ព័ត៌មានអន្ដរជាតិ

លោក ពូទីន ថា រុស្ស៊ីអាចចរចាសន្តិភាពជាមួយអ៊ុយក្រែនបានគ្រប់ពេល គ្រប់ទីកន្លែង

បានផុស

៨ ខែ មុន

នៅ

ថ្ងៃសុក្រ ២១ មិថុនា ២០២៤

ដោយ

Chheang

ថ្លែងក្នុងសន្និសីទព័ត៌មាននៅទីក្រុងហាណូយ ប្រទេសវៀតណាម កាលពីថ្ងៃទី២០ ខែមិថុនា ឆ្នាំ២០២៤, លោក វ៉ា្លឌឺមៀរ ពូទីន បានប្រកាសថា រដ្ឋាភិបាលរបស់លោកបានត្រៀមខ្លួនរួចរាល់ហើយសម្រាប់កិច្ចចរចាសន្ដិភាពជាមួយអ៊ុយក្រែន ដែលការចរចានេះអាចធ្វើបានភ្លាមៗពេលណាក៏បាន នៅទីកន្លែងណាក៏បាន។

លោក វ៉ា្លឌឺមៀរ ពូទីន ប្រធានាធិបតីរុស្ស៊ី (រូបភាព៖ AA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំរុស្ស៊ីវ័យ៧១ឆ្នាំ បាននិយាយថា គំនិតផ្ដួចផ្ដើមសន្តិភាពរបស់រុស្ស៊ីជាមួយអ៊ុយក្រែន ទំនងជាអាចមានការជំទាស់ពីលោកខាងលិច។ លោក បន្តថា រាល់សំណើរបស់រុស្ស៊ី តែងតែត្រូវគេហៅថាជារឿងដែលមិនប្រាកដប្រជា ខណៈដែលគ្មាននរណាម្នាក់រិះគន់ “ឱសានវាទ” របស់អ៊ុយក្រែន ទាល់តែសោះ ចំពោះលក្ខខណ្ឌដែលទីក្រុងមូស្គូមិនអាចទទួលយកបានដូចគ្នា។

លោក ពូទីន បានបញ្ជាក់ទៀតថា ប្រសិនបើពិភពលោកចង់បញ្ចប់សង្គ្រាមមែន នោះក្រុមអ្នកនយោបាយនឹងពិចារណាទៅលើសំណើរបស់រុស្ស៊ីមិនខាន។ យ៉ាងណាមិញ លោកបានបន្ថែមថា សំណើរបស់រុស្ស៊ីអាចមានការផ្លាស់ប្ដូរគ្រប់ពេលវេលា ក៏អាស្រ័យលើស្ថានភាពសមរភូមិផងដែរ។

ចំណុច១ដែលលោក ពូទីន បានសង្កត់ធ្ងន់នោះគឺថា ប្រសិនបើអ៊ុយក្រែននៅតែទាមទារឲ្យរុស្ស៊ីដកទ័ពចេញ មុនចាប់ផ្ដើមកិច្ចចរចាសន្ដិភាព នោះវានឹងមិនអាចទៅរួចនោះឡើយ។ មួយវិញទៀត លោកនិយាយថា នៅឆ្នាំ២០២៥ខាងមុខ លោក ហេ្សលេនស្គី គួរតែត្រូវលោកខាងលិចផ្លាស់ប្ដូរចេញកុំឲ្យនៅដឹកនាំអ៊ុយក្រែនបន្តទៅទៀត៕

ដោយ៖ ឈាង