ព័ត៌មានអន្ដរជាតិ

អាមេរិក យល់ព្រមលក់ដ្រូនយោធាតម្លៃ ៣៦០លានដុល្លារ ឲ្យតៃវ៉ាន់

បានផុស

៣ ថ្ងៃ មុន

នៅ

ថ្ងៃពុធ ១៩ មិថុនា ២០២៤

ដោយ

រដ្ឋបាលរបស់លោក ចូ បៃឌិន បានប្រកាសកាលពីថ្ងៃទី១៨ ខែមិថុនា ថា ក្រុងវ៉ាស៊ីតោន នឹងលក់ដ្រូនយោធារាប់់រយគ្រឿង ដែលមានតម្លៃសរុប ៣៦០លានដុល្លារឲ្យទៅកោះតៃវ៉ាន់ ដែលការជួញដូរនេះ ប្រាកដណាស់នឹងមានការថ្កោលទោសជាមិនខានពីរដ្ឋាភិបាលក្រុងប៉េកាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ធ្វើឡើងខណៈភាពតានតឹងកាន់តែកើនឡើងកម្ដៅខ្លាំងរវាងសហរដ្ឋអាមេរិក និងប្រទេសចិន ព្រោះមានតៃវ៉ាន់ជាបញ្ហាស្នូលដែលមិនងាយដោះស្រាយចេញ។ ចិនតែងចង់បានកោះតៃវ៉ាន់ទៅគ្រប់គ្រង ហើយប្រកាសទាមទារយកអធិបតេយ្យភាពរបស់ខ្លួនមួយនេះមកវិញទាល់តែបាន បើទោះជាត្រូវប្រើប្រាស់កម្លាំងយោធាប្រឈមមុខគ្នាក៏ដោយ។

ក្នុងសេចក្ដីថ្លែងការណ៍របស់ក្រសួងការបរទេសអាមេរិក បានឲ្យដឹងថា ការជួញដូរលើកនេះ មានដ្រូនប្រភេទ Altius-600M ចំនួន ២៩១គ្រឿង និងដ្រូនប្រភេទ Switchblade ចំនួន ៧២០គ្រឿង ដែលអាចបំពាក់ក្បាលគ្រាប់មីស៊ីល និងបាញ់ក្នុងរយៈចម្ងាយឆ្ងាយបាន។

មន្ទីរបញ្ចកោណរបស់អាមេរិក បានប្រកាសថា ការលក់នេះ នឹងជួយបង្កើនសន្តិសុខរបស់តៃវ៉ាន់ ក៏ដូចជាពង្រឹងស្ថិរភាពនយោបាយ តុល្យភាពយោធា និងដំណើរការសេដ្ឋកិច្ចនៅក្នុងតំបន់។ ជាការឆ្លើយតប ក្រសួងការពារជាតិតៃវ៉ាន់ បានបង្ហាញនូវអំណរគុណរបស់ខ្លួនចំពោះអាមេរិក ក្នុងកិច្ចខំប្រឹងប្រែងបង្កើនការលក់អាវុធឲ្យទៅរដ្ឋាភិបាលក្រុងតៃប៉ិ។ តៃវ៉ាន់ ថា “នៅចំពោះមុខប្រតិបត្តិការយោធាជាញឹកញាប់របស់កុម្មុយនិស្តចិននៅជុំវិញកោះតៃវ៉ាន់ ការយល់ព្រមលក់អាវុធអាមេរិកទាំងអស់នេះ នឹងមានសមត្ថភាពក្នុងការអង្កេតការណ៍ និងវាយប្រហារជាក់ស្ដែងទាន់ពេលវេលា ហើយអាចឆ្លើយតបបានលឿនចំពោះការគំរាមកំហែងពីសត្រូវ”។ តៃវ៉ាន់ រំពឹងថា កងទ័ពររំដោះប្រជាជនចិននឹងបញ្ឈប់ប្រតិបត្តិការយោធាគាបសង្កត់បន្តទៀតនៅជុំវិញតៃវ៉ាន់ ហើយយល់ព្រមចូលរួមជាមួយគ្នាដើម្បីស្ថិរភាពក្នុងតំបន់៕

ដោយ៖ ឈាង