ជនជាតិរ៉ូហ៊ីងយ៉ារាប់ពាន់នាក់ភ័យខ្លាច ជាប់នៅក្នុងការប្រយុទ្ធនៅភាគខាងលិចមីយ៉ាន់ម៉ា

.

ជនជាតិរ៉ូហ៊ីងយ៉ារាប់ពាន់នាក់ អាចនឹងជាប់គាំងនៅក្នុងការប្រយុទ្ធគ្នានៅភាគខាងលិចប្រទេសមីយ៉ាន់ម៉ា ខណៈដែលក្រុមជនជាតិភាគតិចប្រដាប់អាវុធដ៏មានឥទ្ធិពលមួយក្រុមបានពង្រាយយោធានៅក្នុងទីក្រុងឆ្នេរសមុទ្រមួយនៅតាមព្រំដែនរបស់ប្រទេសជាមួយប្រទេសបង់ក្លាដែស។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី​ ១៧ ខែ មិថុនានេះ។

កងទ័ពអារ៉ាកាន (AA) ដែលកំពុងប្រយុទ្ធដើម្បីដណ្ដើមយកតំបន់រ៉ាឃីន របស់ប្រទេសមីយ៉ាន់ម៉ា បានប្រកាសឲ្យប្រជាជនទីក្រុង Maungdaw ភាគច្រើនជាជនជាតិរ៉ូហ៊ីងយ៉ា ចាកចេញពីក្រុងនេះមុនពេលការវាយលុកដែលបានគ្រោងទុកមកដល់។ខណៈការវាយប្រហាររបស់ AA លើទីក្រុង Maungdaw គឺជាការវាយប្រហារចុងក្រោយបង្អស់របស់ពួកឧទ្ទាមក្នុងរយៈពេលជាច្រើនខែប្រឆាំងនឹងរបបយោធាមីយ៉ាន់ម៉ា ដែលបានកាន់អំណាចនៅក្នុងរដ្ឋប្រហារខែកុម្ភៈ ឆ្នាំ ២០២១ ហើយឥឡូវនេះគួរឲ្យកត់សម្គាល់ថារដ្ឋាភិបាលកាន់អំណាចស្ថិតនៅក្នុងស្ថានភាពទន់ខ្សោយកម្លាំងកាន់តែខ្លាំងឡើងនៅទូទាំងប្រទេស។

​យោងតាម អនុរដ្ឋមន្ត្រី​សិទ្ធិមនុស្ស​នៃ​រដ្ឋាភិបាល​រួបរួមជាតិ​របស់​ប្រទេស​មី​យ៉ាន់​ម៉ា ​បាន​ឲ្យដឹងថា ជនជាតិ​រ៉ូ​ហ៊ីង​យ៉ា​ប្រហែល ៧០,០០០ នាក់​ដែល​កំពុង​រស់នៅ​ក្នុង​ទីក្រុង Maungdaw ត្រូវបាន​ជាប់គាំង ខណៈ​ការប្រយុទ្ធ​កាន់តែ​ខិតជិត​មកដល់​។ចំណែកជនជាតិរ៉ូហ៊ីងយ៉ារាប់ពាន់នាក់បានភៀសខ្លួនទៅកាន់ប្រទេសជិតខាងបង់ក្លាដែសកាលពីខែមុន ដើម្បីស្វែងរកសុវត្ថិភាពពីជម្លោះដែលកំពុងកើនឡើង បើទោះបីជាប្រទេសជិតខាងមានការស្ទាក់ស្ទើរក្នុងការទទួលយកជនភៀសខ្លួនបន្ថែមទៀតក៏ដោយ។

គួរបញ្ជាក់ថា ជនជាតិរ៉ូហ៊ីងយ៉ាបានប្រឈមមុខនឹងការធ្វើទុក្ខបុកម្នេញនៅក្នុងប្រទេសភូមា ដែលភាគច្រើនកាន់ព្រះពុទ្ធសាសនាអស់រយៈពេលជាច្រើនទសវត្សមកហើយ។ ជនជាតិនេះជិតមួយលាននាក់រស់នៅក្នុងជំរុំជនភៀសខ្លួនក្នុងព្រំដែន Cox’s Bazar របស់ប្រទេសបង់ក្លាដែស បន្ទាប់ពីបានភៀសខ្លួនចេញពីការបង្រ្កាបដែលដឹកនាំដោយយោធានៅក្នុងរដ្ឋរ៉ាឃីនក្នុងឆ្នាំ ២០១៧៕

អត្ថបទ៖ ប៊ុន សុភាព