ព័ត៌មានអន្ដរជាតិ

ប្រជាជនកេនយ៉ារាប់ពាន់នាក់ ធ្វើបាតុកម្មប្រឆាំងនឹងការដំឡើងពន្ធថ្មី

បានផុស

៣ ថ្ងៃ មុន

នៅ

ថ្ងៃសុក្រ ២១ មិថុនា ២០២៤

ដោយ

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី ២១ ខែ មិថុនានេះ យុវជនរាប់ពាន់នាក់បានធ្វើបាតុកម្មកាលពីថ្ងៃព្រហស្បតិ៍នៅក្នុងរដ្ឋធានីរបស់ប្រទេសកេនយ៉ា និងនៅទូទាំងប្រទេសប្រឆាំងនឹងសំណើពន្ធថ្មីដែលស្នើដោយរដ្ឋបាលលោកប្រធានាធិបតី William Ruto។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាតុករ បានចាប់ផ្តើមធ្វើបាតុកម្មជុំទីមួយតាំងពីថ្ងៃអង្គារទាមទារឱ្យសមាជិកសភាបោះឆ្នោតប្រឆាំងនឹងច្បាប់នេះ ខណៈដែលច្បាប់នេះនឹងមានបន្ទុកធ្ងន់សម្រាប់ប្រាក់បៀវត្សរ៍របស់ប្រជាជនកេនយ៉ា សហគ្រិន និងអ្នកប្រើប្រាស់។ ការតវ៉ាកាលពីថ្ងៃអង្គារបណ្ដាលឲ្យមនុស្សជាង ២០០ នាក់ត្រូវបានចាប់ខ្លួន ប៉ុន្តែក្រោយមកមកត្រូវបានដោះលែង។

ចំណែកការតវ៉ាកាលពីថ្ងៃព្រហស្បតិ៍នេះ បាននាំឱ្យតំបន់ពាណិជ្ជកម្មរបស់រដ្ឋធានីណៃរ៉ូប៊ីមានភាពជាប់គាំង ប៉ូលិសបានគប់កំប៉ុងហ្គាសបង្ហូរទឹកភ្នែក និងបាញ់កាណុងទឹកទៅលើក្រុមបាតុករដែលដើរឆ្ពោះទៅអគារសភា ជាកន្លែងដែលសមាជិកសភាកំពុងពិភាក្សាអំពីច្បាប់នេះ។

ទន្ទឹមនឹងនោះ ក្រុមបាតុករបានព្យាយាមទម្លុះខ្សែការពារ ដើម្បីចូលទៅកាន់អគារសភា ដោយកាន់បដាប្រឆាំងរដ្ឋាភិបាល និងស្រែកប្រឆាំងលោក Ruto។ យុវជនក៏បានធ្វើបាតុកម្មនៅក្នុងទីប្រជុំជន Eldoret ជាកន្លែងរស់នៅរបស់ប្រធានាធិបតីផងដែរ ដែលពួកគេបានប្រាប់អ្នកកាសែតថា ពួកគេត្រូវបានគេបោកប្រាស់ឱ្យបោះឆ្នោតឱ្យលោក Ruto ដោយសារលោក Ruto បានសន្យាថារដ្ឋាភិបាលរបស់លោកនឹងកាត់បន្ថយពន្ធ និងកាត់បន្ថយថ្លៃដើមរស់នៅ។

កាលពីថ្ងៃព្រហស្បតិ៍សមាជិកសភាបានជជែកដេញដោល និងបោះឆ្នោតលើច្បាប់នេះនៅក្នុងការត្រួតពិនិត្យលើកទីពីរ ខណៈការត្រួតពិនិត្យទីបី នឹងធ្វើចុងក្រោយសប្តាហ៍ក្រោយ។ ចំណែកលោក Ruto ក៏បាននិយាយកាលពីដើមសប្តាហ៍នេះថា ការតវ៉ាគឺជាសិទ្ធិក្នុងរដ្ឋធម្មនុញ្ញ ប៉ុន្តែស្ថាប័នរដ្ឋាភិបាលត្រូវតែអនុវត្តច្បាប់នៅក្នុងអាណត្តិរបស់ពួកគេ។

គួរបញ្ជាក់ថា ពន្ធថ្មីនឹងរួមបញ្ចូលការយកពន្ធ ២,៧៥ភាគរយលើប្រាក់ចំណូលចំពោះផែនការធានារ៉ាប់រងផ្នែកវេជ្ជសាស្រ្តជាតិ ក៏ដូចជាការបង្កើនពន្ធលើប្រេងឆា និងប្រេងឥន្ធនៈ ដែលនឹងធ្វើឱ្យថ្លៃដើមផលិតកម្មកើនឡើង និងធ្លាក់ចុះដល់អ្នកប្រើប្រាស់។សំណើនេះរួមទាំងស្នើដើម្បីបង្កើនពន្ធលើតម្លៃបន្ថែម ១៦ ភាគរយលើនំប៉័ង និងពន្ធប្រចាំឆ្នាំថ្មីលើយានយន្តតែត្រូវបានដកចេញកាលពីថ្ងៃអង្គារ បន្ទាប់ពីកិច្ចប្រជុំរវាងលោក Ruto និងសមាជិកបក្សកាន់អំណាច។

ប៉ុន្តែអ្នកដែលធ្វើបាតុកម្មកាលពីថ្ងៃព្រហស្បតិ៍នៅតែទទូចថាវិសោធនកម្មនេះមិនទាន់គ្រប់គ្រាន់ទេ ពួកគេចង់ឱ្យសមាជិកសភាបដិសេធទាំងស្រុងនូវច្បាប់នេះ។ខណៈប្រជាជនកេនយ៉ាក្រីក្រយល់ឃើញថាច្បាប់នេះមិនសមស្របនឹងស្ថានភាពដែលប្រជាជនទើបតែងើបចេញពីការបំផ្លិចបំផ្លាញដោយទឹកជំនន់នោះទេ៕