ទឹកជំនន់វាយប្រហារភាគខាងត្បូងប្រទេសចិន ខណៈសីតុណ្ហភាពកើនឡើងនៅតំបន់ផ្សេងទៀត

ក្រសួងឧតុនិយមរបស់ប្រទេសចិន បានចេញការប្រកាសអាសន្នពីសីតុណ្ហភាពកើនឡើងខ្ពស់ ដោយតំបន់ជាច្រើននៅទូទាំងប្រទេសបានជួបប្រទះនូវកំដៅដ៏ខ្លាំង ខណៈដែលខេត្តភាគខាងត្បូងជាច្រើនបានចេញការព្រមានអំពីទឹកជំនន់ធ្ងន់ធ្ងរ ដោយសារតែភ្លៀងធ្លាក់ខ្លាំង។​ នេះបើយោងតាមការចេញផ្សាយរបស់ទីភាក់ងារព័ត៌មាន Reuters នៅថ្ងៃទី ១៧ ខែ មិថុនានេះ។

ក្រសួងឧតុនិយមចិន បានព្យាករ​សីតុណ្ហភាពអតិបរមាពី ៣៧-៣៩ អង្សាសេ នៅផ្នែកខ្លះនៃ Xinjiang​​ ម៉ុងហ្គោលី និង Henan  កាលពីថ្ងៃអាទិត្យ។ ខណៈទីក្រុងប៉េកាំងបានចេញការព្រមានអំពីរលកកម្ដៅខ្ពស់បំផុតទីពីរ ដែលព្យាករ​ថាសីតុណ្ហភាពនឹងឡើងដល់លើសពី៣៧អង្សាសេនៅថ្ងៃច័ន្ទ និងថ្ងៃអង្គារ ។

ទូរទស្សន៍រដ្ឋចិន CCTV ក៏បានរាយការណ៍ដែរថា ខេត្ត Liaoning ភាគឦសានរបស់ប្រទេសចិន សីតុណ្ហភាពនឹងឡើងដល់ ៤០ទៅ៤២ អង្សាសេក្នុងរយៈពេលពីរថ្ងៃខាងមុខនេះ។ ទោះបីជាយ៉ាងណាអាំងតង់ស៊ីតេនៃសីតុណ្ហភាពខ្ពស់នឹងថយចុះនៅភាគខាងជើងប្រទេសចិន និងតំបន់រវាងទន្លេលឿង និងទន្លេ Huaihe។

ស្របពេលជាមួយគ្នានេះ ភ្លៀងធ្លាក់ខ្លាំងក៏បានបោកបក់ខេត្ត Fujian ភាគអាគ្នេយ៍រយៈពេលប្រាំពីរថ្ងៃ នឹងត្រូវបានព្យាករថាចំនួនទឹកនឹងបង្កើនកម្រិតទឹកនៅក្នុងទន្លេមួយចំនួនលើសពីកម្រិតប្រកាសអាសន្ន ខណៈអាជ្ញាធរ​ក៏បានបញ្ចេញ​ទឹក​ចេញ​ពី​អាង​ស្តុក​ទឹក​ជា​ច្រើន​។

ចំណែកអាជ្ញាធរក្នុងតំបន់ Guangxi បានប្រកាសថាកម្រិតទឹកទន្លេក្នុងតំបន់មួយចំនួនបានលើសពីកម្រិតប្រកាសអាសន្ន ហើយសិស្សម្នាក់ត្រូវស្លាប់នៅក្នុងទឹកជំនន់នៅទីក្រុង Guilin ភាគខាងត្បូងផងដែរ៕

អត្ថបទ៖ ប៊ុន សុភាព