ព័ត៌មានអន្ដរជាតិ

លោក ពូទីន ចាប់ផ្តើមដំណើរទស្សនកិច្ច នៅកូរ៉េខាងជើង ខណៈ ណាតូ បារម្ភរឿងម្យ៉ាងគត់

បានផុស

៧ ខែ មុន

នៅ

ថ្ងៃពុធ ១៩ មិថុនា ២០២៤

ដោយ

តាមសេចក្តីរាយការណ៍របស់ RT, យន្តហោះដឹកប្រធានាធិបតីរុស្ស៊ីបានចុះចតនៅអាកាសយានដ្ឋានទីក្រុងព្យុងយ៉ាងនាថ្ងៃពុធទី១៩ខែមិថុនាឆ្នាំ២០២៤ ដែលនេះបញ្ជាក់ពី ការចាប់ផ្តើមនៃដំណើរទស្សនកិច្ចផ្លូវរដ្ឋរយៈពេលពីរថ្ងៃរបស់លោក វ្ល៉ាឌីមៀរ ពូទីន នៅឯប្រទេសកូរ៉េខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីម ជុងអ៊ុន បានទៅទទួលលោក ពូទីន ដោយផ្ទាល់ដល់ព្រលានយន្តហោះ មុនពេលថ្នាក់ដឹកនាំទាំងពីរ នឹងត្រូវពិភាក្សាគ្នាលើបញ្ហានានារាប់ចាប់ពីសេដ្ឋកិច្ច សន្តិសុខ និងបញ្ហាអន្តរជាតិដទៃទៀត។

ស្របពេលជាមួយគ្នានោះ បើយោងតាមលោក Yuri Ushakov ដែលជាជំនួយការនយោបាយការបរទេសរបស់ប្រធានាធិបតីរុស្ស៊ីបានឲ្យដឹងថា នឹងមានជំនួបទល់មុខគ្នារាប់ម៉ោងរវាងលោក ពូទីន និងលោក គីម ដើម្បីពិភាក្សាលើបញ្ហារសើបៗ។

លោកបន្តថា ក្នុងដំណើរទស្សនកិច្ចនេះដែរ លោក ពូទីន និងមេដឹកនាំក្នុងទីក្រុងព្យុងយ៉ាង នឹងចុះហត្ថលេខាលើឯកសារមួយចំនួន រួមទាំងកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយដ៏មានសក្តានុពលជាដើម។

ជុំវិញដំណើរទស្សនកិច្ចនេះ សហគមន៍អន្តរជាតិបានបង្ហាញក្តីកង្វល់ជាពន់ពេក ដោយអគ្គលេខាធិការអង្គការណាតូ លោក Jens Stoltenberg និយាយថា សម្ព័ន្ធមិត្តយោធាមួយនេះ បារម្ភបំផុតអំពីរឿងម្យ៉ាងគត់ នោះគឺរុស្ស៊ីអាចផ្តល់ជំនួយដល់កម្មវិធីមីស៊ីលនិងនុយក្លេអ៊ែររបស់កូរ៉េខាងជើង។

សូមបញ្ជាក់ថា ដំណើរទស្សនកិច្ចនេះ គឺជាដំណើរលើកដំបូងរបស់លោកពូទីនទៅកូរ៉េខាងជើង ចាប់តាំងពីឆ្នាំ២០០០មក ដោយកាលនោះ ប្រធានាធិបតីរុស្ស៊ី បានជួបជាមួយលោកគីម ជុងអ៊ីល ដែលត្រូវជាឪពុករបស់មេដឹកនាំ គីម ជុងអ៊ុន។

យ៉ាងណាមិញ កាលពីខែកញ្ញាឆ្នាំ២០២៣ លោក គីម ជុងអ៊ុន ក៏បានទៅបំពេញទស្សនកិច្ចនៅតំបន់ចុងបូព៌ារបស់រុស្ស៊ីដែរ តាមការអញ្ជើញរបស់លោក ពូទីន៕

អត្ថបទ៖ សុខ សុវណ្ណ

ចុចអាន៖ តើលោក ពូទីន ទៅកូរ៉េខាងជើង ដើម្បីអ្វី?