ព័ត៌មានអន្ដរជាតិ

លោក ពូទីន ជូនកាដូចំនួន៣ឲ្យលោក គីម ជុងអ៊ុន អំឡុងទស្សនកិច្ច

បានផុស

៨ ខែ មុន

នៅ

ថ្ងៃព្រហស្បតិ៍ ២០ មិថុនា ២០២៤

ដោយ

Chheang

លោក គីម ជុងអ៊ុន បានទទួលកាដូចំនួន៣ ពីលោក វ៉្លាឌឺមៀ ពូទីន នៅអំឡុងដំណើរទស្សនកិច្ចជាប្រវត្តិសាស្ត្រ និងជាលើកដំបូងក្នុងរយៈពេល២៤ឆ្នាំកន្លងទៅរវាងសម្ព័ន្ធមិត្តទាំង២ ដែលទើបបញ្ចប់កាលពីថ្ងៃទី១៩ ខែមិថុនា។

ទស្សនកិច្ចរបស់លោក វ៉ា្លឌឺមៀ ពូទីន នៅកូរ៉េខាងជើង (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមលោក Yuri Ushakov ជំនួយការប្រធានាធិបតីរុស្ស៊ី កាដូទាំង៣ មានដូចជា រថយន្តប្រណិត១គ្រឿងម៉ាក Aurus Senat, ឈុតផឹកតែ១ឈុត និងកូនកាំបិតកងទ័ព១ដើម។ រថយន្តប្រណិតដែលមេដឹកនាំកូរ៉េខាងជើងទទួលបាន គឺជាប្រភេទរថយន្តផ្លូវការសម្រាប់ដឹកលោក ពូទីន ហើយក៏ជាម៉ាកយីហោរថយន្តដែលផលិតផ្ទាល់ដោយក្រុមហ៊ុនរុស្ស៊ី Aurus Motors។ លោក ពូទីន បានជិះរថយន្តប្រភេទនេះ អំឡុងពេលពិធីស្បថចូលឡើងកាន់តំណែងជាប្រធានាធិបតីលើកទី៥នៅរដ្ឋធានីមូស្គូ កាលពីខែឧសភាកន្លងទៅ។

វាគឺជាកាដូរថយន្តលើកទី២ហើយ ដែលមេដឹកនាំរុស្ស៊ីជូនទៅលោក គីម ជុងអ៊ុន ដោយកាលពីខែកុម្ភៈកន្លងទៅ លោកក៏បានឲ្យរថយន្តប្រណិត១គ្រឿងផលិតដោយក្រុមហ៊ុន Aurus ផងដែរទៅឲ្យមេដឹកនាំកូរ៉េខាងជើង។

លោក គីម ជុងអ៊ុន ត្រូវគេដឹងឮថា លោកគឺជាបុគ្គលដែលស្រឡាញ់ចូលចិត្តការប្រមូលទុកនូវរថយន្តប្រណិតៗជាច្រើន ដូចជា Maybeach Limousine, Mercedes, Rolls-Royce Phantom និង Lexus ជាដើម។

យ៉ាងណាមិញ សម្រាប់អន្តរជាតិវិញ ការឲ្យកាដូនេះគឺខុសពីគោលការណ៍ដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានហាមឃាត់នូវការផ្គត់ផ្គង់ផលិតផលប្រណិតៗទៅឲ្យក្រុងព្យុងយ៉ាង។

នៅអំឡុងទស្សនកិច្ចរបស់រុស្ស៊ីនៅកូរ៉េខាងជើងដដែលនេះ លោក គីម ជុងអ៊ុន ក៏បានឲ្យកាដូទៅលោក ពូទីន វិញផងដែរ ដោយកាដូនោះគឺជាប្រភេទស្នាដៃសិល្បៈផ្សេងៗ ដូចជា ចម្លាក់រូបរបស់លោក ពូទីន ជាដើម។

សូមបញ្ជាក់ថា ក្នុងកិច្ចប្រជុំរវាងមេដឹកនាំប្រទេសទាំង២ មានការចុះកិច្ចព្រមព្រៀងភាពជាដៃគូថ្មីមួយ ដែលបញ្ជាក់ថា សម្ព័ន្ធមិត្តទាំងពីរ នឹងជួយគ្នាទៅវិញទៅមក បើប្រទេសណាមួយត្រូវបរទេសឈ្លានពាន។ បន្ថែមពីនេះ ក៏មានការចុះហត្ថលេខាលើកិច្ចព្រមព្រៀងជាច្រើនជាមួយគ្នាផ្សេងទៀតផងដែរ ដូចជា ទំនាក់ទំនង វប្បធម៌ ទេសចរណ៍ ពាណិជ្ជកម្ម សេដ្ឋកិច្ច និងសន្តិសុខ៕

ដោយ៖ ឈាង

អានបន្ថែម៖ រុស្ស៊ី-កូរ៉េខាងជើង នឹងជួយគ្នា បើបរទេសណា ហ៊ានឈ្លានពាន