ព័ត៌មានអន្ដរជាតិ

រុស្ស៊ី ផ្លោងមីស៊ីល១៧គ្រាប់ដាក់អ៊ុយក្រែន ក្រោយ G7 យកទ្រព្យសម្បត្តិបង្កកជួយក្រុងកៀវ

បានផុស

១០ ខែ មុន

នៅ

ថ្ងៃសុក្រ ១៤ មិថុនា ២០២៤

ដោយ

Chheang

កម្ដៅជម្លោះរវាងក្រុងមូស្គូ និងក្រុងកៀវ បានកើនឡើងមួយកម្រិតទៀត បន្ទាប់ពីមានការវាយប្រហារតាមដែនអាកាសដាក់គ្នាទៅមកកាលពីទៀបភ្លឺឈានចូលដល់ថ្ងៃទី១៤ ខែមិថុនា ក្រោយពីក្រុមប្រទេស G7 សម្រេចលើកិច្ចព្រមព្រៀងប្រាក់កម្ចី៥០ពាន់លានដុល្លារ ដែលទាញចេញពីទ្រព្យសម្បត្តិបង្កករបស់រុស្ស៊ី។

លោក វ៉ា្លឌឺមៀ ពូទីន ប្រធានាធិបតីរុស្ស៊ី និងលោក ហ្សេលេនស្គី ប្រធានាធិបតីអ៊ុយក្រែន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងអ៊ុយក្រែន បានឲ្យដឹងថា ប្រព័ន្ធខែលការពារអាកាស បានបាញ់កម្ទេចដ្រូនប្រយុទ្ធ Shahed ចំនួន១៧គ្រឿងរបស់រុស្ស៊ី ដែលសំដៅមករកតំបន់ចំនួន៧នៅអ៊ុយក្រែន។ អ៊ុយក្រែន បានបន្ថែមថា រុស្ស៊ីក៏បានបាញ់ផ្លោងមីស៊ីលចំនួន១៧គ្រាប់ផងដែរ ដែលជាប្រភេទមីស៊ីលបាលិស្ទិក និងមីស៊ីលគ្រូស ហើយក្នុងនោះអ៊ុយក្រែនអាចបាញ់ស្ទាក់មីស៊ីលបានចំនួនពាក់កណ្ដាល។

ទន្ទឹមគ្នានេះដែរ ភាគីរុស្ស៊ីវិញ ក៏បានលើកឡើងថា ខ្លួនបានបាញ់កម្ទេចដ្រូនចំនួន ៨៧គ្រឿងរបស់អ៊ុយក្រែន ដែលហោះសំដៅមកកាន់តំបន់ចំនួន៥ និងឧបទ្វីបគ្រីមៀ ដែលដណ្ដើមនិងកំពុងកាន់កាប់បានដោយរុស្ស៊ី។ ក្នុងការវាយប្រហារលើកនេះ អ៊ុយក្រែន បានកម្ទេចរោងចក្រថាមពលមួយកន្លែងនៅក្នុងតំបន់ Rostov និងអាងស្តុកប្រេងជាច្រើននៅទីក្រុង Voronezh របស់រុស្ស៊ី។

លោក ហ្សេលេនស្គី និងលោក ចូ បៃឌិន ប្រធានាធិបតីអាមេរិក នៅក្នុងកិច្ចប្រជុំ G7 ឆ្នាំ២០២៤ (រូបភាព៖ AP)

គួររំឭកថា ប៉ុន្មានម៉ោងមុនការវាយប្រហារ ក្រុមមេដឹកនាំ G7 ដែលបើកកិច្ចប្រជុំនៅអ៊ីតាលី បានសម្រេចលើកិច្ចព្រមព្រៀងផ្ដល់កម្ចី ៥០ពាន់លានដុល្លារឲ្យទៅអ៊ុយក្រែន។ កម្ចីនេះ ទាញចេញពីចំណូល និងការប្រាក់នៃទ្រព្យសម្បត្តិជាង ២៦០ពាន់លានដុល្លាររបស់រុស្ស៊ី ដែលត្រូវបានបង្កកនៅសហរដ្ឋអាមេរិក និងអឺរ៉ុប។

មន្ត្រីរដ្ឋបាលជាន់ខ្ពស់របស់អាមេរិក បានប្រកាសថា កិច្ចព្រមព្រៀងមួយនេះ គឺជាសញ្ញាបង្ហាញថា ក្រុមប្រទេសប្រជាធិបតេយ្យឈានមុខគេនៅលើពិភពលោក នឹងមិននឿយហត់ក្នុងការការពារសេរីភាពរបស់អ៊ុយក្រែននោះឡើយ ហើយមេដឹកនាំរុស្ស៊ីក៏នឹងមិនអាចយកឈ្នះកម្លាំងរួមគ្នានេះបានដែរ៕

ដោយ៖ ឈាង

អានបន្ថែម៖

G7 យល់ស្របនឹងផែនការលោក Biden ប្រើប្រាស់ទ្រព្យសម្បត្តិបង្កករុស្ស៊ីជួយអ៊ុយក្រែន

បៃដិន-ហ្សេលេនស្គី ចុះកិច្ចព្រមព្រៀងឲ្យ អាមេរិក ជួយយោធាអ៊ុយក្រែន ១០ឆ្នាំពេញ