ព័ត៌មានអន្ដរជាតិ

ចិន ខ្សឹបប្រាប់អ៊ុយក្រែន ថាមិនលក់អាវុធឲ្យរុស្ស៊ី, អាមេរិក ថា មិនលក់ តែផ្ដល់ជំនួយ

បានផុស

៩ ខែ មុន

នៅ

ថ្ងៃសុក្រ ១៤ មិថុនា ២០២៤

ដោយ

Chheang

ប្រធានាធិបតីអ៊ុយក្រែន បានអះអាងថា មេដឹកនាំចិន បានសន្យាថានឹងមិនលក់សព្វាវុធឲ្យទៅប្រទេសរុស្ស៊ីនោះទេ។ ការថ្លែងរបស់លោក ហ្សេលេនស្គី ធ្វើឡើងកាលពីថ្ងៃព្រហស្បតិ៍ទី១៣ ខែមិថុនា កំឡុងពេលចូលរួមសន្និសីទកាសែតរួមគ្នាជាមួយលោក ចូ បៃឌិន ប្រធានាធិបតីអាមេរិក ក្នុងកិច្ចប្រជុំកំពូល G7 នៅប្រទេសអ៊ីតាលី។

លោក ហ្សេលេនស្គី ប្រធានាធិបតីអ៊ុយក្រែន និងលោក ស៊ី ជីនពីង ប្រធានាធិបតីចិន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំអ៊ុយក្រែន បានបញ្ជាក់ថា ការសន្យារបស់លោក ស៊ី ជីនពីង បានធ្វើឡើង ក្រោយពីកិច្ចសន្ទនាតាមរយៈទូរសព្ទនាពេលកន្លងទៅ។ យ៉ាងណាមិញ លោក ហ្សេលេនស្គី មិនបានបញ្ជាក់ថានៅពេលណាឲ្យប្រាកដនោះទេ។ លោក និយាយថា “ខ្ញុំមានការសន្ទនាយ៉ាងហ្មត់ចត់មួយជាមួយមេដឹកនាំចិន។ គាត់ប្រាប់ថា គាត់នឹងមិនលក់អាវុធណាមួយឡើយឲ្យរុស្ស៊ី។ យើងនឹងនាំគ្នាចាំមើល ប្រសិនបើគាត់ជាមនុស្សគួរឲ្យគោរពម្នាក់មែន នោះគាត់នឹងមិនលក់ទេ ព្រោះគាត់បានសន្យាជាមួយខ្ញុំរួចហើយ”។

គ្រាន់តែឮអ៊ុយក្រែនលើកឡើងដូច្នេះ លោក ចូ បៃឌិន ស្រាប់តែកាត់សម្ដីលោក ហ្សេលេនស្គី ហើយនិយាយថា ប្រាកដណាស់ ចិននឹងមិនលក់អាវុធឲ្យរុស្ស៊ីទេ តែចិនផ្ដល់ជាជំនួយនិងបច្ចេកវិទ្យាផលិតអាវុធទាំងនោះទៅវិញ ដែលបានន័យថា ចិនកំពុងតែជួយរុស្ស៊ីដដែលទេ។

ជាការឆ្លើយតប លោក ហ្សេលេនស្គី ថា ប្រសិនបើអ៊ុយក្រែន និងចិន មានទស្សនៈដូចគ្នាលើសន្ដិភាព នោះនឹងមានកិច្ចចរចារវាងប្រទេសទាំង២ តែបើចិនមានមតិផ្ទុយ នោះនឹងសន្ដិភាពនឹងមិនកើតឡើងបានឡើយ ដែលតម្រូវឲ្យមានការកែប្រែលើរូបមន្តសន្តិភាពដែលអ៊ុយក្រែនធ្លាប់បានបង្កើតឡើង។

លោក ហ្សេលេនស្គី និងលោក ចូ បៃឌិន ប្រធានាធិបតីអាមេរិក (រូបភាព៖ Reuters)

សូមរំឭកថា អ៊ុយក្រែន នឹងរៀបចំកិច្ចប្រជុំសន្ដិភាព នៅក្នុងប្រទេសស្វីស ចាប់ពីថ្ងៃទី១៥ ដល់ថ្ងៃទី១៦ ខែមិថុនា ឆ្នាំ២០២៤ ដើម្បីកៀរគរការគាំទ្រពីអន្តរជាតិទាមទារឲ្យរុស្ស៊ីដកកងទ័ពចេញទាំងស្រុងពីអ៊ុយក្រែន ក្នុងការពន្លត់ភ្លើងសង្គ្រាម។ ក្នុងកិច្ចប្រជុំ លោក ហ្សេលេនស្គី នឹងលើកយករូបមន្តសន្តិភាព១០ចំណុច ធ្វើជាប្រធានបទសំខាន់។ ប្រហែល ១៦០ប្រទេស ត្រូវបានអញ្ជើញឲ្យចូលរួម ប៉ុន្តែប្រទេសមួយចំនួនបានបដិសេធ ដោយក្នុងនោះក៏មានប្រទេសចិនផងដែរ។ ចិន ថា សន្និសីទសន្ដិភាពគួរតែមានវត្តមានពីភាគីជម្លោះទាំងសងខាង ហើយអវត្តមានរបស់រុស្ស៊ី គឺខុសពីការរំពឹងទុករបស់ចិន ដែលជាហេតុនាំឲ្យចិនពិបាកទៅចូលរួមនៅក្នុងកិច្ចប្រជុំមួយនេះណាស់៕

ដោយ៖ ឈាង

អានបន្ថែម៖

រូបមន្តសន្តិភាព១០ចំណុចរបស់លោក ហ្សេលេនស្គី ដែលត្រៀមលើកឡើងក្នុងកិច្ចប្រជុំនៅស្វីស មានអ្វីខ្លះ?

ប្រទេសចំនួនប៉ុន្មាន ដែលនឹងទៅចូលរួមកិច្ចប្រជុំសន្តិភាពអ៊ុយក្រែន នៅស្វីស?