តើលោក ពូទីន ទៅកូរ៉េខាងជើង ដើម្បីអ្វី?

តាមសេចក្តីប្រកាសរបស់វិមានក្រឹមឡាំង, ប្រធានាធិបតីរុស្ស៊ីលោក វ្ល៉ាឌីមៀរ ពូទីន នឹងបំពេញទស្សនកិច្ចប្រទេសកូរ៉េខាងជើង នៅថ្ងៃអង្គារទី១៨ខែមិថុនា និងស្នាក់នៅមួយយប់ រួចទើបបន្តដំណើរទៅកាន់ប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរទស្សនកិច្ចនៅកូរ៉េខាងជើង, លោក Yuri Ushakov ដែលជាជំនួយការគោលនយោបាយការបរទេសជាន់ខ្ពស់របស់ប្រធានាធិបតីរុស្ស៊ី បានគូសបញ្ជាក់ថា លោក ពូទីន និងមេដឹកនាំក្នុងទីក្រុងព្យុងយ៉ាង នឹងចុះហត្ថលេខាលើឯកសារមួយចំនួន រួមទាំងកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយដ៏មានសក្តានុពលជាដើម។

លើសពីនេះ គណៈប្រតិភូរុស្ស៊ី ក៏នឹងចូលរួមកិច្ចពិភាក្សាជាមួយសមភាគីកូរ៉េខាងជើងស្តីពីបញ្ហាមួយចំនួន ដូចជាទំនាក់ទំនងទ្វេភាគី សេដ្ឋកិច្ច សន្តិសុខ និងកិច្ចសហប្រតិបត្តិការអន្តរជាតិ។

អ្វីដែលគេចាប់អារម្មណ៍ខ្លាំងដែរនោះគឺថា​ លោកពូទីន ក៏នឹងចូលរួមទស្សនាការប្រគំតន្ត្រីថ្នាក់រដ្ឋ ដែលនឹងត្រូវប្រារព្ធឡើងដើម្បីផ្តល់កិត្តិយសដល់ដំណើរទស្សនកិច្ចរបស់លោក និងការជួបពិភាក្សាក្រៅផ្លូវការជាមួយលោកគីម ផងដែរ។

ទោះបីជាយ៉ាងណាក៏ដោយ បណ្តាប្រទេសលោកខាងលិច យល់ឃើញថា ដំណើរទស្សនកិច្ចរបស់លោកពូទីន ទៅកូរ៉េខាងជើងលើកនេះ ក៏មានគោលបំណងបង្កើនកិច្ចសហប្រតិបត្តិការផ្នែកយោធា និងស្នើសុំជំនួយដូចជាសព្វាវុធផងដែរ ខណៈសង្គ្រាមជាមួយអ៊ុយក្រែន កំពុងបន្តឆាបឆេះមិនទាន់មានសញ្ញាថមថយទាល់តែសោះ។

សូមបញ្ជាក់ថា ដំណើរ​ទស្សនកិច្ច​នេះ គឺ​ជាដំណើរ​លើក​ដំបូងរបស់​លោក​ពូទីនទៅកូរ៉េខាងជើង ​ចាប់​តាំង​ពី​ឆ្នាំ​២០០០​មក ដោយកាលនោះ ប្រធានាធិបតីរុស្ស៊ី បាន​ជួប​ជាមួយ​លោក​គីម ជុងអ៊ីល ដែលត្រូវ​ជា​ឪពុក​របស់​មេដឹកនាំ​ គីម ជុងអ៊ុន។

យ៉ាងណាមិញ កាលពីខែកញ្ញាឆ្នាំ២០២៣ លោក គីម ជុងអ៊ុន ក៏បានទៅបំពេញទស្សនកិច្ចនៅតំបន់ចុងបូព៌ារបស់រុស្ស៊ីដែរ តាមការអញ្ជើញរបស់លោក ពូទីន៕

អត្ថបទ៖ សុខ សុវណ្ណ