លោកបៃដិន ប្តេជ្ញាមិនលើកលែងទោសឲ្យ កូនប្រុស

ក្រោយកូនប្រុសត្រូវបានតុលាការរដ្ឋ Delaware រកឃើញថាមានពិរុទ្ធ លើការចោទប្រកាន់ចំនួន៣ករណី ពាក់ព័ន្ធការកាន់កាប់អាវុធ, ពេលនេះ ប្រធានាធិបតិអាមេរិកលោក ចូ បៃដិន ប្រកាសក្តែងៗថា លោកនឹងមិនលើកលែងទោសដល់កូនប្រុសឡើយ។ នេះបើតាមការចុះផ្សាយរបស់ RT នៅថ្ងៃសុក្រទី១៤ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបសំណួរអ្នកកាសែត ក្នុងអំឡុងកិច្ចប្រជុំ G7 នៅឯភាគខាងត្បូងប្រទេសអ៊ីតាលី ពាក់ព័ន្ធរឿងរ៉ាវកូនប្រុស, លោក បៃដិន បានគូសបញ្ជាក់យ៉ាងច្បាស់ថា “ខ្ញុំពេញចិត្តចំពោះនីតិវិធីច្បាប់ ហើយខ្ញុំនឹងមិនធ្វើអ្វីទាំងអស់។ ខ្ញុំគោរពតាមសេចក្តីសម្រេចរបស់គណៈវិនិច្ឆ័យ ហើយខ្ញុំនឹងមិនលើកលែងទោសដល់កូនឡើយ”។ ទោះបីជាយ៉ាងណាក៏ដោយ លោកក៏សរសើរកូនប្រុសដែរ ដែលអាចជម្នះផ្តាច់គ្រឿងញៀនបាន។

សូមបញ្ជាក់ជាថ្មី កូនប្រុសលោក បៃដិន ឈ្មោះ ហាន់ធើ ត្រូវបានតុលាការរដ្ឋ Delaware ចោទប្រកាន់ពីបទកុហកលើពាក្យស្នើសុំទិញកាំភ្លើងក្នុងឆ្នាំ២០១៨ ដោយបន្លំថា គាត់មិនមែនជាអ្នកញៀនថ្នាំទាំងដែលពេលនោះ គាត់កំពុងប្រើប្រាស់កូកាអ៊ីន ប៉ុន្តែលោក ហាន់ធើ អះអាង​ថា គាត់​គ្មាន​កំហុសទេ ព្រោះគាត់​កំពុងសម្រាកកែប្រែដើម្បីផ្តាច់គ្រឿងញៀននៅពេលនោះ។

លោក ហាន់ធើ អាចប្រឈមជាប់ពន្ធនាគាររហូតដល់២៥ឆ្នាំ និងពិន័យជាប្រាក់រហូតដល់ ៧៥០ ០០០ដុល្លារ។ យ៉ាងណា កាលបរិច្ឆេទ​នៃ​ការផ្តន្ទាទោស ​មិន​ទាន់​ត្រូវ​បាន​កំណត់​នៅ​ឡើយ​ទេ។

ជុំវិញដំណើរការនេះដែរ លោក ហាន់ធើ បានក្លាយជាកូនប្រុសប្រធានាធិបតីកំពុងកាន់តំណែងដំបូងគេក្នុងប្រវត្តិសាស្រ្ត ដែលត្រូវបានកាត់ទោសនៅក្នុងតុលាការសហព័ន្ធ៕

អត្ថបទ៖ សុខ សុវណ្ណ

ចុចអាន៖ កូនប្រុសលោក បៃដិន ចារឈ្មោះក្នុងប្រវត្តិសាស្រ្តអាមេរិក ក្រោយមានទោសពាក់ព័ន្ធការកាន់កាប់អាវុធ