោយ។ ដោយកន្លងមកក្រុមឧទ្ទាមហ៊ូធី បានបើកការវាយប្រហារជាង ៥០ លើក លើការដឹកជញ្ជូនសម្លាប់នាវិក ៣ នាក់ រឹបអូសនាវាមួយគ្រឿង និងបានពន្លិចនាវាមួយគ្រឿងទៀតចាប់តាំងពីខែវិច្ឆិកាមក នេះបើយោងតាមរដ្ឋបាលដែនសមុទ្ររបស់សហរដ្ឋអាមេរិក៕