ថៃ ចាប់ផ្តើមយុទ្ធនាការចាក់វ៉ាក់សាំងកូវីដ ថ្ងៃនេះ

នៅថ្ងៃអាទិត្យនេះ ប្រទេសថៃ បានចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ១៩របស់ខ្លួន ជាមួយវ៉ាក់សាំង Sinovac របស់ចិន។

អ្នកដែលត្រូវចាក់វ៉ាក់សាំងដំបូងគេគឺ ឧបនាយករដ្ឋមន្ត្ រីនិងជារដ្ឋមន្ត្រីក្រសួងសុខាភិបាលសាធារណៈលោក Anutin Charnvirakul។ រីឯនាយករដ្ឋមន្រ្តីថៃ លោក ប្រាយុទ្ធ ចាន់អូចា បានធ្វើជាអធិបតីក្នុងពិធីនេះនៅឯវិទ្យាស្ថានជំងឺឆ្លងរបស់ប្រទេស។

ចំពោះមន្ត្រីផ្សេងទៀតដែលក៏ទទួលការចាក់វ៉ាក់សាំង Sinovac ផងដែរនោះរួមមាន អនុរដ្ឋមន្រ្តីក្រសួងសុខាភិបាលសាធារណៈ រដ្ឋមន្រ្តីក្រសួងកសិកម្ម រដ្ឋមន្រ្តីក្រសួងវប្បធម៌ និងអនុរដ្ឋមន្ត្រីក្រសួងអប់រំ។

ទន្ទឹមគ្នាដែរ លោក ប្រាយុទ្ធ និយាយថា “វាជាថ្ងៃប្រវត្តិសាស្ត្រ និងជាថ្ងៃដើម្បីជួយប្រទេសកសាងទំនុកចិត្តឡើងវិញប្រឆាំងនឹងរោគរាតត្បាត”។

នៅថ្ងៃអាទិត្យជាមួយគ្នានេះ មនុស្ស១៥៩នាក់នៅខេត្តសាមុតសាខន ដែលជាចំណុចផ្ទុះជំងឺកូវីដ១៩រលកថ្មីរបស់ប្រទេសកាលពីពាក់កណ្តាលខែធ្នូ ក៏គ្រោងនឹងចាក់វ៉ាក់សាំងជាលើកដំបូងផងដែរ។ ទាំងនោះរួមបញ្ចូលទាំងមន្រ្តីមូលដ្ឋាន ព្រមទាំងអ្នកតំណាងក្រុមដែលមានហានិភ័យដូចជា គ្រូពេទ្យ និងពលករចំណាកស្រុក។

គួរបញ្ជាក់ថា កាលពីថ្ងៃពុធ ប្រទេសថៃទទួលបានវ៉ាក់សាំងកូវីដដំបូងបង្អស់របស់ខ្លួនចំនួន ២០០,០០០ ដូសពីក្រុមហ៊ុន Sinovac របស់ប្រទេសចិន៕

ប្រែសម្រួល៖ សន្យា

ប្រភព៖ Reuters

ចុចអាន៖ ឯកអគ្គរដ្ឋទូតមីយ៉ាន់ម៉ាប្រចាំ UN ប្តេជ្ញាបន្តប្រយុទ្ធ ក្រោយត្រូវកងទ័ពបណ្តេញចេញពីតំណែងដោយសារនិយាយប្រឆាំងរដ្ឋប្រហារ

ចុចអាន៖ លោក Duterte ចុះហត្ថលេខាលើច្បាប់ផ្ដល់សំណងដល់ក្រុមហ៊ុនវ៉ាក់សាំង បើការចាក់មានប្រតិកម្ម