ព័ត៌មានអន្ដរជាតិ

កូរ៉េខាងជើង ព្រមានថា សង្គ្រាមលោកនឹងផ្ទុះឡើង បើអាមេរិកបន្តគាំទ្រអ៊ុយក្រែន

បានផុស

៣ ម៉ោង មុន

នៅ

ថ្ងៃចន្ទ ២៤ មិថុនា ២០២៤

ដោយ

មន្ត្រីជាន់ខ្ពស់ក្រុងព្យុងយ៉ាង បានរិះគន់សហរដ្ឋអាមេរិក ដែលនៅតែបន្តការផ្គត់ផ្គង់យោធាឲ្យទៅអ៊ុយក្រែន សម្រាប់យកទៅតតាំងជាមួយរុស្ស៊ីនៅក្នុងសង្គ្រាម។ នេះបើយោងតាមការចុះផ្សាយរបស់សារព័ត៌មាន KCNA នៅថ្ងៃទី២៤ ខែមិថុនា ឆ្នាំ២០២៤។

លោក Pak Jong Chon និងលោក គីម ជុងអ៊ុន (រូបភាព៖ NK News)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pak Jong Chon មន្ត្រីយោធាជាន់ខ្ពស់កូរ៉េខាងជើង បាននិយាយថា រុស្ស៊ីមានសិទ្ធិបើកការវាយប្រហារសងសឹកគ្រប់ទម្រង់ ប្រសិនបើក្រុងវ៉ាស៊ីតោននៅតែលូកដៃមិនឈប់នៅក្នុងសង្គ្រាមរវាងក្រុងមូស្គូ និងក្រុងកៀវ។ លោក បានសង្កត់ធ្ងន់ថា ការឆ្លើយតបដ៏ខ្លាំងក្លារបស់រុស្ស៊ីទៅកាន់សហរដ្ឋអាមេរិក អាចបញ្ឆេះជាភ្លើងសង្គ្រាមលោកលើកទី៣បាន។

លោក Pak បានបន្ថែមទៀតថា កូរ៉េខាងជើង នឹងតែងតែនៅជាមួយប្រជាជន និងកងទ័ពរុស្ស៊ីជានិច្ច ក្នុងកិច្ចប្រឹងប្រែងរបស់ពួកគេដើម្បីរក្សាការពារសិទ្ធិអធិបតេយ្យភាព។

ការលើកឡើងរបស់លោក Pak ធ្វើឡើងក្រោយពីមន្ទីរបញ្ចកោណ បានប្រកាសកាលពីសប្ដាហ៍មុនថា កងកម្លាំងអ៊ុយក្រែន អាចយកអាវុធអាមេរិកទៅវាយប្រហារគ្រប់ទីកន្លែងទាំងអស់នៅលើទឹកដីរុស្ស៊ី។

លោក គីម ជុងអ៊ុន និងលោក វ៉្លាឌឺមៀរ ពូទីន (រូបភាព៖ AP)

គួររំឭកថា ទំនាក់ទំនងយោធារុស្ស៊ី និងកូរ៉េខាងជើង បានកើនឡើងមួយកម្រិតទៀត បន្ទាប់ពីទស្សនកិច្ចរបស់លោក វ៉ា្លឌឺមៀរ ពូទីន នៅក្រុងព្យុងយ៉ាង កាលពីថ្ងៃទី១៩ ខែមិថុនា ឆ្នាំ២០២៤។ រុស្ស៊ី និងកូរ៉េខាងជើង បានចុះកិច្ចព្រមព្រៀងយុទ្ធសាស្ត្រការពារគ្នា សម្រាប់ព្រឹត្តិការណ៍សង្គ្រាម ដែលបញ្ជាក់ថា សម្ព័ន្ធមិត្តទាំង២ នឹងជួយគ្នាទៅវិញទៅមក បើប្រទេសណាមួយត្រូវបរទេសឈ្លានពាន។

ទំនាក់ទំនងនេះ កំពុងធ្វើឲ្យសហរដ្ឋអាមេរិក និងកូរ៉េខាងត្បូង មានការព្រួយបារម្ភជាខ្លាំង ព្រមទាំងចាត់ទុកថា វាគឺជាការបំពានច្បាប់អន្តរជាតិខុសពីគោលការណ៍ទណ្ឌកម្មរបស់ក្រុមប្រឹក្សាសន្ដិសុខអង្គការសហប្រជាជាតិ ដែលរឹតត្បិតការជួញដូរគ្រឿងសព្វាវុធរវាងសម្ព័ន្ធមិត្តទាំង២។

បើតាមរបាយការណ៍របស់កូរ៉េខាងត្បូង និងសហរដ្ឋអាមេរិក បានឲ្យដឹងថា ក្រុងព្យុងយ៉ាងបាននិងកំពុងដឹកសព្វាវុធឲ្យរុស្ស៊ីក្នុងចំនួនមិនតិចនោះទេ ដោយយ៉ាងហោចណាស់ក៏មាន ១ម៉ឺនកុងតឺន័រដែរ។ របាយការណ៍ដដែលនេះ បានបញ្ជាក់ថា កូរ៉េខាងជើង បានចាប់ផ្ដើមលក់អាវុធឲ្យរុស្ស៊ី តាំងពីខែកញ្ញា ឆ្នាំ២០២២កន្លងទៅ ពោលគឺរយៈពេល៧ខែបន្ទាប់ពីផ្ទុះមានសង្គ្រាមនៅអ៊ុយក្រែន។

កូរ៉េខាងត្បូង ថា អាវុធដែលដោះដូរ អាចមានដូចជា មីស៊ីលប្រឆាំងរថក្រោះ មីស៊ីលបាញ់ទៅអាកាស កាំភ្លើងធំ កាំភ្លើងវែង ប្រព័ន្ធបាញ់រ៉ុក្កែត និងគ្រាប់កាំភ្លើងធំ ជាដើម។

បើទោះជាមានការចោទប្រកាន់ជាច្រើនហូរហែយ៉ាងណាក៏ដោយ ក៏សម្ព័ន្ធមិត្តទាំង២ បានបដិសេធមិនព្រមទទួលស្គាល់ការដោះដូរគ្រឿងសព្វាវុធទាំងអស់នេះឡើយ៕

ដោយ៖ ឈាង