ចេញពីកូរ៉េខាងជើង លោក ពូទីន នឹងហោះទៅវៀតណាម ភ្លាម

ក្រោយបញ្ចប់ដំណើរទស្សនកិច្ចនៅប្រទេសកូរ៉េខាងជើង, ប្រធានាធិបតីរុស្ស៊ី លោក វ្ល៉ាឌីមៀរ ពូទីន នឹងបន្តហោះទៅទីក្រុងហាណូយនៃប្រទេសវៀតណាម ដើម្បីបំពេញទស្សនកិច្ចផ្លូវរដ្ឋ តបតាមការអញ្ជើញរបស់អគ្គលេខាបក្សលោក Nguyen Phu Trong។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express, ដំណើរ​ទស្សនកិច្ច​ផ្លូវរដ្ឋ​របស់​ប្រធានាធិបតី​រុស្ស៊ី នឹងធ្វើឡើង​នៅ​ថ្ងៃទី ១៩-២០ ខែមិថុនា​ ហើយនេះ​ជា​ដំណើរ​ទស្សនកិច្ច​លើក​ទី​៥​របស់លោក ​វ្ល៉ា​ឌី​មៀរ ពូ​ទីន​នៅ​វៀតណាម គិត​ចាប់​តាំង​ពី​ឆ្នាំ​២០០១​មក។

ឯកអគ្គរដ្ឋទូតរុស្ស៊ីប្រចាំវៀតណាម Gennady Bezdetko បានឲ្យដឹងថា លោកប្រធានាធិបតី ពូទីន នឹងមកបំពេញទស្សនកិច្ចនៅវៀតណាម ក្នុងឋានៈជាប្រធានគណៈប្រតិភូនៃថ្នាក់ដឹកនាំសហព័ន្ធនិងថ្នាក់តំបន់ ព្រមទាំងក្នុងឋានៈជាប្រធានស្ថាប័នអាជីវកម្មធំៗរបស់រុស្ស៊ីផងដែរ។

តាមការបញ្ជាក់ លោក ពូទីន គ្រោងពិភាក្សានិងជួបជាមួយថ្នាក់ដឹកនាំជាន់ខ្ពស់វៀតណាម ក៏ដូចជាចូលរួមព្រឹត្តិការណ៍នានា ជាមួយនិស្សិតបញ្ចប់ការសិក្សានៅសកលវិទ្យាល័យសូវៀត និងរុស្ស៊ីទៀតផង។

ស្របពេលជាមួយគ្នានោះ លោក Dang Minh Khoi ឯកអគ្គរដ្ឋទូតវៀតណាម ប្រចាំនៅប្រទេសរុស្ស៊ី ក៏និយាយដែរថា “ដំណើរទស្សនកិច្ចនេះ មានសារៈសំខាន់ខ្លាំងណាស់ ពោលគឺជាការរឹតចំណងទាក់ទងដៃគូយុទ្ធសាស្ត្រគ្រប់ជ្រុងជ្រោយវៀតណាម-រុស្ស៊ីកាន់តែស៊ីជម្រៅលើគ្រប់វិស័យនិងបង្កើនកម្រិតក្នុងស្ថានភាពថ្មី ហើយដំណើរទស្សនកិច្ចនេះ មិនត្រឹមតែជាព្រឹត្តិការណ៍ការទូតដ៏ធំប៉ុណ្ណោះទេ ថែមទាំងបង្ហាញពីការគោរពនិងការប្តេជ្ញាចិត្តរបស់រុស្ស៊ីចំពោះទំនាក់ទំនងសហប្រតិបត្តិការពហុភាគីជាមួយវៀតណាមទៀតផង។

លើសពីនេះ មេដឹកនាំនៃប្រទេសទាំងពីរ នឹងពិភាក្សាគ្នាកាន់តែច្បាស់លាស់ លើវិស័យសំខាន់ៗចាប់ពីសេដ្ឋកិច្ច ពាណិជ្ជកម្ម ការពារជាតិ សន្តិសុខ ថាមពល វិទ្យាសាស្ត្រ និងបច្ចេកវិទ្យា រហូតដល់ការអប់រំ វប្បធម៌ និងការទូតរវាងប្រជាជន និងប្រជាជន។

ពាក់ព័ន្ធវិស័យសេដ្ឋកិច្ចនិងពាណិជ្ជកម្ម, ចំណូលទ្វេភាគីបានកើនឡើងពី ១០ទៅ១៥% ជារៀងរាល់ឆ្នាំ។ ទោះបីជាយ៉ាងណាក៏ដោយ ចាប់តាំងពីការផ្ទុះឡើងនៃជម្លោះរុស្ស៊ី-អ៊ុយក្រែន ស្ថានភាពនយោបាយ និងសេដ្ឋកិច្ចដ៏ស្មុគស្មាញនៅលើពិភពលោក វាបានជះឥទ្ធិពលអវិជ្ជមានដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំងពីរ៕

អត្ថបទ៖ សុខ សុវណ្ណ

ចុចអាន៖ លោក ពូទីន ចាប់ផ្តើមដំណើរទស្សនកិច្ច នៅកូរ៉េខាងជើង ខណៈ ណាតូ បារម្ភរឿងម្យ៉ាងគត់