ព័ត៌មានអន្ដរជាតិ

ពូទីន ធ្វើតៃកុង បើករថយន្តជូន គីម ជុងអ៊ុន ដើរកម្សាន្ត

បានផុស

១០ ខែ មុន

នៅ

ថ្ងៃព្រហស្បតិ៍ ២០ មិថុនា ២០២៤

ដោយ

ត្បិតតែដំណើរទស្សនកិច្ចរបស់លោក ពូទីន នៅប្រទេសកូរ៉េខាងជើង បានបញ្ចប់ទៅហើយក៏ពិតមែន ប៉ុន្តែមានវីដេអូមួយកំពុងផ្ទុះការចាប់អារម្មណ៍យ៉ាងខ្លាំង ដែលប្រធានាធិបតីរុស្ស៊ី ធ្វើជាតៃកុងឡាន បើកជូនលោក គីម ជុងអ៊ុន ដើរកម្សាន្តតាមផ្លូវក្នុងទីក្រុង ព្យុងយ៉ាង។

វីដេអូនេះ ត្រូវបានបញ្ចេញដោយបណ្តាញផ្សព្វផ្សាយរុស្ស៊ី បង្ហាញឲ្យឃើញលោក ពូទីន ធ្វើជាតៃកុងរថយន្តប្រណីតពាសដែកការពារគ្រាប់ពណ៌ខ្មៅម៉ាក Aurus ដោយមានលោក គីម អង្គុយនៅកៅអីខាងមុខជាប់តៃកុងតែម្តង។

ការធ្វើដំណើរតាមរថយន្តនេះ កើតឡើងបន្ទាប់ពីមេដឹកនាំនៃប្រទេសទាំងពីរ បានចុះហត្ថលេខាលើសន្ធិសញ្ញាស្តីពីភាពជាដៃគូយុទ្ធសាស្ត្រគ្រប់ជ្រុងជ្រោយ ដែលរួមមានទាំងបទប្បញ្ញត្តិស្តីពីការពង្រឹងកិច្ចសហប្រតិបត្តិការយោធា និងការប្តេជ្ញាចិត្តចំពោះវិស័យការពារជាតិ ដើម្បីគាំទ្រគ្នាទៅវិញទៅមកក្នុងស្ថានភាពរងការវាយប្រហារផងដែរ។

ក្នុងដំណើរទស្សនកិច្ចនោះ លោក ពូទីន ក៏បានជូនកាដូចំនួន៣ ដល់លោក គីម ជុងអ៊ុនផងដែរមានដូចជា រថយន្តប្រណីត១គ្រឿងម៉ាក Aurus Senat, ឈុតផឹកតែ១ឈុត និងកូនកាំបិតកងទ័ព១ដើម។

រថយន្តប្រណីតដែលមេដឹកនាំកូរ៉េខាងជើងទទួលបាន គឺជាប្រភេទរថយន្តផ្លូវការសម្រាប់ដឹកលោក ពូទីន ហើយក៏ជាម៉ាកយីហោរថយន្តដែលផលិតផ្ទាល់ដោយក្រុមហ៊ុនរុស្ស៊ី Aurus Motors។ លោក ពូទីន បានជិះរថយន្តប្រភេទនេះ អំឡុងពេលពិធីស្បថចូលឡើងកាន់តំណែងជាប្រធានាធិបតីលើកទី៥នៅរដ្ឋធានីមូស្គូ កាលពីខែឧសភាកន្លងទៅ។

វាគឺជាកាដូរថយន្តលើកទី២ហើយ ដែលមេដឹកនាំរុស្ស៊ីជូនទៅលោក គីម ជុងអ៊ុន ដោយកាលពីខែកុម្ភៈកន្លងទៅ លោកក៏បានឲ្យរថយន្តប្រណិត១គ្រឿងផលិតដោយក្រុមហ៊ុន Aurus ផងដែរទៅឲ្យមេដឹកនាំកូរ៉េខាងជើង។

សូមបញ្ជាក់ជាថ្មី លោក ពូទីន បានចាប់ផ្តើមដំណើរទស្សនកិច្ចផ្លូវរដ្ឋ នៅប្រទេសកូរ៉េខាងជើង កាលពីថ្ងៃពុធទី១៩ខែមិថុនា ដែលនេះជាដំណើរទស្សនកិច្ចលើកដំបូងក្នុងរយៈពេល២៤ឆ្នាំហើយអ្វីដែលគេផ្តោតការយកចិត្តទុកដាក់ជាពិសេសគឺថា សម្ព័ន្ធមិត្តទាំងពីរ បានចុះកិច្ចព្រមព្រៀង ជួយគ្នាទៅវិញទៅមក បើប្រទេសណាមួយត្រូវបរទេសឈ្លានពាន៕

សូមទស្សនាវីដេអូ៖