ព័ត៌មានអន្ដរជាតិ

ហ្សេលេនស្គី៖ សន្យាបទឈប់បាញ់របស់ ពូទីន ដូចសន្យារបស់ ហ៊ីត្លែ មុនផ្ទុះសង្គ្រាមលោក

បានផុស

៨ ខែ មុន

នៅ

ថ្ងៃសៅរ៍ ១៥ មិថុនា ២០២៤

ដោយ

Chheang

ការសន្យាផ្ដល់ជូនបទឈប់បាញ់របស់ប្រធានាធិបតីរុស្ស៊ី លោក វ៉្លាឌឺមៀ ពូទីន គឺជាឱសានវាទ ដែលមិនអាចជឿទុកចិត្តបាន។ នេះជាការលើកឡើងរបស់លោក ហ្សេលេនស្គី កាលពីថ្ងៃទី១៤ ខែមិថុនា ក្រោយពីមេដឹកនាំរុស្ស៊ី ប្រកាសពីលក្ខខណ្ឌដែលអាចឈានទៅដល់បទឈប់បាញ់នៅអ៊ុយក្រែន។

លោក ហ្សេលេនស្គី ប្រធានាធិបតីអ៊ុយក្រែន (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន បាននិយាយនៅក្នុងសុន្ទរកថាមួយថា រុស្ស៊ីនឹងបិទបញ្ចប់សង្គ្រាមនៅអ៊ុយក្រែន ប្រសិនបើរដ្ឋាភិបាលក្រុងកៀវយល់ព្រមបោះបង់មហិច្ឆតាចង់ចូលជាសមាជិកអង្គការ NATO ហើយត្រូវដកទ័ពចេញពីខេត្តចំនួន៤ ដែលរុស្ស៊ីកាត់យកដូចជា Donetsk, Luhansk, Kherson និង Zaporizhzhia។

ថ្លែងទៅកាន់សារព័ត៌មាន SkyTG24 របស់អ៊ីតាលី នៅខាងក្រៅកិច្ចប្រជុំកំពូល G7, ប្រធានាធិបតីអ៊ុយក្រែន លោក ហ្សេលេនស្គី បាននិយាយថា លោកជឿថា រុស្ស៊ីនឹងមិនបញ្ឈប់ការវាយលុកយោធារបស់ខ្លួននោះឡើយ បើទោះជាអ៊ុយក្រែនព្រមបំពេញតាមលក្ខខណ្ឌបទឈប់បាញ់របស់លោក ពូទីន ក៏ដោយ។

លោក ហ្សេលេនស្គី បានបន្ថែមថា “ទាំងនេះគឺជាសារឱសានវាទ ដែលមិនខុសពីសារពីអតីតកាលទេ។ គាត់នឹងមិនឈប់នោះទេ។ វាជារឿងដូចគ្នាដែលហ៊ីត្លែធ្លាប់ធ្វើ… នេះជាមូលហេតុដែលយើងមិនគួរជឿជាក់លើសារទាំងនេះ”។ ក្នុងន័យនេះ មេដឹកនាំអ៊ុយក្រែន បានប្រដូចទង្វើរបស់លោក ពូទីន នឹងទៅសម្ដីដែលធ្លាប់លើកឡើងដោយ អាដុល ហ៊ីត្លែ ដែលជាមេដឹកនាំផ្ដាច់ការណាស៊ីអាល្លឺម៉ង់ ហើយមានគោលបំណងជំរុញការពង្រីកនូវអំណាចរបស់ខ្លួន បង្កឲ្យផ្ទុះមានសង្គ្រាមលោកលើកទី២ឡើង៕