អ្នកជំនាញ៖ ចិន កំពុងអភិវឌ្ឍឃ្លាំងអាវុធនុយក្លេអ៊ែរ លឿនជាងប្រទេសណាណាទាំងអស់

តាមការចុះផ្សាយរបស់ Daily Mail កាលពីដើមសប្តាហ៍នេះ ក្រុមអ្នកជំនាញនៅឯវិទ្យាស្ថានស្រាវជ្រាវសន្តិភាពអន្តរជាតិទីក្រុងស្តុកខុល នៃប្រទេសស៊ុយអែត បានចេញរបាយការណ៍ឆ្នាំ២០២៤ ដោយព្រមានខ្លាំងៗថា ចិន កំពុងពង្រីកឃ្លាំងអាវុធនុយក្លេអ៊ែររបស់ខ្លួនលឿនជាងប្រទេសណាណាទាំងអស់ ហើយកំពុងក្តោបក្តាប់ក្បាលគ្រាប់នុយក្លេអ៊ែរឡើងដល់ ៥០០គ្រាប់ ក្នុងរយៈពេលត្រឹមមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនមែនតែចិនទេ វិទ្យាស្ថាននេះថែមទាំងព្រមានទៀតថា ប្រទេសកូរ៉េខាងជើង ក៏កំពុងពង្រឹងឃ្លាំងគ្រាប់របស់ខ្លួន ៤០%ផងដែរក្នុងរយៈពេលត្រឹមមួយឆ្នាំ ពោលគឺអភិវឌ្ឍពី៣០ក្បាលគ្រាប់នុយក្លេអ៊ែរ ឡើងដល់៥០ក្បាលគ្រាប់។

របាយការណ៍នេះត្រូវបានបញ្ចេញ ចំពេលក្រសួងការពារជាតិអាមេរិកព្រមានថា ទីក្រុងប៉េកាំង អាចមានក្បាលគ្រាប់នុយក្លេអ៊ែររហូតដល់ទៅ១ ០០០គ្រាប់ឯណោះនៅត្រឹមឆ្នាំ២០៣០។

ដោយឡែក សារព័ត៌មាន Business Insider បានគូសបញ្ជាក់ថា ការពង្រីកឃ្លាំងអាវុធនុយក្លេអ៊ែរ មិនមែនជាគោលដៅយោធាតែមួយគត់របស់ចិននោះទេ ខណៈប្រទេសនេះក៏ផ្តោតការយកចិត្តទុកដាក់ជាពិសេស លើការពង្រឹងសមត្ថភាពកងទ័ពជើងទឹកផងដែរ។

ត្បិតតែរបាយការណ៍របស់វិទ្យាស្ថានកងទ័ពជើងទឹកអាមេរិកឆ្នាំ២០២១ បង្ហាញថា ចិន ជាប្រទេសមានកងទ័ពជើងទឹកខ្លាំងដាច់គេលើលោក ជាមួយនាវាចំនួន៣៥៥គ្រឿង ក៏ដោយ ប៉ុន្តែអ្នកជំនាញផ្នែកយោធាមួយចំនួនជឿថា ចិននៅតែមិនអាចយកឈ្នះសហរដ្ឋអាមេរិកបានឡើយនៅទសវត្សរ៍ក្រោយ៕

អត្ថបទ៖ សុខ សុវណ្ណ

ចុចអាន៖ តៃវ៉ាន់​ ប្រុងខ្លួន ក្រោយនាវាមុជទឹកនុយក្លេអ៊ែរចិន ចូលកៀក